ރޯގާއެއް ފެތުރިގެން ޗައިނާގައި އެމެޖެންސީ ހާލަތު އިޢުލާނެއް ނުކުރޭ: އެޗްޕީއޭ

ޗައިނާއިން ފެންނަމުންދަނީ މޫސުމީ ރޯގާއެއް ކަމަށާއި، އެކަމާއި ގުޅިގެން އެޤައުމުގައި އެމެޖެންސީ ހާލަތެއް އިއުލާންކޮށްފައި ނުވާކަމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ވިދާޅުވެއްޖެއެވެ.

އެއިދާރާއިން މިހެން ވިދާޅުވެފައިވަނީ މިދުވަސްވަރު ޗައިނާގައި ނޭވަލާ ނިޒާމުގެ ބަލިތައް އާދަޔާ ޚިލާފަށް އިތުރުވެ، އިމަރޖެންސީ ހާލަތު އިއުލާނުކޮށްފައިވާ ކަމަށް ފެތުރެމުންދާ ޚަބަރުތަކާއި ގުޅިގެން ނެރުނު ބަޔާނެއްގައެވެ.

އެޗްޕީއޭއިން ވިދާޅުވީ، ދުނިޔޭގެ ސިއްޙަތު ޖަމީއްޔާ މެދުވެރިކޮށް ޗައިނާގެ ބަލިތަކާއި ބެހޭ އިދާރާ، ސީ.ޑީ.ސީއާއި ހަވާލާ ދެއްވާ އެޗްޕީއޭއިން ވިދާޅުވީ، އެ ޤައުމުގެ އެކި ހިސާބުތަކުގައި ނޮވެމްބަރމަހުގެ 2 ވަނަ ހަފްތާއިން ފެށިގެން ފެންނަމުންދާ ނޭވާލާ ނިޒާމުގެ ބަލިތައް އިތުރުވެފައިވާކަމަށެވެ. ނަމަވެސް، މިދިޔަ އަހަރާއި އަޅާ ބަލާއިރު ޗައިނާގައި މި މޫސުމުގައި ނޭވާލާ ނިޒާމުގެ ބަލިތައް ފެންނަ މިންވަރާއި، ބަލީގައި ބޮޑުވަރުވާ މީހުންގެ ނިސްބަތް މަދު ކަމަށް ތަފާސްހިސާބުތަކުން ފާހަގަކުރެވޭ ކަމަށް އެޗްޕީއޭއިން ވިދާޅުވެއެވެ.

އެޗްޕީއޭއިން ވިދާޅުވީ، ފިނިމޫސުމާއި ދިމާކޮށް އާންމުގޮތެއްގައިވެސް ޗައިނާ ހިމެނޭހެން އެހެން ޤައުމުތަކުގައި ނޭވާލާ ނިޒާމުގެ ބަލިތައް އިތުރުވާ ކަމަށެވެ. މިއަހަރުގެ ހާލަތާއި ގުޅިގެން އެ ޤައުމުގައި އެމެޖެންސީއެއް އިއުލާންކޮށްފައި ނުވާ ކަމަށް އެޗްޕީއޭއިން ވިދާޅުވިއެވެ.

އެޗްޕީއޭއިން ވިދާޅުވީ މި ދުވަސްވަރު އެންމެ ގިނައިން ޗައިނާއިން ފެންނަމުންދަނީ އިންފްލުއެންޒާ ކަމަށެވެ. އަދި މި ނޫންވެސް ނޭވާލާ ނިޒާމުގެ އެހެން ބަލިތައް ފެތުރެމުންދާ ކަމަށް ދުނިޔޭގެ ސިއްޙަތު ޖަމިއްޔާއާއި ހަވާލާދީ އެޗްޕީއޭއިން ވިދާޅުވެއެވެ. މިއާއެކު އެ ޤައުމުގެ ހާލަތު މޮނީޓަރ ކުރަމުންދާކަމަށް އެޗްޕީއޭއިން ވިދާޅުވިއެވެ.

މި ދުވަސްވަރަކީ، ގިނަ އަދަދެއްގެ ބަޔަކު އުމްރާއާއި އެހެން ދަތުރުތަކުން ރާއްޖެ އަންނަމުންދާ ދުވަސްވަރެއްކަން ފާހަގަކޮށް އެޗްޕީއޭއިން ވިދާޅުވީ، ނޭވާލާ ނިޒާމުގެ ބަލިތައް މިދުވަސްވަރު ރާއްޖޭގައިވެސް އިތުރުވެދާނެކަމަށް ލަފާ ކުރެވޭކަމަށެވެ. މިހެންކަމުން އެޗްޕީއޭއިން ވަނީ ނޭވާލާ ނިޒާމުގެ އެއްވެސް ބައްޔެއްގެ އަލާމާތެއް ފެންނަ ނަމަ ސިއްޙީ އެހީތެރިކަން ހޯދުމަށް އިލްތިމާސްކޮށްފައެވެ.

އެގޮތުން ހުމާއި ރޯގާއާއި އަދި ކެއްސުން ފަދަ ކަމެއް މެދުވެރިވާނަމަ، ޑޮކްޓަރުންގެ އެހީތެރިކަން ހޯދުމަށް އެޗްޕީއޭއިން އިރުޝާދުދެއްވާއެވެ. މީގެ އިތުރުންވެސް ނޭވާހިއްލުންފަދަ ނޭވާލާ ނިޒާމުގެ ބަލި ހުންނަ މީހުން، ދިފާއީ ބާރު ބަލިކަށި މީހުން، އުމުރުން ދުވަސްވީ މީހުން، ކުޑަކުދިން، މާބަނޑު މީހުން މިފަދަ އެއްވެސް އަލާމާތެއް ކުރިމަތިވާނަމަ ސިއްޙީ އެހީތެރިކަން ހޯދުމަށްވެސް ވަނީ އެޗްޕީއޭއިން އިރުޝާދު ދެއްވާފައެވެ.