ހަތަރު ވަޒީރުންނަށް ރުހުން ދިނުމަށް މަޖިލީހުން ފާސްކޮށްފި

ރައީސުލްޖުމްހޫރިއްޔާ ބައެއް ވުޒާރާތަކަށް ގެންނެވި ބަދަލުތަކާއެކު އަލުން ޢައްޔަންކުރެއްވި ހަތަރު ވަޒީރުންނަށް ރުހުން ދިނުމަށް ރައްޔިތުންގެ މަޖިލީހުން ފާސްކުރައްވައިފިއެވެ.

ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، ވަޒީރުންގެ މަޖިލީހަށް ބަދަލުތަކެއް ގެންނަވައި ވަޒީރުންނަށް ރުހުން ހޯއްދެވުމަށް ރައްޔިތުންގެ މަޖިލީހަށް ފޮނުއްވެވީ މިދިޔަ ޑިސެމްބަރު މަހުގެ 26 ވަނަ ދުވަހުއެވެ. އަދި އެ މައްސަލަ ދިރާސާކުރެއްވީ ރައްޔިތުންގެ މަޖިލީހުގެ ސަރުކާރުގެ މަސްއޫލިއްޔަތު އަދާކުރާ ކޮމިޓީންނެވެ. އެ ކޮމިޓީން ނިންމެވީ ހަތަރު ވަޒީރުންނަށްވެސް ރުހުން ދެއްވުމަށެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ވުޒާރާތަކަށް ބަދަލު ގެންނަވައި ވަޒީރުން ޢައްޔަން ކުރެއްވީ ޑިސެމްބަރު މަހުގެ 26 ވަނަ ދުވަހުއެވެ. އެގޮތުން، މާލީކަންކަމާއި ތަރައްޤީގެ ރޭވުންތެރިކަމާބެހޭ ވަޒީރުކަމަށް ޢައްޔަންކުރެއްވީ މޫސާ ޒަމީރެވެ. އިމާރާތްކުރުމާއި ގެދޮރުވެރިކަމާއި ބިނާރާ ބެހޭ ވަޒީރުކަމަށް ޢައްޔަންކުރެއްވީ ޑރ. ޢަބްދުﷲ މުއްޠަލިބެވެ. މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާ ބެހޭ ވަޒީރުކަމަށް ޢައްޔަންކުރެއްވީ ޑރ. ޢަލީ ޙައިދަރު އަޙްމަދެވެ. އަދި ދަނޑުވެރިކަމާއި ދިރޭތަކެއްޗާ ބެހޭ ވަޒީރުކަމަށް ޢައްޔަންކުރެއްވީ ޑރ. މަރްޔަމް މާރިޔާއެވެ.

މި ހަތަރު ވަޒީރުންނަށް ރުހުން ދެއްވާފައިވަނީ ދައުރުން ބޭރުން ބޭއްވި ދެވަނަ ޖަލްސާގައެވެ. އެ ވަޒީރުންނަށް ރުހުން ދިނުމަށް ވޯޓަށް އަހާފައިވަނީ ވަކިވަކިންނެވެ. އެގޮތުން، މާލީކަންކަމާއި ތަރައްޤީގެ ރޭވުންތެރިކަމާބެހޭ ވަޒީރުކަމަށް މޫސާ ޒަމީރު ޢައްޔަންކުރެއްވުމަށް ރުހުން ދީފައިވަނީ ވޯޓުގައި ބައިވެރިވެވަޑައިގެންނެވި 69 މެންބަރުންގެ ވޯޓުންނެވެ. އަދި އިމާރާތްކުރުމާއި ގެދޮރުވެރިކަމާއި ބިނާރާ ބެހޭ ވަޒީރުކަމަށް ޑރ. ޢަބްދުﷲ މުއްޠަލިބް އައްޔަންކުރެއްވުމަށް ފެންނަކަމަށް ފާސްވީ 70 މެންބަރުންގެ ވޯޓުންނެވެ. މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާ ބެހޭ ވަޒީރުކަމަށް ޑރ. ޢަލީ ޙައިދަރު އަޙްމަދަށް ރުހުންދިނުމަށް ފާސްވީ 63 މެންބަރުންގެ ވޯޓުންނެވެ. އަދި ދަނޑުވެރިކަމާއި ދިރޭތަކެއްޗާ ބެހޭ ވުޒާރާއަށް ޑރ. މަރްޔަމް މާރިޔާއަށް ރުހުންދިނުމަށް ފާސްވީ 70 މެންބަރުންގެ ވޯޓުންނެވެ.

ވަޒީރުންގެ މަޖިލީހަށް ރައީސުލްޖުމްހޫރިއްޔާ އައްޔަން ކުރައްވާ ބޭފުޅުންނަށް ޤާނޫނީ ބާރުވެރިކަން ލިބިވަޑައިގަންނަވާނީ އެ މަގާމުތަކަށް އައްޔަން ކުރެއްވުމަށްފަހު މަޖިލީހުގެ ރުހުން ލިބިވަޑައިގެންނެވެ.

ހަތަރު ވަޒީރުންނަށް ރުހުން ދިނުމަށް ފޮނުއްވާފައިވާ މައްސަލަ ދިރާސާކުރެއްވި ކޮމިޓީންވެސްވަނީ އަލުން ޢައްޔަންކުރި ނަމަވެސް އެ 4 ވަޒީރުންނަކީވެސް މަޖިލީހުގެ ރުހުން ލިބިވަޑައިގެން ކުރިން ދައުލަތުގެ ވުޒާރާތަކަށް ޢައްޔަންކުރައްވައި މެދުކެނޑުމެއްނެތި ޚިދުމަތް ކުރައްވަމުންގެންދަވާ ވަޒީރުން ކަމަށްވާތީ އެއީ އެ މަގާމުތަކަށް އެންމެ ގާބިލު ބޭފުޅުންކަމަށް ކަނޑައަޅުއްވާފައެވެ. އަދި ކުރިން އެ މަޤާމުތައް އަދާ ކުރެއްވިއިރުވެސް ދައުލަތުގެ އިދާރާތަކުން ލިބިފައިވާ މައުލޫމާތުތަކުން އެއްވެސް ވަޒީރެއްގެ މައްސަލައެއް ނެތްކަން ހާމަވާ ކަމަށްވެސް ކޮމިޓީގެ ރިޕޯޓުގައިވެއެވެ.