ކުޑަކުދިންނަށް ޙަރަކާތްތެރިވެވޭނެ އުފާވެރި ތަނަކަށް ސަލްޓަން ޕާކް މިއަހަރުގެ ތެރޭގައި ވަރަށް އަވަހަށް ބަދަލުކުރައްވާނެކަމަށް ރައީސުލްޖުމްހޫރިއްޔާ ވިދާޅުވެއްޖެއެވެ. އެމަނިކުފާނު މިހެން ވިދާޅުވީ، ފިޠުރުޢީދުގެ މުނާސަބަތުގައި ކުޑަކުދިންނަށް ދެއްވި ޚާއްސަ މެސެޖުގައެވެ.
ފިޠުރުޢީދުގެ މުނާސަބަތުގައި ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ދިވެހި ޤައުމާ މުޚާޠަބު ކުރައްވައި ދެއްވި ޚިޠާބު ފަށްޓަވާފައިވަނީ ރަމަޟާން މަސް ވަކިވެގެންދާއިރު އަޅުގަނޑުމެންނަށް ލިބޭ އެންމެބޮޑު އުފަލަކީ، އަދި އެންމެބޮޑު ނިޢުމަތަކީ، މި މަތިވެރި މައްސަރުގެ ދަރުމައާއި ޘަވާބު ލިބޭނެކަމަށް އަދާކުރި އަޅުކަންކަމަށް ވިދާޅުވަމުންނެވެ. ރަމަޟާން މަހުގެ ދަރުމައާއި ޘަވާބަށް އެދި އަޅުގަނޑުމެން މި ރަމަޟާން މަސް ހޭދަކޮށް، އަދި މާދަމާ ފިޠުރުޢީދު ދުވަހު ބައްދަލުމިކުރަނީ، ޢީދުގެ ސަލާންތައް އަޅުގަނޑުމެންގެ އެކުވެރި، އުޚުއްވަތްތެރި ހުރިހާ ރައްޔިތުންނަށް ހުށަހަޅަމުންކަމަށް ރައީސްގެ މެސެޖުގައިވެއެވެ. މި މައްސަރުގެ ބަރަކާތާއެކީ އަޅުގަނޑުމެންގެ ޙަޔާތުގެ އާ ފެށުމަކަށް ފުރުޞަތު ލިބިގެންދިޔަކަން ފާހަގަކުރައްވާ ރައީސުލްޖުމްހޫރިއްޔާ ވަނީ މި ފެށޭ އަހަރަކީވެސް އަޅުގަނޑުމެންނަށް ސީދާ މަގުގައި ކުރިއަށް ދެވޭ އަހަރަކަށްވުމަށް އަޒުމްކަނަޑައެޅުމަށް ގޮވާލައްވާފައެވެ.
ރައީސްގެ ޚިޠާބުގައި ވަނީ ކުޑަކުދިންނަށް ޚާއްޞަ މެސެޖެއް ދެއްވާފައެވެ. ރައީސުލްޖުމްހޫރިއްޔާ ވިދާޅުވީ، ކުޑަކުދިންނަށް ޢީދުދުވަހު ހަދިޔާއެއްގެ ގޮތުގައި ސަލްޓަން ޕާކް އެކުދިންނަށް ބޭނުންކުރެވޭ، ފޫހިފިލާ ތަނަކަށް ހައްދަވައިދެއްވުމަށް އެމަނިކުފާނު ބޭނުންފުޅުވިކަމަށެވެ. ނަމަވެސް ޕާރކް ތަރައްޤީކުރުން ލަސްވެގެންދިއުމުން ޢީދުދުވަހަށް ކުޑަކުދިންނަށް ހަދިޔާއެއްގެ ގޮތުގައި ދެވޭގޮތްނުވީކަމަށް ވިދާޅުވިއެވެ. ނަމަވެސް ސަލްޓަން ޕާކަކީ، ކުޑަކުދިން، އެދޭގޮތަށް، ޙަރަކާތްތެރިވެވޭނެ އުފާވެރި ތަނަކަށް އެތަން މިއަހަރުގެ ތެރޭގައި ވަރަށް އަވަހަށް ބަދަލުވެގެންދާނެކަން ރައީސް ފާހަގަކުރެއްވިއެވެ. އެއަށްފަހު ރައީސްވަނީ ޒުވާނުންނަށް ޚާއްޞަ މެސެޖެއް ދެއްވާފައެވެ.
img:http://s4.psmnews.mv/images/660x400/14639330655091.jpg|ހުޅުމާލޭ ސެންޓްރަލް ޕާކް- ފޮޓޯ: ޕީއެސްއެމް
"ދިވެހި ހުރިހާ ޒުވާނުންނަށް ރައީސް ޔާމީން ދޭން ބޭނުންވާ މެސެޖަކީ، ތިޔަ ޒުވާނުންދެކެ ރައީސް ޔާމީނާއި، ސަރުކާރުގެ ހުރިހާ ވެރިން ވަރަށް ލޯބިވެޔޭ. ހުރިހާ މަންމައިންނާއި ބައްޕައިން ލޯބިވެޔޭ. އެހެންވީމާ، ޒުވާން ކުދިންގެ ޚިޔާލަށް ގެންނަންވީ، ހުރިހާ ގޯސް ކަންތައްތަކުން ދުރުހެލިވާން. ޒުވާން ކުދިންނަކީ ރަނގަޅު ތަޢުލީމެއް ހާސިލުކޮށްގެން މަސައްކަތްކުރާ ބަޔަކަށްވާން. ޒުވާން ކުދިންނަކީ ސިނގިރެޓް ނުބޯ ބަޔަކަށްވުން. އަދި އަމުދުން މަސްތުވާތަކެއްޗާ ދުރުގައި އުޅޭ ބަޔަކަށްވުން. ވިޔާނުދާ ކަންތައްތަކާ އަމުދުން ދުރުވުން. ޒުވާން ކުދިންގެ ޙަޔާތް އުފާވެރި ޙަޔާތަކަށް ބަދަލުވެއްޖެ ކަމަށްވަންޏާ، މުޅި ދިވެހިރާއްޖެއަކީ ވަރަށް އުފާވެރި ތަނަކަށް ބަދަލުވެގެންދާނެ. އެހެންވީމާ، މި ޢީދުދުވަހު ޢީދުގެ ސަލާން، ތިޔަ ހުރިހާ ކުދިންނަށް މި ފޮނުވަނީ، މިކަހަލަ އުފާވެރި އަދި މިކަހަލަ އެދެވޭ ޝުޢޫރުތަކަކާއެކީ. އަޅުކަމުގެ މައްސަރެއް ނިމިގެންދާއިރު، އަދި އަޅުކަމުގެ މަތީގައި އަޅުގަނޑުމެން ތިބޭއިރު، އަޅުގަނޑުމެން އިންސާނުން ދުނިޔެއަށް ފޮނުއްވީ އިންސާނިއްޔަތަށް ޚިދުމަތް ކުރަން. ދުނިޔެ އާރާސްތު ކުރަން. އަޅުގަނޑުމެން ކުރާ މަސައްކަތްތަކަކީ، ޤައުމުތަކުގެ ވެރިން ކުރާ މަސައްކަތްތަކަކީ، އެ ޤައުމުތަކުގެ ރައްޔިތުންނަށް އުފާވެރިކަން ގެނެސްދޭނެ، ބިނާކުރަނިވި، އާރާސްތުކުރަނިވި މަސައްކަތްތަކެއް. އަޅުގަނޑު މިކުރާ މަސައްކަތަކީ، އަޅުގަނޑާއި އަޅުގަނޑުގެ ސަރުކާރުން މިކުރާ މަސައްކަތަކީ، ރާއްޖޭގައި ހުރި ދަތިކަން ފިލުވޭނެ ގޮތްތަކަކަށް އަޅުގަނޑުމެންގެ މަޝްރޫޢުތައް ކުރިއަށް ގެންދިޔުން." ޒުވާނުންނާއި މުހާތަބްކުރައްވާ ރައީސް ޔާމީން ވިދާޅުވިއެވެ.
img:http://s2.psmnews.mv/images/660x400/14640160062659.jpg|ރައީސް ޔާމީން ހއ ހޯރަފުށީގައި / ފޮޓޯ: ރައީސް އޮފީސް
ރައީސް ވިދާޅުވީ އެމަނިކުފާނު ވެރިކަމަށް ވަޑައިގަތީ އެއްވެސްގޮތަކަށް، އަދި އެއްވެސް ސިޔާސީ ބޭފުޅަކާ ވާދަވެރިވާން އަދި ވާދަކުރަން ނޫންކަމަށް ވިދާޅުވެފައެވެ. އެމަނިކުފާނު ވެރިކަމަށް ވަޑައިގަތީ ރާއްޖޭގައި ހުރި ބޮޑެތި މައްސަލަތައް ޙައްލުކުރުމަށްކަން ފާހަގަކުރައްވާ ރައީސް ވަނީ އެ މައްސަލަތައް ތަފްޞީލްކޮށްދެއްވާފައެވެ.
"އޭގެތެރޭގައި، ޞިއްޙީ ދާއިރާގައި ހުރި މައްސަލަތައް ޙައްލުކުރުން. ޒުވާނުން މަސްތުވާތަކެއްޗަށް ގޮސް ޣަރަޤުވާ މައްސަލަ ޙައްލުކުރުން. ރާއްޖޭގެ އަމަންއަމާން ގެއްލިގެންދާ މައްސަލަ ޙައްލުކުރުން. މީހުންނަށް ރަޙުމްކުޑަ ޙަމަލާތައް ދެވޭ ޙަމަލާތައް ހުއްޓުވުން. އަދި ރާއްޖޭގައި އިސްލާމްދީން ނޫން އެހެން ދީނަކަށް ޖާގަނުދިނުން. ރާއްޖޭގެ އެކި ހިސާބަށް ބޭނުންވާ ތަރައްޤީގެ އެކި މަޝްރޫޢުތައް ފުޅާކުރަމުން ގެންދިޔުން. ރާއްޖޭގެ ބިން ފުރިފައިވާ ރަށްރަށުގެ ބިން ބޮޑުކޮށްދިނުން. ނަރުދަމާއާއި، ފެނުގެ ނިޒާމުތައް ޤާއިމްކޮށްދިނުން. ޞިއްޙީ ދާއިރާއަށް ބޭނުންވާ ކަންތައްތައް ރަނގަޅު ކޮށްދިނުން. ތަޢުލީމީ ދާއިރާއަށް ބޭނުންވާ ހުރިހާ މުދައްރިސުންނަކީ ޑިޕްލޯމާ ފެންވަރުގެ މުދައްރިސުންނަށް ހަދައިދިނުން. ކުރުގޮތަކަށް ދަންނަވާކަމަށްވަންޏާ، ރާއްޖޭގެ ރައްޔިތުންނަށް ބޭނުންވެފައި، ދަތިވެފައި މިހިރަ ހުރިހާ މައްސަލަތަކަށް ޙައްލުތަކެއް ހޯދައިދޭން." ރައީސް ޔާމީން ވިދާޅުވިއެވެ.
މި މަސައްކަތުގައި އެމަނިކުފާނުގެ ކެބިނެޓްގެ ހީވާގި މަސައްކަތް ރައީސް ފާހަގަކުރެއްވިއެވެ. އުނދަގޫތަކަކާއެކުވެސް ރައްޔިތުންނަށް ބޭނުންވާ ވަރަށްގިނަ ކަންތައްތަކެއް، ރާއްޖޭގެ ހުރިހާ ދިމާއެއްގައި ކުރެވެމުންދާކަން ރައީސުލްޖުމްހޫރިއްވާ ވަނީ ފާހަގަކުރައްވާފައެވެ.