ބަންގްލަދޭޝްގައި ޑޮކްޓަރުކަން ކިޔެވުމަށް 7 ސްކޮލަރޝިޕް ފުރުޞަތު

ބަންގްލަދޭޝްގައި ޑޮކްޓަރުކަން ކިޔެވުމަށް 7 ސްކޮލަރޝިޕްޕަކަށް އެދުމުގެ ފުރުޞަތު މަތީ ތަޢުލީމާއި މަސައްކަތްކުރުމާއި ހުނަރުތައް ތަރައްޤީކުރުމާ ބެހޭ ވުޒާރާއިން ހުޅުވާލައިފިއެވެ.

މަތީ ތަޢުލީމާ ބެހޭ ވުޒާރާއިން ވިދާޅުވީ، މި ސްކޮލަރޝިޕްތަކުގައި ކިޔެވޭނީ ބަންގްލަދޭޝްގެ ޔުނިވަރސިޓީތަކުން ކަމަށެވެ. މިއީ ސާކްގެ ޤައުމުތަކަށް ހުޅުވާލި ސްކޮލަޝިޕް ޕްރޮގްރާމެއްގެ ތެރެއިން ރާއްޖެއަށް ހޯދައިދީފައިވާ ފުރުޞަތުތަކެއްކަމަށް މަތީ ތަޢުލީމާ ބެހޭ ވުޒާރާއިން ވިދާޅުވެއެވެ.

މި ސްކޯލާޝިޕްގެ ދަށުން ބެޗްލަރސް ޑިގްރީއަށް ޑޮކްޓަރުކަން ކިޔެވުމުގެ 7 ފުރުޞަތެއް ދިނުމަށް ވަނީ ހަމަޖެހިފައެވެ. އޭގެ ތެރޭގައި އެމްބީބީއެސްގެ ބެޗްލަރސް ޑިގްރީގެ 6 ފުރުޞަތަކާއި، ބީޑީއެސްގެ ބެޗްލަރސް ޑިގްރީގެ 1 ފުރުޞަތު ހިމެނެއެވެ.

މި ސްކޯލާޝިޕަށް ކުރިމަތިލާ ފަރާތްތަކުން މޯލްޑިވްސް މެޑިކަލް އެންޑް ޑެންޓަލް ކައުންސިލް އިން ކަނޑައަޅުއްވާފައިވާ ޝަރުތުތައް ފުރިހަމަވެ، އެދޭ ކޯހާއި ގުޅޭގޮތުން ބަންގްލަދޭޝް މެޑިކަލް އެންޑް ޑެންޓަލް ކައުންސިލްގެ ވެބްސައިޓްގައި ނުވަތަ ކޯސް ހިންގާ ޔުނިވަރސިޓީން އިތުރު ޝަރުތެއް ކަނޑައަޅާފައިވާނަމަ އެޝަރުތުތައްވެސް ފުރިހަމަވާންޖެހޭނެއެވެ.

މަތީ ތަޢުލީމާބެހޭ ވުޒާރާއިން ވިދާޅުވީ މި ސްކޮލަރޝިޕަށް އެޕްލައިކުރާ ފަރާތްތަކުން ގެ ތެރެއިން ޝަރުތު ހަމަވާ ހުރިހާ ކެންޑިޑޭޓުން ނޮމިނޭޓް ކުރެވޭނެކަމަށެވެ.

އެއަށްފަހު ސްކޮލަރޝިޕަށް ހޮވޭ ދަރިވަރުން ކަނޑައަޅާނީ ބަންގްލަދޭޝް ހެލްތް ޕްރޮޓެކްޝަން އިންސް ޓިޓިއުޓް، (ބީއެޗްޕީއައި) ގެ ފަރާތުންނެވެ. މި ސްކީމްގެ ދަށުން ކޯސް ފުރިހަމަކުރެވޭނެ ޔުނިވަރސިޓީތަކާއި ކޮލެޖްތަކުގެ މަޢުލޫމާތު މިނިސްޓްރީގެ ވެބްސައިޓުން ލިބެން ހުންނާނެކަމަށް މަތީ ތަޢުލީމާބެހޭ ވުޒާރާއިން ވިދާޅުވިއެވެ.

ސްކޮލަރޝިޕަށް އެދި މަތީ ތަޢުލީމާބެހޭ ވުޒާރާގެ މައި އެޑިޔު ޕޯޓަލް މެދުވެރިކޮށް ހުށައެޅޭނެއެވެ. ހުށައެޅުންތައް ބަލައިގަތުމުގެ ސުންގަޑިއަކީ މިމަހުގެ 14 ވާ އަންގާރަ ދުވަހުގެ 12:00 ސުންމިނެޓެވެ.