މިދިޔަ އަހަރު ސްޓެލްކޯއަށް ސާފު ފައިދާގެ ގޮތުގައި 137.9 މިލިޔަން ރުފިޔާ
-
2018ވަނަ އަހަރުން ފެށިގެން 2020ވަނަ އަހަރާއި ހަމައަށް ސްޓެލްކޯގެ ފައިދާ ވަނީ އިތުރުވެފަ
-
2024ވަނަ އަހަރަކީ ސްޓެލްކޯއަށް އެންމެ ބޮޑު ފައިދާއެއް ލިބުނު އަހަރު
ސްޓޭޓް އިލްކްޓްރިކް ކޮމްޕެނީ، ސްޓެލްކޯއަށް މިދިޔަ އަހަރު ސާފު ފައިދާގެ ގޮތުގައި 137.9 މިލިޔަން ރުފިޔާ ލިބިފައިވާކަމަށް އެ ކުންފުނީގެ މެނޭޖިންގ ޑިރެކްޓަރ ހުސެއިން ފަހުމީ ވިދާޅުވެއްޖެއެވެ.
ސްޓެލްކޯގެ މެނޭޖިންގ ޑިރެކްޓަރ ހުސެއިން ފަހުމީ ސޯޝަލް މީޑިއާގައި ހިއްސާކުރެއްވި ޕޯސްޓެއްގައި ފާއިތުވި 7 އަހަރު ސްޓެލްކޯއިން ހޯދި ފައިދާގެ ތަފާސްހިސާބުތައް ވަނީ ހިއްސާކުރައްވާފައެވެ.
މި ތަފާސްހިސާބުތަކަށް ބަލާއިރު 2018 ވަނަ އަހަރުން ފެށިގެން 2020 ވަނަ އަހަރާއި ހަމައަށް ސްޓެލްކޯގެ ފައިދާ ވަނީ އިތުރުވެފައެވެ. އެގޮތުން 2018ވަނަ އަހަރު އެ ކުންފުންޏަށް 105 މިލިޔަން ރުފިޔާގެ ފައިދާއެއް ލިބިފައިވާއިރު 2020 ވަނަ އަހަރު އެ ކުންފުންޏަށް ފައިދާގެ ގޮތުގައި ލިބިފައިވަނީ 130 މިލިޔަން ރުފިޔާއެވެ. އެހެންކަމުން މިއީ 23.8 އިންސައްތައިގެ އިތުރުވުމެކެވެ.
2020ވަނަ އަހަރާއި ހަމައަށް ސްޓެލްކޯއަށް ލިބުނު ފައިދާ އިތުރުވެފައިވީނަމަވެސް 2021ވަނަ އަހަރު އެ ކުންފުންޏަށް ލިބިފައިވާ ފައިދާ ވަނީ 19.5 އިންސައްތަ ދަށްވެފައެވެ. އެއަހަރު ސްޓެލްކޯއަށް 104.7 މިލިއަން ރުފިޔާގެ ފައިދާއެއް ވަނީ ލިބިފައެވެ.
STELCO Financial Performance Over the Years
— Hussain Fahmy (@HussainFahmy09) March 20, 2025
📈 2018: MVR 105M Profit
📈 2019: MVR 109M Profit
📈 2020: MVR 130M Profit
📉 2021: MVR 104.7M Profit
📉 2022: MVR 106.8M Profit
🔻 2023: (MVR 171.9M Loss) ❌
🚀 2024: MVR 137.9M Profit ✅
💡 2024’s profit was achieved through:
✔️… pic.twitter.com/SaTcpcyoXQ
ތަފާސްހިސާބުތަކަށް ދައްކާގޮތުން 2022ވަނަ އަހަރު ސްޓެލްކޯއަށް 106.8 މިލިޔަން ރުފިޔާގެ ފައިދާއެއް ލިބިފައިވީނަމަވެސް ދެން ޖެހިގެންއައި 2023ވަނަ އަހަރު އެ ކުންފުންޏަށް ވަނީ 171.9 މިލިޔަން ރުފިޔާގެ ގެއްލުމެއް ވަނީ ލިބިފައެވެ.
2023ވަނަ އަހަރު ލިބުނު ގެއްލުމުން އަރައިގަނެ، 137.9 މިލިޔަން ރުފިޔާގެ ފައިދާއެއް މިދިޔަ އަހަރު ސްޓެލްކޯއަށް ވަނީ ލިބިފައެވެ. އެހެންކަމުން މިއީ 180.2 އިންސައްތައިގެ އިތުރުވުމެކެވެ. އަދި ފާއިތުވި 7 އަހަރަށް ބަލާލާއިރު 2024ވަނަ އަހަރަކީ ސްޓެލްކޯއަށް އެންމެ ބޮޑު ފައިދާއެއް ލިބުނު އަހަރެވެ.
ސްޓެލްކޯގެ މެނޭޖިންގ ޑިރެކްޓަރ ހުސެއިން ފަހުމީ ވިދާޅުވީ، މިދިޔަ އަހަރު އެ ކުންފުނީގެ މާލީ ނަތީޖާ ރަނގަޅުވެފައިވަނީ އެ ކުންފުނީގެ ހިންގުމުގެ ނިޒާމު ހަރުދަނާކުރުމާއެކު އިސްރާފުކުރުން ކުޑަކޮށް، ލިބިފައިވާ ވަސީލަތަކުގެ ބޭނުން ހަރުދަނާގޮތެއްގައި ބޭނުންކުރެވުމުގެ ސަބަބުންކަމަށެވެ.
ސްޓޭޓް އިލެކްޓްރިކް ކޮމްޕެނީ ލިމިޓެޑް، ސްޓެލްކޯއަކީ ރާއްޖޭގައި ކަރަންޓުގެ ޚިދުމަތް ފޯރުކޮށްދޭ މައި ކުންފުންޏެވެ. ސްޓެލްކޯއިން 35 ޕަވަރ ޕްލާންޓް އޮޕަރޭޓްކުރަމުންދާއިރު، އެތަންތަނުން ދަނީ ރައްޔިތުންގެ ގޭބީސީތަކާއި ދައުލަތުގެ މުޢައްސަސާތަކާއި ވިޔަފާރިތަކަށް މެދުކެނޑުމެއް ނެތި ކަރަންޓުގެ ޚިދުމަތް ފޯރުކޮށްދެމުންނެވެ. މާލެ ސަރަހައްދުގެ އިތުރުން ސްޓެލްކޯއިން ދަނީ އއ، އދ، އަދި ކ އަތޮޅުގެ ރަށްތަކަށްވެސް ކަރަންޓުގެ ޚިދުމަތް ފޯރުކޮށްދެމުންނެވެ.