މި އަހަރުގެ މިނިވަންދުވަހަށް ތައްޔާރުވުމުގެ ގޮތުން ކުރިއަށްގެންދަވާ ސްޓްރީޓް އާރޓް ފެސްޓިވަލް މިއަދު ރަސްމީކޮށް ފަށައިފިއެވެ.
ސްޓްރީޓްއާރޓް ފެސްޓިވަލަކީ ހޯމް މިނިސްޓްރީއާ ފާރއަވޭ ހޮލިޑޭސް ގުޅިގެން ކުރިޔަށްގެންދެވޭ ފެސްޓިވަލެކެވެ.
މޯލްޑިވްސް ސްޓްރީޓް އާރޓް ފެސްޓިވަލަކީ މި އަހަރުގެ މިނިވަންދުވަހުގެ ހަރަކާތްތައް ފެށުމުގެ ގޮތުން ފުރަތަމަ ބޭއްވުނު ހަރަކާތެވެ. މިދިޔަ އަހަރަކީ ރާއްޖޭގެ މިނިވަންކަމަށް 50 އަހަރު ފުރުނު އަހަރުކަމުން މިދިޔަ އަހަރުގެ މިނިވަންދުވަހުގެ ހަރަކާތްތައް މުޅިރާއްޖޭގައި ވަނީ ވަރަށް ކުލަގަދަކޮށް ކުރިޔަށް ގެންގޮސްފައެވެ.
img:http://s1.psmnews.mv/images/660x400/14679055199713.jpg|ސްޓްރީޓް އާރޓް ފެސްޓިވަލްގައި އޮސްޓްރޭލިޔާގެ އާރޓިސްޓުންގެ ޓީމުން ކުރެހުންތަކެއް ދައްކާލަނީ- ފޮޓޯ: ޕީއެސްއެމް
ޖުމްހޫރީ މައިދާނުގައި ބޭއްވި ރަސްމިއްޔާތެއްގައި މޯލްޑިވްސް ސްޓްރީޓް އާރޓް ފެސްޓިވަލް އިފްޠިތާޙްކޮށްދެއްވީ ބަންޑާރަ ނައިބު އަލްއުސްތާޛު މުޙައްމަދު އަނިލްއެވެ. ފެސްޓިވަލް އިފްޠިތާޙްކޮށްދެއްވާ ބަންޑާރަ ނައިބު އަނިލް ދެއްކެވި ވާހަކަފުޅުގައި، މިދިޔަ އަހަރު މިނިވަން ފަންސާހުގެ ހަރަކާތްތަކަށް ޒުވާނުންނާއި މުޅި ރައްޔިތުންގެ ފަރާތުން ލިބުނު އެއްބާރުލުން ފާހަގަކުރައްވާ، މިފަހަރުގެ ހަރަކާތްތަކަށްވެސް އެއްބާރުލުންދީ ބައިވެރިވުމަށް އެދިވަޑައިގެންނެވިއެވެ.
މިރަސްމިއްޔާތުގައި ވާހަކަދައްކަވަމުން ހޯމް މިނިސްޓްރީގެ ޑެޕިއުޓީ މިނިސްޓަރ އަޙުމަދު ސަލީމް ވިދާޅުވީ މިނިވަންކަމުގެ މުނާޞަބާ ވަރަށް ފުޅާކޮށް ފާހަގަކުރައްވާނެކަމަށާ މިފަހަރުގެ މިނިވަންދުވަހުގެ މުނާސަބާ ފެށުމަށް ސަރުކާރުން ވިސްނަވާފައިވަނީ މި ސްޓްރީޓް އާރޓް ފެސްޓިވަލުންކަމަށެވެ.
ސްޓްރީޓް އާރޓަކީ ދުނިޔޭގެ އެކިކަންކޮޅުތަކުގައި ޒުވާނުންގެ މެދުގައި މަޤްބޫލު ކަމެއްކަމަށާ، މިފެސްޓިވަލްގައި ކުރެހުންތައް ދައްކާލި އޮސްޓްރޭލިޔާގެ އާރޓިސްޓުންގެ ޓީމަކީވެސް މިދާއިރާއިން ވަރަށް ތަޖްރިބާކާރު ޓީމެއްކަން އަޙުމަދު ސަލީމް ފާހަގަކުރެއްވިއެވެ.