މިދިޔަމަހު އޭޖީ އޮފީހުން ކޯޓަށް ހުށަހެޅި މައްސަލަތައް އިތުރު

މިދިޔަ ޖުލައި މަހު ބަންޑާރަނައިބުގެ އޮފީހުން ކޯޓުތަކަށް ހުށަހެޅި މައްސަލަތަކުގެ އަދަދު އިތުރުވެފައިވާ ކަމަށް ތަފާސްހިސާބުތަކުން ދައްކައިފިއެވެ.

ބަންޑާރަނައިބުގެ އޮފީހުން ވަނީ މިދިޔަ ޖުލައި މަހު ކުރި މަސައްކަތްތަކުގެ ތަފާސްހިސާބުތައް އާންމުކޮށްފައެވެ. މި ހިސާބުތަކަށް ބަލާއިރު، ޖޫން މަހާ އަޅާބަލާއިރު ކޯޓަށް ހުށަހެޅުނު މައްސަލަތަކާއި ލީގަލް އެއިޑް ފޯރުކޮށްދިން މިންވަރު ވަނީ ބޮޑުތަނުން އިތުރުވެފައެވެ.

ޖުލައި މަހުގެ ތަފާސްހިސާބުތައް ދައްކާގޮތުން، އެ މަހު ބަންޑާރަނައިބުގެ އޮފީހުން 16 މައްސަލައެއް ކޯޓަށް ހުށަހަޅާފައިވެއެވެ. މިއީ ޖޫން މަހު ކޯޓަށް ހުށަހެޅި 6 މައްސަލައާ އަޅާބަލާއިރު ދެގުނައަށްވުރެ ބޮޑު އިތުރުވުމެކެވެ. ނަމަވެސް، ކޯޓު އަޑުއެހުންތަކުގައި ބައިވެރިވި އަދަދު ވަނީ ޖޫން މަހުގެ 86 އިން ޖުލައި މަހު 66 އަށް ދަށްވެފައެވެ.

ބަންޑާރަނައިބުގެ އޮފީހުގެ ޖުލައި މަހުގެ މަސައްކަތްތަކުގެ އަދާހަމަ #AGOMonthlyUpdate pic.twitter.com/34tsunKcE7

— AG Office Maldives (@AGOmv) August 6, 2026

ޤާނޫނީ ލަފާ ފޯރުކޮށްދިނުމުގެ ދާއިރާއަށް ބަލާއިރު، ޖުލައި މަހު ޖުމްލަ 72 ފަރާތަކަށް ޤާނޫނީ ލަފާ ދީފައިވެއެވެ. މިއީ ޖޫން މަހު ލަފާދިން 76 ފަރާތާ އަޅާބަލާއިރު ކުޑަ ދަށްވުމެކެވެ. އެހެންނަމަވެސް، ލީގަލް އެއިޑް ނުވަތަ ގާނޫނީ އެހީތެރިކަން ފޯރުކޮށްދިން މިންވަރު ވަނީ ޖޫން މަހުގެ 16 އިން ޖުލައި މަހު 25 އަށް އިތުރުވެފައެވެ.

ބަންޑާރަނައިބުގެ އޮފީހަކީ ޤާނޫނުއަސާސީންނާއި ޤާނޫނަކުން އެހެން ފަރާތެއްގެ މަސްއޫލިއްޔަތެއް ކަމުގައި ކަނޑައަޅާފައިވާ ކަންކަން ފިޔަވައި އެހެން ކަންކަމުގައި، ރާއްޖެއާއި ރާއްޖެއިން ބޭރުގެ ކޯޓުތަކުގައާއި އެނޫންވެސް އެފަދަ ތަންތަނުގައި ދިވެހި ދައުލަތް ތަމްސީލުކުރުމާއި، އާބިޓްރޭޝަނާއި މީޑިއޭޝަންފަދަ އޯލްޓަނޭޓިވް ޑިސްޕިއުޓް ރިޒޮލިއުޝަން ނިޒާމުތައް މެދުވެރިކޮށް ހިނގާ މައްސަލަތަކުގައި ދިވެހި ދައުލަތް ތަމްސީލުކުރުމަށް އުފައްދަވާފައިވާ އޮފީހެކެވެ.

ބަންޑާރަނައިބުގެ އޮފީހުން ކޮންމެ މަހަކުވެސް އަންނަނީ އެ އޮފީހުން ކުރަމުންދާ މުހިންމު މަސައްކަތްތަކުގެ ތަފާސްހިސާބުތައް އާންމުކުރަމުންނެވެ. މީގެ މަގްސަދަކީ ދައުލަތުގެ ގާނޫނީ މަސައްކަތްތައް ހިނގާގޮތް ދެފުށް ފެންނަ ގޮތެއްގައި ރައްޔިތުންނަށް ހާމަކުރުން ކަމަށް ބަންޑާރަނައިބުގެ އޮފީހުން މީގެ ކުރިން ވަނީ ވިދާޅުވެފައެވެ.