މޯލްޑިވްސް އިންފްލައިޓް ކޭޓަރިންގެ އިސް މުވައްޒަފުންނަށް ޚާއްސަ ތަމްރީން ޕްރޮގްރާމެއް

މޯލްޑިވްސް އިންފްލައިޓް ކޭޓަރިންގ އިން އެކުންފުނީގެ ދަށުން ހިންގާ ހުޅުލޭ އައިލޭންޑް ހޮޓަލް އަދި މަޑިފުށި ޕްރައިވެޓް އައިލޭންޑް މެނޭޖްމެންޓް މުވައްވަޒަފުންނަށް ހާއްސަ ތަމްރީނެއް ފަށައިފިއެވެ.

މި ޕްރޮގްރާމަކީ އެކުންފުނީގެ ދަށުން ހިންގަމުންދާ މި ދެ ތަނުގެ މުވައްޒަފުންގެ ގުޅުން ބަދަހިކޮށް، މަސައްކަތުގެ މާޙައުލުގައި ދިމާވާ މައްސަލަތައް ހައްލުކުރުމާއިއެކު
މުވައްޒަފުންނަށް ފަހި މާހައުލެއް ޤާއިމުކުރުމުގެ މަޤްޞަދުގައި ކުރިއަށް ގެންދާ ޕްރޮގްރާމެކެވެ. މި ޕްރޮގްރާމުގައި މެނޭޖްމެންޓު ލެވަލްގެ 26 މުވައްޒަފުން ބައިވެރިވެއެވެ. އެގޮތުން މީގެ ފުރަތަމަ ސެޝަން މިހާރު ބާއްވާފައިވާއިރު ދެވަނަ ސެޝަން އޮންނާނީ އަންނަ ހަފްތާގައެވެ.

އެމްއޭސީއެލް އަދި އެސްއޭޓީ ޕްރައިވެޓް ލިމިޓެޑު ގުޅިގެން އުފައްދާފައިވާ، މޯލްޑިވްސް އިންފްލައިޓް ކޭޓަރިންގެ މި ޕްރޮގްރާމް ފެށުމުގެ ރަސްމީއްޔާތު ޝަރަފުވެރިކޮށްދެއްވީ، އެކުންފުނި އަދި މޯލްޑިވްސް އެއަޕޯޓްސް ކޮމްޕެނީ ލިމިޓެޑްގެ މެނޭޖިންގް ޑިރެކްޓަރ އިބްރާޙިމް ޝަރީފް މުހައްމަދެވެ. މި ޕްރޮގްރާމް ފެށުމުގެ ރަސްމީއްޔާތުގައި ވާހަކަ ދައްކަވަކަމުން، ޝަރީފް ވަނީ މުވައްޒަފުންނާއި ގުޅޭ މާހައުލެއް ޤާއިމްކުރުމުގެ މުހިންމުކަން ފާހަގަކުރައްވާފައެވެ.

ޝަރީފް ވިދާޅުވީ، މުވައްޒަފުންގެ މެދުގައި ގުޅުންތައް ބަދަހިވެ، އަދި މަސައްކަތުގެ މާހައުލުގައި ކުރިމަތިވާ ނުތަނަވަސްކަން ފިލުވުމަކީ މިފަދަ ޕްރޮގްރާމެއްގެ އެންމެ މުހިންމު އެއް ބޭނުން ކަމަށެވެ.

މި ޕްރޮގްރާމާއި ގުޅޭގޮތުން އެކުންފުނީގެ ކޯޕަރޭޓް އެޗްއާރް މެނޭޖަރ ފާތިމަތު ލައުޝާ ވިދާޅުވީ، ކުންފުނީގެ އިސްކޮށް ހަރަކާތްތެރިވާ މުވައްޒަފުންނަށް މިފަދަ ހުނަރުތައް ދަސްކޮށްދިނުމުން މުޅި ކުންފުނީގެ ހުރިހާ މުވައްޒަފުންނަށްވެސް އޭގެ ރަނގަޅު އަސަރުކުރާނެ ކަމަށް ޤަބޫލުކުރައްވާ ކަމަށެވެ. އަދި މިއީ ކަންކަން ނިންމުމުގައި ވިސްނުންތެރިކަމާއެކު މަސައްކަތް ކުރުމަށް ކުންފުނީގެ އިސް މުވައްޒަފުންނަށް ލިބިގެންދާނެ މުހިންމު ފިލާވަޅުތަކެއް ކަމަށް އޭނާ ވިދާޅުވިއެވެ.

"މައިޑްފުލް ލީޑާސް"ގެ ނަމުގައި ހުޅުލޭ އައިލޭންޑް ހޮޓަލުގައި ކުރިއަށްދިޔަ މި ޕްރޮގްރާމުގެ ފުރަތަމަ ސެޝަނުގައި ބައިވެރިންނަށް، ގިނަކަންތަތަކެއް ވަނީ ކިޔައިދީފައެވެ. އެގޮތުން އިދާރީގޮތުން އަންނަ ބަދަލުތަކައް ހޭނުމާއި، މަސައްކަތުގެ މާހައުލުގައި އުފެއްދުންތެރިކަން އިތުރުކުރުމަށް ކުރެވިދާނެކަންކަން ވަނީ ދަސްކޮށްދީފައެވެ. އެކުންފުނިން ވަނީ ތަމްރީނުގެ ސަބަބުން މުވައްޒަފުންނަށް، މަސައްކަތުގެ މާހައުލުގެ މައްސަލަތައް ހައްލުކުރުމުގެ ހުނަރުތައް ދަސްވެގެންދާނެ ކަމަށް ވިދާޅުވެފައެވެ.