ރާއްޖެ ޕްރޮމޯޓު ކުރަން ތަފާތު ކެމްޕެއިނެއް، ޖަރުމަނުގެ ޓެކްސީތަކުން ރާއްޖޭގެ ރީތިކަން ދައްކާލަނީ

ރާއްޖޭގެ މަންޒަރުތައް ޖަރުމަންވިލާތުގެ ޓެކްސީތަކުގެ ބޭރުން ފެންނާނެ ބޮޑު ކެމްޕެއިނެއް ފެށުމަށް، މޯލްޑިވްސް މާކެޓިންގް ޕަބްލިކް ރިލޭޝަންސް ކޯޕަރޭޝަން، އެމްއެމްޕީއާރްސީއިން ވިދާޅުވެއްޖެއެވެ. އެކުންފުނިން މި ކެމްޕެއިން ހިންގަނީ ޖަރުމަންވިލާތުގައި ބާއްވާ އައިޓީބީ ފެއަރއާއި ދިމާކޮށެވެ.

މި ޕްރޮމޯޝަނުގައި ޖަރުމަންވިލާތުގެ ވެރިރަށް ބާލިންގައި ދުއްވާ، 200 ޓެކްސީއެއްގެ ބޭރުން ރާއްޖޭގެ ޤުދުރަތީ ރީތި މަންޒަރު ފެންނަ ގޮތްދަހާނެއެވެ. މި ކެމްޕެއިންގައި ޖަރުމަން މާކެޓުގައި ރާއްޖެއަކީ ޕްރިމިއާ ޓްރެވަލް މަންޒިލެއްގެ ގޮތުގައި ފެނިގެންދާނެ އެވެ. އެމްއެމްޕީއާރްސީން ވިދާޅުވީ، މިއީ މިގޮތަށް ކުރިއަށް ގެންދެވޭ މިފަދަ އެންމެ ބޮޑު އެއް އިނީޝިއޭޓިވް ކަމަށެވެ.

މި ޓެކްސީ ކެމްޕެއިން ކުރިއަށްގެންދާނީ، ފެބްރުއަރީ މަހުގެ 7 ވަނަ ދުވަހުން ފެށިގެން މާރިޗު މަހުގެ 13 ވަނަ ދުވަހުގެ ނިޔަލަށް 5 ހަފްތާއަށެވެ. މި ދުވަސްތައް ދިމާވަނީ، ބާލިން އިންޓަނޭޝަނަލް ފިލްމް ފެސްޓިވަލްއާއި ދުނިޔޭގެ މަޝްހޫރު ޓްރެވަލް ޓްރޭޑް ޝޯވ ކަމަށްވާ އައިޓީބީ ބާލިންއާއެވެ. މި ހަރަކާތްތަކުގައި 600،000 ވުރެ ގިނަ މީހުން ބައިވެރިވުމަށް ޖަރުމަންވިލާތުގެ ބާލިންއަށް ދަތުރުކުރާނެ ކަމަށް އެމްއެމްޕީއާރްސީން ވިދާޅުވެއެވެ.

ވިޒިޓް މޯލްޑިވްސްގެ ބްރޭންޑްގެ 200 ޓެކްސީގައި ރާއްޖޭގެ ރީތި އަދި ޝައުގުވެރި މެސެޖްތަކެއް ހިމެނޭއިރު، ބާލިންގެ އެންމެ ފާހަގަކޮށްލެވޭ ސަރަހައްދުތަކުގައި ރާއްޖެ ޕްރޮމޯޓް ކުރެވިގެންދާނެއެވެ. އަދި ޓެކްސީތަކުގެ އިތުރުން މި ކެމްޕޭންގައި ބާލިނޭލްގައި ފާހަގަކޮށްލެވޭ ބިލްބޯޑްތަކެއް ހިމެނޭއިރު، މި ބޮޑު ސަގާފީ އިވެންޓަށް ފިލްމްތަކަށް ލޯބިކުރާ ފަރާތްތަކަށާއި ބައިނަލްއަގްވާމީ ޒިޔާރަތްތެރިންނަށް އަމާޒުކޮށްފައިވެއެވެ.

މި ކެމްޕެއިންގެ އިތުރަށް، އައިޓީބީ ބާލިންގައި އެކިއެކި ހަރަކާތްތަކުގެ ތެރެއިން، އެމްއެމްޕީއާރުސީއިން ޓްރެވަލް ޓްރޭޑާއި މީޑިއާއާ ގުޅިގެން މަސައްކަތް ކުރާނެ އެވެ. މީގެ ތެރޭގައި ސިނާއަތާ ގުޅޭ މައުޟޫއުތަކުގައި ސެމިނާތަކާއި ޕެނަލް ޑިސްކަޝަންތަކުގެ އިތުރުން މީޑިއާ އާއި ނޫސްވެރިންނަށް ހާއްސަ އިވެންޓެއް ކަމަށްވާ އައިއެމްއެމް ޖަރުމަނުގައި ބައިވެރިވުން ހިމެނެ އެވެ.

އައިޓީބީ ބާލިންގައި ނެޓްވޯކިން ހަވީރެއް ބޭއްވުމުގެ ޕްލޭންތައް ކުރިއަށްދާއިރު، އެންމެންވެސް އިންތިޒާރުކުރާ މޯލްޑިވިއަން ނައިޓް ވަނީ އޭޕްރީލް މަހުގެ ފަހުކޮޅު ދުބާއީގައި ބާއްވާ އަރަބިއަން ޓްރެވަލް މާކެޓް (އޭޓީއެމް) 2025 އަށް ބަދަލުކޮށްފަ އެވެ.

ޖަރުމަންވިލާތުގައި ރާއްޖޭގެ ފަތުރުވެރިކަން ޕްރޮމޯޓު ކުރުމަށް މަސައްކަތް ކުރަމުންދާއިރު، އެ ޤައުމުން މިއަހަރު މިހާތަނަށް، 7313 ފަތުރުވެރިން އައިސްފައެވެ. އެ ޤައުމަކީ މިދިޔަ އަހަރު 4 ވަނައަށް ރާއްޖެއަށް އެންމެ ގިނަ ފަތުރުވެރިން އައި މާކެޓެވެ.