ފިޠުރު ޢީދު ބަންދުގައި މާލެ އާއި މާލެ ހިމެނޭ ސަރަޙައްދުގެ ރައްޔިތުންގެ ސަލާމަތާ ރައްކާތެރިކަމަށް އިސްކަންދީގެން ފުލުހުން ޚާއްޞަ އޮޕަރޭޝަނެއް ކުރިޔަށް ގެންދަން ހަމަޖެހިފައިވާ ކަމަށާއި ހުރިހާ ފަރާތްތަކުންވެސް ޢީދުގެ އުފާ ފާޅު ކުރާއިރު އިޖުތިމާޢީ މިންގަޑުތައް ދަމަހައްޓައި ޞުލްޙަވެރިކަމާ އެކުވެރިކަމަށް އިސްކަން ދެއްވުމަށް ސެންޓްރަލް އޮޕަރޭޝަންސް ކޮމާންޑުގެ ހެޑް ޗީފް ސުޕްރިންޓެންޑެންޓް އޮފް ޕޮލިސް ހަމްދޫން ރަޝީދު އެދިވަޑައިގެންފިއެވެ.
ހަމްދޫން ރަޝީދު ވިދާޅުވީ ފިޠުރު ޢީދު ބަންދުގައި ފުލުހުން ކުރިޔަށް ގެންދާ އޮޕަރޭޝަންގެ މައިގަނޑު މަޤްޞަދަކީ މާލެއާއި ހުޅުމާލެ އާއި ވިލިމާލެ އަދި މާލެ ހިމެނޭ ސަރަޙައްދުގައި ދިރިއުޅޭ ރައްޔިތުންނަށް ރައްކާތެރިކަމާއެކު ޢީދުގެ ކުޅިވަރުތަކާއި އުފާވެރިކަމުގެ ޙަރަކާތްތައް ކުރިޔަށް ގެންދަން މަގުފަހިވާ ގޮތަށް ގެންދެވޭ އޮޕަރޭޝަނެއްގެ ގޮތުގައި ހެދުން ކަމަށެވެ. ހަމަ އެއާއެކު ޢީދު ބަންދަށް ރަށްރަށަށް ވަޑައިގެންނެވި ރައްޔިތުންގެ ގޯތި ގެދޮރާއި މުދަލުގެ ރައްކާތެރިކަން ކަށަވަރުކޮށްދިނުމަށް މާލެތެރެ ޕެޓްރޯލްކޮށް ބެލެހެއްޓުން އިތުރުކޮށްފައިވާނެ ކަމަށްވެސް ހަމްދޫން ވިދާޅުވިއެވެ.
ހަމްދޫން ވިދާޅުވީ ޢިީދު ބަންދަށް ގިނަބަޔަކު އަތޮޅުތަކަށާއި ރާއްޖެއިން ބޭރަށް ދަތުރުކުރާތީ އެގޮތަށް ރަށުން ބޭރަށް ވަޑައިގެންނަވާ ބޭފުޅުންވެސް ދިރިއުޅުއްވާ ގޯތި ގެދޮރު ރަނގަޅަށް ތަޅުލައްވައި ގޯތި ގެދޮރުގެ ޙާލަތު ދުވާލަކު އެއްފަހަރު ނަމަވެސް ބެލޭނެ އަވަށްޓެރިޔަކު ކަނޑައެޅުއްވުން މުހިއްމު ކަމަށާއި ރަށުން ބޭރަށް ވަޑައިގަންނަވާއިރު ގޭތެރޭގައި އަގުބޮޑެތި މުދަލާއި ގަހަނާ އާއި އެހެނިގެންވެސް އެފަދަ ތަކެތި ރައްކާތެރިކަމާއެކު ބެލެހެއްޓޭނެ އިންތިޒާމެއް ހަމަޖެއްސުމަކީ ވަރަށް މުހިއްމު ކަމެއް ކަމުގައި ދެކިވަޑައިގަންނަވާ ކަމަށެވެ.
ފުލުހުން ހިންގާ މި އޮޕަރޭޝަންގައި ވައްކަމުގެ މައްސަލަތައް މަދުކޮށް ގޯތިގެދޮރު ބެލެހެއްޓުން އިތުރުކުރުމުގެ އިތުރުން ކުށުގެ އެކި ޙަރަކާތްތައް ހިނގާކަމަށް ފާހަގަ ކުރެވޭ ސަރަޙައްދުތައް އިތުރަށް ބެލެހެއްޓުމާއި ބޭނުމެއްނެތި ދަންވަރުގެ ވަގުތުތަކުގައި އަދި އެހެނިހެން ވަގުތުތަކުގައި މަގުމަތީގައި އުޅޭ ފަރާތްތަކާ ސުވާލުކޮށް ހުއްޓުވައި ބަލައި ފާސްކުރަމުން ގެންދާނެ ކަމަށާއި މިކަމުގައި ރައްޔިތުންގެ ފުރިހަމަ އެހީތެރިކަން ފުލުހުންނަށް ލިބިގެންދާނެ ކަމަށް ޤަބޫލު ކުރައްވާ ކަމަށް ހަމްދޫން ވިދާޅުވިއެވެ.
ހަމްދޫން ވިދާޅުވީ މާލެ އާއި މާލެ ހިމެނޭ ސަރަޙައްދުގައި މި ޢީދު ފާހަގަ ކުރަން އެކިއެކި ފަރާތްތަކުން ކުރިޔަށް ގެންދާ ޙަރަކާތްތަކާއި މުބާރާތްތައް ކުރިޔަށްދާ ވަގުތު ތަކުގައި އެސަރަޙައްދުތަކުގައި ފުލުހުން ޙަރަކާތްތެރިވެ ރައްކާތެރި މާޙައުލެއް ކަށަވަރު ކޮށްދިނުމުގެ މަސައްކަތް ކުރަމުންގެންދާނެ ކަމަށެވެ. ހަމަ އެއާއެކު މިފަދަ ޙަރަކާތްތައް އިންތިޒާމު ކުރާ ފަރާތްތަކުންވެސް އެއްގަމު ދަތުރުފަތުރުގެ ނިޒާމަށް ބުރޫއެރުން ކުޑަވާނެ ފަދަ ގޮތަކަށް ޙަރަކާތްތައް އިންތިޒާމު ކުރުމަށާއި މަގު ބަންދުކުރައްވާނަމަ އެކަމަށް ކަމާބެހޭ ފަރާތްތަކުން ނަންގަވަންޖެހޭ ހުއްދަ ކުރިން ދުރާލައި ނަންގަވަން ޖެހޭނެ ކަމަށެވެ. މީގެ އިތުރުން ކުޅިވަރުތަކާއި ޙަރަކާތްތައް ކުރިޔަށް ގެންދާއިރު ޞުލްޙަވެރިކަން އިސްކޮށް އިޖުތިމާޢީ ރީތި އަދަބުތައް ދެމެހެއްޓިގެން ދާނެ ގޮތަކަށް އެފަދަ ކަންކަން އިންތިޒާމު ކުރުމާއި އަޅުގަނޑުމެންގެ ތެރޭގައި އޮންނަ އެކުވެރިކަމާއި އެއްބައިވަންތަކަމާއި އެއްބައެއްވަންތަކަމުގެ ރޫހް އޭގެ އެންމެ ފުރިހަމަ ގޮތުގައި ކޮންމެ ޙަރަކާތެއްގެ ތެރެއިން ފެނިގެން ދިއުމަކީ ފުލުހުންގެ ވަރަށް ބޮޑު އެދުމެއް ކަމުގައިވެސް ހަމްދޫން ރަޝީދު ވިދާޅުވިއެވެ.
ރަމްޟާން މަހުގެ މަތިވެރި އަޅުކަމަށްފަހު ފިޠުރު ޢީދުގެ އުފާވެރި ޙަރަކާތްތައް ރާއްޖޭގެ އެކި ކަންކޮޅުތަކުގައި މިއަދު ހަވީރު 18:00 ން ފެށިގެން ކުރިޔަށް ދާނެއެވެ. އަދި ޢީދު ބަންދަށް ގިނަ ބަޔަކު މިހާރުވެސް ދަނީ ރާއްޖޭގެ އެކި ކަންކޮޅުތަކަށް ޢީދު ޗުއްޓީ ހޭދަކުރަން ދަތުރު ކުރައްވަމުންނެވެ.