މިދިޔަ އަހަރު ހިންގި އޮޕަރޭޝަންތަކުގައި 15،000 އަށްވުރެ ގިނަ އުޅަނދު ޓޯކުރި

މިދިޔަ އަހަރު ދިވެހި ފުލުހުންގެ ޚިދުމަތުން ހިންގި އޮޕަރޭޝަންތަކުގައި 15،000 އަށްވުރެ ގިނަ އުޅަނދު ޓޯކޮށްފައިވާ ކަމަށް ތަފާސްހިސާބުތަކުން ދައްކައިފިއެވެ.

ފުލުހުން ވަނީ އެ ޚިދުމަތުން ޓްރެފިކާ ގުޅިގެން މިދިޔަ އަހަރު ކޮށްފައިވާ މަސައްކަތްތަކުގެ ތަފާސްހިސާބުތައް އާންމުކުރައްވާފައެވެ.

މި ނިމުނު 2024ވަނަ އަހަރު ދިވެހި ފުލުހުންގެ ޚިދުމަތުން ވަނީ މަގުމަތީގެ ރައްކާތެރިކަން ކަށަވަރުކުރުމުގެ ގޮތުން ތަފާތު އޮޕަރޭޝަންތައް ހިންގަވާފައެވެ. އެގޮތުން ހިންގެވި ޓޯ އޮޕަރޭޝަންތަކުގައި ޖުމްލަ 15،514 އުޅަނދު ޓޯ ކޮށްފައިވާ ކަމަށް ފުލުހުން ވިދާޅުވެއެވެ. މީގެ ތެރޭގައި 11،645 ސައިކަލާއި، 2،567 ކާރާއި 478 ޕިކަޕާއި 369 ވޭން އަދި 87 ޓްރަކު ހިމެނެއެވެ.

ފުލުހުން ވިދާޅުވީ މިދިޔަ އަހަރު ޓޯ ކުރި އުޅަނދުތަކުގެ ތެރެއިން 546 އުޅަނދެއް ނައްތާލާފައިވާކަމަށެވެ އަދި 13،562 އުޅަނދު ވެރިފަރާތާ ހަވާލުކޮށްފައިވާކަމަށެވެ.

މިދިޔަ އަހަރު މަގުތަކުގައި ފުލުހުން ހިންގެވި އޮޕަރޭޝަންތަކުގައި ޖުމްލަ 73،953 އުޅަނދެއް ވަނީ ޗެކްކޮށްފައެވެ. މި އުޅަނދުތަކުގެ ތެރެއިން، 7،606 އުޅަނދަކާމެދު ފިޔަވަޅު އަޅާފައިވާކަމަށް ޓްރެފިކް އަދި ޓޯވިންގ ތަފާސްހިސާބުން ދައްކައެވެ.

އުޅަނދުތައް ހުއްޓުވައި، 66،347 މީހަކަށް ނަސޭހަތް ދީފައިވާއިރު، 7،606 މީހަކަށް ޓްރެފިކް ވަޔަލޭޝަން ސްލިޕް ދޫކޮށްފައިވާ ކަމަށް ފުލުހުން ވިދާޅުވެއެވެ. އަދި މި އޮޕަރޭޝަންތަކުގައި ލައިސަންސް ނެތި ދުއްވި 2،138 މީހަކު ފާހަގަކުރެވުނު ކަމަށާއި މީގެ ތެރޭގައި ދެފުރޮޅުލީ 2،005 އުޅަނދާއި ހަތަރު ފުރޮޅުލީ 133 އުޅަނދު ހިމެނޭ ކަމަށް ފުލުހުން ވިދާޅުވެއެވެ.

މީގެ އިތުރުން ނުރައްކާތެރިކޮށް ދުއްވުމުގެ 293 މައްސަލަ މިދިޔަ އަހަރު ފާހަގަކުރެވިފައިވާ ކަމަށް ފުލުހުން ވިދާޅުވެއެވެ. އޭގެތެރޭގައި ދެފުރޮޅުލީ 271 އުޅަނދާއި ހަތަރު ފުރޮޅުލީ 22 އުޅަނދު ދުއްވުމުގެ މައްސަލަތައް ހިމެނެއެވެ.

ފުލުހުން ވިދާޅުވީ މަގުމަތީގެ ނުރައްކާތެރި އެކްސިޑެންޓުތައް ހިނގުމަކީ އެ ޚިދުމަތުން ނުހަނު ކަންބޮޑުވާ ކަމެއް ކަމަށާއި އެކްސިޑެންޓުތައް މަދުކުރުމަށް ގިނަ ވަސީލަތްތަކެއް ބޭނުންކޮށްގެން ހަރުދަނާ މަސައްކަތްތަކެއް ފާއިތުވި އަހަރު ކޮށްފައިވާ ކަމަށެވެ. އެގޮތުން ފުރާނައަށް ނުރައްކާވާފަދަ އެކްސިޑެންޓުތައް މަދުކުރުމަށް އެކަމަށް ވަކިން ޚާއްސަކޮށް މަސައްކަތްތަކެއް ކޮށްފައިވާ ކަމަށް ވިދާޅުވިއެވެ.

ދިވެހި ފުލުހުންގެ ޚިދުމަތުގެ އަމާޒަކީ މަގުމަތީގެ ސަލާމަތާއި ރައްކާތެރިކަމަށް އާންމުންގެ ހޭލުންތެރިކަން އިތުރުވެ، ޓްރެފިކް ގަވާއިދުތަކަށް ހުރުމަތްތެރިކޮށް ހިތާ ރައްޔިތަކު އުފެދިގެން ދިއުންކަން ފުލުހުން ފާހަގަކުރައްވައެވެ. އަދި މަގުމަތީގެ ރައްކާތެރިކަން ކަށަވަރުކުރުމަށް އާންމުންގެ އެއްބާރުލުން ވަރަށް މުހިންމު ކަމަށްވެސް ވިދާޅުވެއެވެ.