ޤާނޫނު އަސާސީއަށް ގެންނެވި އިސްލާހުތަކަކީ މުސްތަޤުބަލަށް މުހިންމު އިސްލާހުތަކެއް: މަޖިލިސް ރައީސް

ވިހިވަނަ ރައްޔިތުންގެ މަޖިލީހުގައި ޤާނޫނު އަސާސީއަށް ގެންނެވި އިސްލާހުތަކަކީ ޤައުމުގެ މުސްތަޤުބަލަށް މުހިންމު އިސްލާހުތަކެއް ކަމަށް ރައްޔިތުންގެ މަޖިލީހުގެ ރައީސް ޢަބްދުއްރަޙީމް ޢަބްދުﷲ ވިދާޅުވެއްޖެއެވެ. އެމަނިކުފާނު މިހެން ވިދާޅުވީ ފާއިތުވެދިޔަ އަހަރު ރައްޔިތުންގެ މަޖިލީހުގައި ކުރެވުނު މަސައްކަތްތަކާ ގުޅޭގޮތުން މައުލޫމާތު ދެއްވަމުންނެވެ.

ޕީއެސްއެމް ނިއުސްގެ ރާއްޖެމިއަދު ޕްރޮޮގްރާމުގައި ރައްޔިތުންގެ މަޖިލީހުގެ ރައީސް ޢަބްދުއްރަޙީމް ޢަބްދުﷲ ވިދާޅުވީ، 2024 ވަނަ އަހަރުގެ މެއި މަހުގެ 28 ވަނަ ދުވަހު މަޖިލީހުގެ އައު ދައުރުގެ މަސައްކަތްތައް ފެށިގެން އައިއިރު އެންމެ ޚާއްސަ މަސައްކަތެއްގެ ގޮތުގައި ކުރެވިފައިވަނީ ޤާނޫނު އަސާސީއަށް ގެނައި އިސްލާހުތަކުގެ މަސައްކަތް ކަމަށެވެ. މިއީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިސްނަންގަވައިގެން ސަރުކާރުގެ ފަރާތުން ހުށަހެޅުއްވި އިސްލާހުތަކެއް ކަމަށާއި އެ އިސްލާހުތަކުގެ މުހިންމުކަން މެންބަރުންވެސް ޤަބޫލުކުރައްވާ ކަމަށެވެ.

ވާދަވެރި ފަރާތްތަކުން އެ އިސްލާހުތަކަށް ފާޑުކިޔާކަން ފާހަގަކުރައްވައި ޢަބްދުއްރަޙީމް ވިދާޅުވީ، ޤާނޫނު އަސާސީއަށް ގެންނެވި ހުރިހާ އިސްލާހުތަކަކީ ރާއްޖޭގެ މުސްތަޤުބަލަށް ވިސްނައިގެން ގެންނެވި މުހިންމު އިސްލާހުތަކެއް ކަމަށެވެ.

"ޤާނޫނުތަކާއި ގަވާއިދުތަކަށް އިސްލާހުގެންނަންވާނީ ނުވަތަ ޤާނޫނުތަކަށް ގަވާއިދުތައް ހަދަންވާނީ ހަމައެކަނި އެވަގުތަށް ވިސްނައިގެން ކަމަކަށް އަޅުގަނޑުމެންނަށް ގަބޫލެއް ނުކުރެވޭ. ކުރިއަށް އޮތް މުސަތަގުބަލަށް ވިސްނައިގެން އަޅުގަނޑުމެން ގަވާއިދު ނަހަދާކަމަށްވަންޏާ އޭގެ ހަގީގީ ފައިދާއެއް ރައްޔިތުންނަށް ނުކުރާނެ. އެހެންވީމަ އަޅުގަނޑުމެން މިގެނައި އިސްލާހުގެ ސަބަބުން ރައްޔިތުންނަށް ވަރަށްބޮޑު ޔަގީންކަމެއް އެބަލިބޭ ދިވެހިރާއްޖޭގެ ސަރަހައްދަކާ އެހާ ފަސޭހައިން ނުކުޅެވޭނެކަން." މަޖިލީހުގެ ރައީސް ޢަބްދުއްރަޙީމް ޢަބްދުﷲ ވިދާޅުވިއެވެ.

ޢަބްދުއްރަޙީމް ޢަބްދުﷲ ވިދާޅުވީ އިދިކޮޅުން އެންމެ ބޮޑަށް ފާޑުކިޔަނީ މެންބަރުންނާ ގުޅޭގޮތުން ޤާނޫނު އަސާސީއަށް ގެންނެވި އިސްލާހަށް ކަމަށެވެ. ނަމަވެސް އެ އިސްލާހާއި ޤާނޫނު އަސާސީއަށް ގެންނެވި އެހެނިހެން އިސްލާހުތަކުންވެސް ރައްޔިތުން އިތުރަށް ބާރުވެރިކުރެވިފައިވާކަމަށް އެމަނިކުފާނު ވިދާޅުވިއެވެ.

"ރައްޔިތުން ބާރުވެރިވަނީ ރައްޔިތުން އިންތިޚާބުކޮށް ފޮނުވާ މެންބަރު، އެ މެންބަރަށް ފެންނަ ވަގުތަކު ޕާޓީ ބަދަލުކުރިޔަސް މެންބަރުކަމުގައި ހުރެވުނީމަތޯ. މިއަދު އެއްޕާޓީގައި މާދަމާ އަނެއް ޕާޓީގައި ހުރެގެންވެސް ގޮނޑީގަ އިނދެގެން ދައުރު ރައްޔިތުންގެ ބަހެއް ނެތި ނިންމާލެވުން އެއީތޯ ރައްޔިތުންގެ ބާރު ގަދަވުމަކީ،" ރައްޔިތުންގެ މަޖިލީހުގެ ރައީސް ވިދާޅުވިއެވެ.

ސަރުކާރުގެ ފަރާތުން ޤާނޫނު އަސާސީއަށް ގެންނެވި އިސްލާހުތަކުގެ ތެރޭގައި ރާއްޖޭގެ ސަރަހައްދަށް ބަދަލު ގެންނަ ނަމަ މަޖިލީހުގެ މެންބަރުންގެ 4 ބައިކުޅަ 3 ބައި މެންބަރުންގެ ރުހުން ހޯދައި ރައްޔިތުންގެ ފެންނަ ނުފެންނަ ވޯޓެއް ނަގަން ޖެހޭ ގޮތަށް ގެނައި އިސްލާހު ހިމެނެއެވެ. އަދި ބޭރުގެ އެންމެ ސިފައިންގެ މީހަކަށްވެސް ރާއްޖޭގައި އޮޕަރޭޓް ކުރެވޭނީ މަޖިލީހުގެ އަޣުލަބިއްޔަތުން ފާސްކޮށްގެން ކަމަށްވެސް ޤާނޫނު އަސާސީއަށް ގެނައި އިސްލާހުގައި ވަނީ ބަޔާންކޮށްފައެވެ.

ރައްޔިތުންގެ ފެންނަ ނުފެންނަ ވޯޓު ނެގުމުގެ މާއްދާއަކީވެސް ރައްޔިތުންގެ މަޖިލީހުން ބަދަލު ގެނެވޭގޮތަށް މީގެ ކުރިން އޮތް މާއްދައެކެވެ. ނަމަވެސް އައު އިސްލާހާއެކު ރައްޔިތުންގެ ފެންނަ ނުފެންނަ ވޯޓު ނަގާ ކަންކަމަށް ބަދަލު ގެނެވޭނީވެސް އެ ބަދަލު ގެނައުމަށްޓަކައި ރައްޔިތުންގެ ރުހުން އޮތްތޯ ބަލަން ވޯޓަކަށް އެހުމަށްފަހުގައެވެ.