ރާއްޖޭގެ ތާރީޙުގައިވެސް ދިރާސާތަކަށް ނުދެވޭ އަހަންމިއްޔަތުކަން މި ސަރުކާރުން ދަނީ ދެމުން: ވަޒީރު ނާޡިމް

ދިވެހިރާއްޖޭގެ ތާރީޙުގައިވެސް ޢިލްމީ ދިރާސާތަކަށް މީގެކުރިން ނުދޭ އަހަންމިއްޔަތުކަން މި ސަރުކާރުން ދެމުންދާކަމަށް ޞިއްޙަތާއި ބެހޭ ވަޒީރު ޢަބްދުﷲ ނާޡިމް އިބްރާހީމް ވިދާޅުވެއްޖެއެވެ. ވަޒީރު މިހެން ވިދާޅުވީ "މޯލްޑިވްސް ހެލްތު ރީސާރޗް ބުލެޓިން ވޮލިއުމް 10" އިފްތިތާހުކޮށްދެއްވާ ވާހަކަފުޅު ދައްކަވަމުންނެވެ.

ޞިއްޙަތާއި ބެހޭ ވަޒީރު ޢަބްދުﷲ ނާޡިމް އިބްރާހީމް ވިދާޅުވީ، ދިރާސާއަކީ ހަމައެކަނި ޢިލްމީ މަސައްކަތެއް ނޫންކަމަށާއި އެއީ މުޖްތަމަޢުތައް ބާރުވެރިކޮށް، މުޖްތަމަޢު ބިނާކޮށްދޭ އެންމެ ވަރުގަދަ ނިޒާމުކަމަށެވެ. އަދި މުޖްތަމަޢުގައި ހުރި މައްސަލަތައް ދެނެގަނެ އެ މައްސަލަތަކުގެ އަލީގައި ކުރިއަށް ދާންވީ މަގު ދައްކައިދެނީ ދިރާސާތަކުންކަމަށް ވަޒީރު ވިދާޅުވިއެވެ.

ވަޒީރު ނާޡިމް ވިދާޅުވީ، ހެދޭ ދިރާސާތަކުގެ އަލީގައި ފިޔަވަޅުތައް އެޅުމަކީ ނުވަތަ މުހިންމު ނިންމުންތައް ނިންމުމަކީ އެންމެ ޒިންމާދާރުގޮތްކަމަށެވެ. އަދި އެއީ މީހުންގެ ދިރުއުޅުމުގެ ކަންކަމާއި އަދި މީހުންގެ ފުރާނައާއި ގުޅިލާމެހިފައިވާ ކަންކަމަށްވާތީކަމަށެވެ. އެހެންކަމުން ޞިއްޙީ ދާއިރާގެ ކަންކަން ނިންމުމުގައި ޢިލްމީގޮތުން ހެދޭ ދިރާސާތަކަށް ރިޢާޔަތްކުރައްވާނެކަމަށް ވަޒީރު ވިދާޅުވިއެވެ.

ޞިއްޙީ ދާއިރާގެ ފަންނުވެރިންނާއި، ޞިއްޙީ ޚިދުމަތް ފޯރުކޮށްދޭ މުއައްސަސާތަކަށް ބޭނުންވާ ދިރާސާވެރިންގެ ހޯދުންތައް އާންމުކޮށް ޝާއިޢުކުރުމާއި އަދި ޚާއްސަކޮށް ބޭނުންވާ ހިނދެއްގައި އަތް ފޯރާ ހިސާބެއްގައި ހުރުމަކީ މުހިންމު ކަމެއްކަމަށް ވަޒީރު ވިދާޅުވިއެވެ.

ދިރާސާކުރުމުގެ ދާއިރާއަށް އަލިއަޅުއްވައިލައްވާ ވަޒީރު ވިދާޅުވީ ރާއްޖޭގައި ވަރަށް ގިނަ ކަންކަން ރަނގަޅުވެ ކުރިއަރާއި ދިޔުމަށް މަގު ހުޅުވެފައި އޮތް ފަދައިން ދިރާސާގެ ދާއިރާއަކީވެސް ރާއްޖޭގައި އިތުރަށް ތަރައްޤީކުރަން ޖެހޭ ދާއިރާއެއްކަމަށެވެ. އެގޮތުން ތަޢުލީމު ފޯރުކޮށްދޭ މުއައްސަސާތަކުން ރަސްމީ ސިފައެއްގައި މިކަން ކުރަމުންދާއިރު އާންމު ފަރުދުންގެ ލެވެލްގައިވެސް ދިރާސާތަކަށް އިސްކަންދެވިގެންދާތަން ފެންނަމުންދާކަމަށް ވަޒީރު ވިދާޅުވިއެވެ.

"އަޅުގަނޑުގެ އެދުމަކީ ކުރިއަށް އޮތްތަނުގައި ޞިއްޙީ ދާއިރާގެ ގިނަ ރިސާރޗްތަކެއް އުފަންވެގެން އައުން. އެކަމަށްޓަކައި ހެލްތު މިނިސްޓްރީން ކުރަން ހުރި ކަންކަން ކުރިއަށް ގެންދިއުގައި ހުރި ކަންކަން ކުރާނެ. އަދި މި ރިސާރޗްތައް ޕްރެޒެންޓޭޝަންގެ ސިފައިފައި ހުށަހެޅި މަޝްވަރާ ކުރެވޭނެ ޕްލެޓްފޯމެއް މިނިސްޓްރީގެ ތެރޭގައި ޤާއިމްވެގެން ދިޔުމަށް އެދޭވާހަކަ ދަންނަވަން." ވަޒީރު ވިދާޅުވިއެވެ.

ޞިއްޙަތާއި ބެހޭ ވަޒީރު ޢަބްދުﷲ ނާޡިމް އިބްރާހީމް ވިދާޅުވީ، ރާއްޖޭގެ ތާރީޚުގައި މީގެ ކުރިން ދިރާސާތަކަށް ނުދެވޭ ސަމާލުކަން މި ސަރުކާރުން ދެމުންގެންދާކަމެވެ. އެގޮތުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ރިޔާސީ ވަޢުދުފުޅާ އެއްގޮތަށް ދިރާސާތަކަށް ޚާއްސަ ގްރާންޓް ފަންޑެއް މިހާރު އުފައްދަވާފައިވާކަން ވަޒީރު ފާހަގަކުރެއްވިއެވެ.

ވަޒީރު ވަނީ މި ގްރާންޓްގެ ބޭނުން ހިފައި ޞިއްޙީ ދާއިރާއިން ދިރާސާ ހަދަން ބޭނުންވާ ފަރާތްތަކާއި އެކަމަށް ޝައުގުވެރިކަން ހުރި ފަރާތްތަކުން އެ ދާއިރާގައި ހަދާ އެކި ދިރާސާތަކުގައި ބައިވެރިވުމަށް އިލްތިމާސްކުރައްވާފައެވެ.

"މޯލްޑިވްސް ހެލްތު ރިސާރޗް ބުލެޓިން" ޝާއިރުކުރުމުގެ މައިގަނޑު މަޤްސަދަކީ ރާއްޖޭގެ ހެދޭ ޞިއްޙީ ދާއިރާއާ ގުޅުންހުރި ދިރާސާތަކުން ހޯދުނު މަޢުލޫމާތުތައް ފަސޭހަކަމާއެކު ފޯރުކޮށްދިނުންކަމަށް ޞިއްޙަތާއި ބެހޭ ވުޒާރާއިން ވިދާޅުވެއެވެ.

މިއަހަރު އާންމުކުރި ރިސާރޗް ބުލެޓިންގައި ރާއްޖޭގައި ހަދާފައިވާ ޞިއްޙީ ދިރާސާތަކުގެ 7 އެބްސްޓްރެކްޓެއް ވަނީ ހިމަނާފައެވެ. މީގެ ތެރޭގައި މައިންނާއި ކުޑަކުދިންގެ ޞިއްޙަތު، ގައިންގަޔަށް އަރާ ބަލިތައް ކޮންޓްރޯލްކުރުން، ނަފްސާނީ ޞިއްޙަތު، އަދި ތިމާވެށި ދެމެހެއްޓެނިވި ގޮތެއްގައި ބޭނުންކުރުމާއި އާންމު ޞިއްޙަތާ ގުޅުން ހުރި މަޢުލޫމާތު ހިމަނާފައިވެއެވެ.

މީގެ އިތުރުން، ނެޝަނަލް ހެލްތު ރިސާރޗް ކައުންސިލާއި ގުޅުން ހުރި މައުލޫމާތާއި ޞިއްޙީ ދިރާސާކުރުމުށް ހުއްދަ ދިނުމުގެ މަރުހަލާތަކާއި 2022-2025 އަށް ރާއްޖޭގައި ޞިއްޙީ ދިރާސާކުރުމަށް އެންމެ އިސްކަންދެވޭ ދާއިރާތައްވެސް މި ބުލެޓިންގައި ވަނީ ހިމަނާފައެވެ.