ޔޫރަޕުގެ އެންމެ ޝަރަފުވެރި މުބާރާތް ކަމަށްވާ ޗެމްޕިއަންސް ލީގު ފުޓްބޯޅަ މުބާރާތް ކާމިޔާބު ކުރަން ބަލާއިރު ޖަރުމަނުގެ ބުންޑަސް ލީގާ މިހާރަށްވުރެ ފެންވަރު ރަނގަޅުވާން ޖެހޭ ކަމަށް ބަޔާން މިއުނިކްގެ ހޯޝުއާ ކިމިޗް ބުނެފި އެވެ.
ބަޔާންގައި މިވަގުތު ހުރި ޖަރުމަނުގެ ގައުމީ ޓީމަށް ކުޅޭ އެންމެ ތަޖުރިބާކާރު ކުޅުންތެރިޔާ މިހެން ބުނީ ޗެމްޕިއަންސް ލީގުގެ ގަދަ އަށަކަށް ޖަރުމަނުގެ އެންމެ ޓީމެއް ދަތުރުކުރާނެ ކަމަށް ބެލެވިފައިވަނިކޮށެވެ. އެއީ އެންމެ ފަހުގެ ޗެމްޕިއަން ބަޔާ ލެވަކޫސަން އެވެ.
ޗެމްޕިއަންސް ލީގުގެ ގްރޫޕް ސްޓޭޖުގައި ބާކީ އެންމެ މެޗެއް އޮތްއިރު ޖަރުމަނުން ވާދަކުރާ ބަޔާން މިއުނިކާއި ބޮރޫޝިޔާ ޑޯޓްމުންޑަށް ގަދަ އަށަކަށް ދެވޭނެ ކަމުގެ ޔަގީންކަން ކުޑަ އެވެ. ލެވަކޫސަން އޮތީ 13 ޕޮއިންޓާއެކު އަށް ވަނާގަ އެވެ. ޑޯޓްމުންޑް އޮތީ 12 ޕޮއިންޓާއެކު 14 ވަނާގަ އެވެ. ބަޔާން 15 ވަނާގަ އެވެ.
ޓޭބަލުގެ އެއްވަނާގައިވަނީ އިނގިރޭސި ވިލާތުގެ ލިވަޕޫލެވެ. ގަދަ އަށެއްގައި މިވަގުތު ތިބި ޓީމުތަކަށް ބަލާއިރު އިނގިރޭސިވިލާތުން ތިބީ ލިވަޕޫލާއި އާސެނަލް އެވެ. ސްޕޭނުން ބާސެލޯނާ އާއި އެތްލެޓިކޯ މެޑްރިޑެވެ. އިޓަލީން އިންޓަ މިލާނާއި އެޓްލާންޓާ އާއި އޭސީ މިލާނެވެ.
ކިމިޗް ބުނީ ޖަރުމަނުގެ ޓީމުތަކުން ޗެމްޕިއަންސް ލީގުގައި މިހާ ބޮޑަށް ފަހަތަށް ވެއްޓެންޖެހޭ މައިގަނޑު ސަބަބަކީ ލީގުގެ ވަރުގަދަކަން ކުޑަވުން ކަމަށެވެ. މިހެންވެ މިއީ ފެޑަރޭޝަނާއި ކުލަބުތަކުން ވެސް ވިސްނަންޖެހޭ ކަމެއް ކަމަށެވެ.
ޖަރުމަނުގެ ޓީމުތަކުގެ ތެރެއިން ޗެމްޕިއަންސް ލީގުގައި އެންމެ ވިދުން ގަދަ ޓީމަކީ އެ ގައުމުގެ އެންމެ ކާމިޔާބު ކުލަބު ކަމަށްވާ ބަޔާން މިއުނިކެވެ. އެ ކުލަބުން ވަނީ ހަ ފަހަރު ތަށި ހޯދައިފަ އެވެ. ބޮރޫޝިޔާ ޑޯޓްމުންޑަކީ އެންމެ ފަހުގެ މުބާރާތުގެ ފައިނަލް ކުޅުނު ޓީމެވެ. ނަމަވެސް ބުންޑަސް ލީގާގެ ނަތީޖާތައް ދަށްވެ އަންނަ ސީޒަނުގެ ޗެމްޕިއަންސް ލީގުން ފުރުސަތު ލިބުން އެ ޓީމަށް ދުރެވެ.