ރައީސުލްޖުމްހޫރިއްޔާއަށް އިހަވަންދޫން ހޫނު މަރުޙަބާއެއް
-
ރަށުގެ މުއައްސަސާތަކުގެ އިސްވެރިންނާ ރައްޔިތުންނާ ބައްދަލުކުރައްވާނެ
-
މާރަންދޫއަކީ މިދަތުރުފުޅުގައި ރައީސް ވަޑައިގެންނެވި 7 ވަނަ ރަށް
ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ތިލަދުއްމަތީ އުތުރުބުރީގެ އިހަވަންދޫއަށް ވަޑައިގަންނަވައިފިއެވެ.
ރައީސުލްޖުމްހޫރިއްޔާ އިހަވަންދޫއަށް ވަޑައިގަތުމުން، އެރަށުން ވަނީ އެމަނިކުފާނަށް ހޫނު މަރުޙަބާއެއް ދަންނަވާފައެވެ. އެގޮތުން ރަށުގެ ގިނަބަޔަކުވަނީ އެމަނިކުފާނަށް މަރުހަބާ ދެންނެވުމަށް ބަނދަރު ސަރަހައްދަށް އެއްވެފައެވެ.
މި ދަތުރުފުޅުގެ ތެރެއިން، އެ ރަށުގެ ފިޝަރީޒް ކޮމްޕެލެކްސްގެ ބިންގާ އެޅުމަށް ވަނީ ހަމަޖަހިފައެވެ. އަދި އެރަށުގައ އައިޑީ ކާޑު ޕްރިންޓު ކުރުމުގެ ޚިދުމަތް ފެށުމާއި، ޕާސްޕޯޓު ޚިދުމަތް ފެށުމަށްވެސް ވަނީ ހަމަޖެހިފައެވެ. މީގެ އިތުރުން މޯލްޑިވްސް އިސްލާމިކް ބޭންކުގެ އޭޓިއެމްއެއް އެ ރަށުގައި ޤާއިމްކުރުމަށް އެ ރަށު ކައުންސިލާއެކު އެއްބަސްވުމުގައި ސޮއިކުރަން ވަނީ ހަމަޖެހިފައެވެ.
މީގެ އިތުރުން، އިހަވަންދޫއަށް ކުރައްވާ މި ދަތުރުފުޅުގެ ތެރެއިން ރައީސުލްޖުމްހޫރިއްޔާ އެ ރަށުގެ ފުޓްސަލް ދަނޑާއި، ވޮލީ ކޯޓު ހުޅުއްވައި ދެއްވުމަށްވެސް ހަމަޖެހިފައެވެ.
ރައީސުލްޖުމްހޫރިއްޔާގެ މި ދަތުރުފުޅުގައި އިހަވަންދޫ ކައުންސިލާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީއާއި، ރަށުގެ މުއައްސަސާތަކުގެ އިސްވެރިންނާ ބައްދަލުކުރައްވައި، އެރަށުގެ ތަރައްޤީއަށް ބޭނުންވާ ކަންކަމާއި، ރައްޔިތުން އެންމެ އެދޭކަންކަމާ ގުޅޭގޮތުން މަޝްވަރާކުރައްވާނެއެވެ. މީގެއިތުރުން، ރައްޔިތުންނާ ބައްދަލުކުރައްވައި، އެ ރައްޔިތުންގެ ހާލު ބައްލަވާނެއެވެ.
އިހަވަންދޫއަކީ ހއ. އަތޮޅަށް އެމަނިކުފާނު ފައްޓަވާފައިވާ ދަތުރުފުޅުގެ ތެރެއިން ވަޑައިގެންނެވި 7 ވަނަ ރަށެވެ. ތިން ދުވަހުގެ މުއްދަތަށް ހއ. އަތޮޅަށް ރައީސުލްޖުމްހޫރިއްޔާ ކުރައްވާ މި ދަތުރުފުޅުގައި އެއަތޮޅުގެ 10 ރަށަކަށް ވަޑައިގެންނެވުމަށް ހަމަޖެހިފައިވާއިރު، މިދަތުރުފުޅުގައި ރައީސުލްޖުމްހޫރިއްޔާގެ އަރިހުގައި ބައެއް ވަޒީރުންނާއި ސަރުކާރުގެ ބައެއް މުއައްސަސާތަކުގެ އިސްވެރިން ބައިވެރިވެވަޑައިގަންނަވައެވެ.