ފްލެޓް ލިސްޓުގެ ޞައްޙަކަން ކަށަވަރުކުރުމަށް ވެރިފައިކުރުމުގެ މަސައްކަތް މިދަނީކުރަމުން: ވަޒީރު ޑރ.މުއްޠަލިބް

ގެދޮރުވެރިޔާ ސްކީމްގެ ދަށުން ފޯމު ހުށައެޅި ފަރާތްތަކުގެ އިތުރު އިވެލުއޭޝަނެއް ހެދުމުގެ ބަދަލުގައި ލިސްޓުގައި ހިމެނޭ ފަރާތްތަކުގެ މަޢުލޫމާތުގެ ސައްޙަކަން ކަށަވަރުކުރުމުގެ މަސައްކަތް ކުރުމަށް ނިންމާފައިވާކަމަށް އިމަރާތްކުރުމާއި ގެދޮރުވެރިކަމާއި ބިނާރާބެހޭ ވަޒީރު ޑރ.ޢަބްދުﷲ މުއްޠަލިބު ވިދާޅުވެއްޖެއެވެ.

ވަޒީރު ވިދާޅުވީ މިގޮތަށް ޢަމަލުކުރުމަށް ނިންމީ ގިނަ ރައްޔިތުންތަކެއްގެ ކަންބޮޑުވުން ހުރުމާއެކު ފްލެޓް ލިސްޓު ވީހާވެސް އަވަހަށް އާއްމުކުރުމަށްކަމަށެވެ.

ނިމިދިޔަ ދައުރުގެ ތެރޭގައި ޢިއުލާންކޮށްފައިވާ ގެދޮރުވެރިޔާ މަޝްރޫޢުގެ ދަށުން ދޫކުރުމަށް ހަމަޖެހިފައިވާ 4000 ފްލެޓު ލިބޭ މީހުންގެ ލިސްޓާއި ގުޅޭގޮތުން ބޭއްވި ނޫސްވެރިންގެ ބައްދަލުވުމުގައި ވާހަކަފުޅުދައްކަވަމުން ގެދޮރުވެރިކަމާއި ބިނާރާބެހޭ ވަޒީރު ޑރ. ޢަބްދުﷲ މުއްޠަލިބު ވިދާޅުވީ، ރައީސުލްޖުމްހޫރިއްޔާ ދެއްވާފައިވާ އިރުޝާދުފުޅާއެކު އަންނަ ރަމަޟާން މަހުގެ ކުރިއަށް ލިސްޓު ޢާއްމުކުރުމުގެ މަސައްކަތް ކުރަމުންދާނެކަމަށެވެ.

މިކަން އަވަސްކުރުމަށް ސަރުކާރުން މިހާރު ނިންމާފައިވަނީ ފްލެޓަށް އެދި ހުށައަޅާފައިވާ ފޯމްލަފައިވާ ހުރިހާ ފަރާތްތައް އަލުން އިވެލުއޭޓްކުރުމުގެ ބަދަލުގައި 15 ނޮވެމްބަރު 2023 ގައި ގެޒެޓްކުރެވިފައިވާ ފަރާތްތަކުގެ ލިސްޓުގެ ވެރިފިކޭޝަން ޕްރޮސެސްއެއް ކުރިއަށްގެންދިޔުމަށެވެ.

މިވެރިފިކޭޝަން ޕްރޮސެސް ކުރިއަށްގެންދާއިރު ބަލާނީ 26 ޖޫން 2022 ހުގައި ގެޒެޓްކޮށްފައިވާ ގެދޮރުވެރިޔާ ސްކީމްގެ ދަށުން ފްލެޓް ދޫކުރާ އުސޫލުގެ ދަށުން އަދި ފޯމު ހުށައެޅުމަށް އެކުލަވާލާފައިވާ، ގެދޮރުވެރިން ޕޯޓަލްގައި އިރުޝާދު ދީފައިވާ ގޮތަށްކަމަށް ވަޒީރު ވިދާޅުވިއެވެ.

ވަޒީރު ވިދާޅުވީ، މިސްކީމްގެ ދަށުން ގެދޮރުވެރިން ޕޯޓަލްގައި ފޯމު ހުށައެޅުމުގައި މާލޭގައި ދިރިއުޅޭތާ 15 އަހަރު ވެފައިވާކަން ސާބިތުކުރުމަށްޓަކައި ހުށައެޅިދާނެކަމަށް ބަޔާންކޮށްފައިވާ ލިޔުންތައްކަށް ވެރިފައި ކުރުމުގައި ބަލާނެކަމަށެވެ. އެގޮތުން 6 ބާވަތެއްގެ ލިޔެކިޔުން ހުށައެޅުމަށް ފުރުސަތު އޮތްނަމަވެސް، ގިނަ ފަރާތްތަކަކުން އެލިޔެކިޔުންތަކުގެ ބޭރުން އިތުރު ލިޔުންތައް ހުށައަޅާފައިވާކަން ވަޒީރު ފާހަގަކުރެއްވިއެވެ.

ހަމައެއާއެކު މާލޭގައި އުޅޭތާ 15 އަހަރު ވީކަން ބެލުމުގައި އެއްވެސް ކަހަލަ މެދުކެނޑުމެއް އައިސްފައިވާނަމަ، އެއީ ފްލެޓު ލިބޭ މީހުންގެ ޙައްގުތައް ގެއްލޭނެކަމެއްކަމަށްވާތީ، ލިސްޓް ވެރިފައި ކުރުމުގައި މެދުކެނޑުމެއްކަމަށް ބަލާނީ، އަހަރެއްގެ މުއްދަތަށް އެކި ސަބަބުތަކާއި ލައިގެން މާލެއިން ބޭރުގައި ދިރުޅެފައިވާ ފަރާތެއްކަމުގައިވާނަމަކަމަށް ވަޒީރު ވިދާޅުވެއެވެ.

ގެދޮރުވެރިޔާ ސްކީމްގެ ދަށުން ދޫކޮށްފައިވާ ފެލެޓު ލިސްޓު ޢާއްމުކުރުމަށް ސަރުކާރުން މިވީ 1 އަހަރުގެ ތެރޭގައިވަނީ މަސައްކަތްކުރައްވާފައެވެ. ނަމަވެސް މިކަން ދިގުލައިގެންދާތީވެ، މިއީ ގިނަ ބައެއްގެ ކަންބޮޑުވުމާއި ގުޅިފައިވާކަމެއްކަމަށްވާތީ އިމާރާތްކުރުމާއި ގެދޮރުވެރިކަމާއި ބިނާރާއި ބެހޭވަޒީރު ޑރ. ޢަބްދުﷲ މުއްޠަލިބުވަނީ ރައްޔިތުންގެ ކިބައިން މަޢާފަށް އެދިވަޑައިގަންނަވާފައެވެ.