ކިނޮޅަހު ގޮނޑުދޮށް ހިމާޔަތްކުރުމުގެ މަސައްކަތް ނިންމާލައިފި

ރ.ކޮނޮޅަހު ގޮނޑުދޮށް ޙިމާޔަތްކުރުމުގެ މަޝްރޫޢުގެ މަސައްކަތް ނިންމާލައިފިއެވެ. މި މަޝްރޫޢުގެ މަސައްކަތް ކުރިއަށްގެންދިޔައީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ، އެމްޓީސީސީއާ ހަވާލުކޮށްގެންނެވެ.

ކިނޮޅަހު ގޮނޑުދޮށް ހިމާޔަތްކުރުމުގެ މަސައްކަތް، އިމާރާތްކުރުމާ ބެހޭ ވުޒަރާއިން އެމްޓީސީސީއާއި ހަވާލުކޮށްގެން، ފެށީ 18 އޭޕްރިލް 2023ގައެވެ. ޢަމަލީ މަސައްކަތް ފެށީ އެ އަހަރުގެ އޮގަސްޓްމަހުއެވެ.

މި މަޝްރޫޢުގައި ކުރިއަށްގެންދިޔައީ އެރަށުން ގިރާފަވާ ސަރަޙައްދަށް 19،780 ކިއުބިކް މީޓަރުގެ ވެލި އެޅުމާއި 650 މީޓަރުގެ ތޮއްޓެއް ލުމުގެ މަސައްކަތެވެ. އެރަށުގެ ގޮނޑުދޮށް ޙިމާޔަތްކޮށްފައިވަނީ ޖިއޯ ބޭގް ޖަހައިގެންނެވެ.

ރ. ކިނޮޅަސް ގޮނޑުދޮށް ހިމާޔަތް ކުރުމުގެ މަޝްރޫޢުގެ މަސައްކަތް ނިމިއްޖެ. މި މަޝްރޫޢުގެ ދަށުން، 19,780 ކިއުބިކް މީޓަރުގެ ސަރަޙައްދެއްގެ ބިން ހިއްކުމާއި، 650 މީޓަރުގެ ސަރަޙައްދެއްގައި ޖިއޯބޭގް ރިވެޓްމެންޓް ޖެހުމުގެ މަސައްކަތް ހިމެނޭ. #MTCCProjects #RayyithungeKunfuni pic.twitter.com/w6nLk7ya3m

— MTCC Plc (@MTCCPlc) February 13, 2025

އާބާދީގައި 500އަށްވުރެ ގިނަ މީހުން ދިރިއުޅެމުންދާ ކިނޮޅަހަކީ ބަނދަރުގެ ދަތިކަމުގެ މައްސަލަވެސް އިންތިހާއަށް ކުރިމަތިވަމުން އައި ރަށެކެވެ. އެގޮތުން ނެރުމައްޗަށް ވެލި އަރައި، ބަނދަރު ތިލަވުމުގެ މައްސަލައަކީ އެރަށަށް ވަރަށް ބޮޑަށް ކުރިމަތިވަމުން އައި މައްސަލައެކެވެ. އެހެންކަމުން އެރަށުގެ ބަނދަރު މައްސަލަ ޙައްލުކޮށް، އެރަށުގައި އާ ބަނދަރެއް ތަރައްޤީކޮށް ބޭނުންކުރަން ފެށީ 2023ވަނަ އަހަރުއެވެ.

އެ މަޝްރޫޢު ކުރިއަށްގެންދިޔައީ ސަރުކާރުން 46.5 މިލިއަން ރުފިޔާ ޚަރަދުކޮށްގެންނެވެ. މި މަސައްކަތްވެސް ކުރިއަށްގެންދިޔައީ އެމްޓީސީސީންނެވެ.