ބްރޯޑްކާސްޓިން ކޮމިޝަނާއި އިލެކްޝަންސް ކޮމިޝަނަށް މެންބަރުން އައްޔަންކުރުން ބުރާސްފަތި ދުވަހު

ބްރޯޑްކާސްޓިން ކޮމިޝަނާއި އިލެކްޝަންސް ކޮމިޝަނުން ހުސްވެފައިވާ މަގާމުތަކަށް މެންބަރުން އައްޔަންކުރުމަށް އަންނަ ބުރާސްފަތި ދުވަހު ދައުރުން ބޭރުން ޖަލްސާއެއް ބާއްވަން ތާވަލުކޮށްފިއެވެ.

ރައްޔިތުންގެ މަޖިލީހުގެ އިދާރާއިން ނެރެފައިވާ ތާވަލުގައިވާގޮތުން މި ޖަލްސާގައި މަޖިލީހުގެ ރައީސްގެ މޭޒުން ހުށަހަޅުއްވާ 3 ކަމަކާއި ދެ ކޮމިޓީ ރިޕޯޓު ހުށަހެޅުއްވުމުގެ އިތުރުން މަސައްކަތް ނިމިފައިވާ ކަންކަމުގައި ވޯޓަށް އެހުން އޮންނާނެއެވެ.

މަޖިލީހުގައި ނުނިމި ހުރި މަސައްކަތްތައް ނިންމުމަށް މި މަހުގެ ތެރޭގައި ދައުރުން ބޭރުން ދެ ޖަލްސާ ބާއްވަން ނިންމާފައިވާ ކަމަށް ރައްޔިތުންގެ މަޖިލީހުގެ މެޖޯރިޓީ ލީޑަރު އަދި އިނގުރައިދޫ ދާއިރާގެ މެންބަރު އިބްރާހިމް ފަލާހުވެސް ވަނީ ވިދާޅުވެފައެވެ. މި ޖަލްސާ ބާއްވަން ނިންމާފައިވަނީ މި މަހުގެ 16 އަދި 20ގައި ކަމަށާއި ޖަލްސާތައް ބާއްވަނީ މިނިވަން މުއައްސަސާތަކަށް މެންބަރުން އައްޔަން ކުރުމުގެ މަސައްކަތް ކުރުމަށްކަމަށް ފަލާހްވަނީ ވިދާޅުވެފައެވެ.

މަޖިލީހުން ނެރުއްވި ތާވަލުގައި ވާގޮތުން ބުރާސްފަތި ދުވަހު ބާއްވާ ޖަލްސާއަށް ރައީސުލްޖުމްހޫރިއްޔާ ފޮނުއްވާފައިވާ 3 މައްސަލައެއް ހުށަހަޅުއްވާނެއެވެ. އެއީ ހިއުމަން ރައިޓްސް ކޮމިޝަން އޮފް ދަ މޯލްޑިވްސް، އެޗްއާރުސީއެމަށް ނައިބު ރައީސެއް އައްޔަން ކުރެއްވުމަށް ފޮނުއްވާފައިވާ މައްސަލައާއި މިފަހުން އެމަނިކުފާނު އައްޔަން ކުރެއްވި ހަތަރު ވަޒީރުންނަށް ރުހުން ހޯދުމުގެ މައްސަލައާއި އެންޓި-ކޮރަޕްޝަން ކޮމިޝަން، އޭސީސީއަށް ދެ މެންބަރަކު އައްޔަން ކުރެއްވުމަށް ހުށަހަޅުއްވާފައިވާ މައްސަލައެވެ.

ވަޒީރުންގެ މަޖިލީހަށް ގެންނެވި ބަދަލުތަކާއެކު ރައީސުލްޖުމްހޫރިއްޔާ ވަނީ މިނިސްޓަރ އޮފް ފިނޭންސް އެންޑް ޕްލޭނިންގ ކަމަށް، މޫސާ ޒަމީރު ހަމަޖައްސަވައި މިނިސްޓަރ އޮފް ހަޔަރ އެޑިޔުކޭޝަން، ލޭބަރ އެންޑް ސްކިލްސް ޑިވެލޮޕްމަންޓް ކަމަށް، ޑރ. ޢަލީ ޙައިދަރު އަޙްމަދު އާއި މިނިސްޓަރ އޮފް އެގްރިކަލްޗަރ އެންޑް އެނިމަލް ވެލްފެއަރ ކަމަށް، ޑރ. މަރްޔަމް މާރިޔާ އަދި މިނިސްޓަރ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރ ކަމަށް، ޑރ. ޢަބްދުﷲ މުއްޠަލިބް އައްޔަން ކުރައްވާފައެވެ. ވަޒީރުން އައްޔަން ކުރެއްވި ނަމަވެސް ޤާނޫނީ ބާރުވެރިކަމެއް އެ ވަޒީރުންނަށް ލިބޭނީ މަޖިލީހުން ރުހުން ލިބިގެންނެވެ.

މި މައްސަލަތައް ހުށަހެޅުއްވުމުގެ އިތުރުން މި ޖަލްސާގައި ބްރޯޑްކާސްޓިން ކޮމިޝަނާއި އިލެކްޝަންސް ކޮމިޝަނުގެ ހުސްވެފައިވާ މަގާމުތަކަށް މެންބަރުން އައްޔަން ކުރެއްވުމަށް ރައީސުލްޖުމްހޫރިއްޔާ ހުށަހަޅުއްވާފައިވާ މައްސަލަތައް މިނިވަން މުއައްސަސާތަކުގެ ކޮމިޓީން ނިންމިގޮތުގެ ރިޕޯޓް ތަޅުމަށް ހުށަހަޅާނެއެވެ. އެ ރިޕޯޓުތަކަށް ބަހުސްކޮށް ނިމިއްޖެނަމަ އެ ޖަލްސާގައި ވޯޓަށް އެހުންވެސް އޮންނާނެއެވެ.

މަޖިލީހުގެ ދައުރުން ބޭރުން ދެ ޖަލްސާ ބޭއްވުމަށް ނިންމާފައިވާއިރު މިއަހަރަށް މަޖިލިސް ރަސްމީކޮށް ހުޅުވާ ޖަލްސާ ބޭއްވުމަށް ނިންމާފައިވަނީ އަންނަ މަހުގެ 6ގައެވެ. ޕީއެސްއެމް ނިއުސްއަށް މަޢުލޫމާތު ދެއްވަމުން ރައްޔިތުންގެ މަޖިލީހުން ވިދާޅުވީ މިއަހަރަށް މަޖިލިސް ހުޅުވުމަށްޓަކައި ވާންޖެހޭ ތައްޔާރީތައް މިހާރު ވަމުންދާކަމަށެވެ. މި ޖަލްސާގައި ރައީސުލްޖުމްހޫރިއްޔާ ރިޔާސީ ބަޔާން އިއްވަވާނެއެވެ.