2024: ޒުވާނުންގެ އަޑު އަހައި ކަންބޮޑުވުންތައް ހައްލުކޮށްދިނުމަށް ގިނަ މަސައްކަތްތަކެއް ކުރި

ރާއްޖޭގެ ވެރިކަމުގެ ނިޒާމުގައި ވުޒާރާތައް އުފެދިގެން އައިސް، އެކި ދާއިރާތަކަށް ޚާއްސަ ކުރެވިގެން ވުޒާރާތައް އުފައްދާފައިވެއެވެ. މިހާތަނަށް އައިއިރު، އެކި ވެރިކަންތަކުގައި ވުޒާރާތަކުގެ ނަން ބަދަލުވެ ހަވާލުވެފައިވާ މަސައްކަތްވެސް ބަދަލުވެފައިވެއެވެ. ނަމަވެސް ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވެރިކަމާއި ހަވާލުވެވަޑައިގަތުމާއި، ހަމައަށްވެސް އެއް ގޮތަކަށް ހިންގަމުން އައި އެއް ވުޒާރާއަކީ ޒުވާނުންގެ ވުޒާރާއެވެ. ޒުވާނުން ބާރުވެރިކުރުވުމުގެ ގިނަ ސިޔާސަތުތައް ގުޅިފައި އޮތީ ކުޅިވަރާއެވެ.

ނަމަވެސް ކުޅިވަރާއި ޒުވާނުން ބާރުވެރިކުރުވުމާއި މިއީ މުޅިން ތަފާތު ދެ ކަމެއްކަމަށް ވިދާޅުވެ މި ދެދާއިރާ ވަކިކޮށް، މުޅިން އަލަށް ޒުވާނުންގެ ކުރިމަގު ބައްޓަން ކުރުމުގެ ސިޔާސަތުތައް ކަނޑައެޅުއްވުމަށް ރައީސުލްޖުމްހޫރިއްޔާ ވަކި ވުޒާރާއެއް އުފެއްދެވިއެވެ. އަލަށް އުފެދިގެން އައި މި ވުޒާރާގެ ތަޞައްވުރަކީ ދިވެހި ޒުވާނުންނަކީ ހީވާގި، އުފެއްދުންތެރި، އަދި ޒަމާނަށް އަހުލުވެރި ރައްޔިތުންނަށް ހަދައި، ޤައުމު ކުރިއެރުވުމުގައި އެމީހުންގެ ދައުރު ފުޅާކުރުމެވެ. ވުޒާރާގެ މި ތަޞައްވުރާއެކު ޤައުމުގެ ކުރިމަގަށްޓަކައި މިހާތަނަށް ވަނީ ގިނަ މަސައްކަތްތަކެއް ކުރެވިފައެވެ.

ސަރުކާރުގެ ފުރަތަމަ އަހަރު ކުރެއްވި އެންމެ މުހިންމު އެއް މަސައްކަތަކީ ޒުވާނުންގެ އަޑު އެއްސެވުމަށް "ޕްރެޒިޑެންޝަލް ޔޫތު އެޑްވައިޒަރސް" ބޯޑެއް އުފެއްދެވުމެވެ. ޒުވާނުންނާގުޅޭ ކަންކަމުގައި ރައީސުލްޖުމްހޫރިއްޔާއަށް ލަފާ އެރުވުމަށާއި ސަރުކާރުގެ ސިޔާސަތުތައް އެކަށައެޅުމުގައި ޒުވާނުންގެ ވިސްނުމާއި އުންމީދުތައް ހިމެނުމަށް އެކުލަވާލެވުނު މި ބޯޑުގައި 15 މެންބަރުން ހިމެނެއެވެ.

ފަންނިއްޔާތުގެ ދާއިރާގައި އަންހެނުންގެ ދައުރުފުޅާކުރުމުގެ ޤައުމީ މަސައްކަތަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަރަށް މުހިންމު ވަޢުދުފުޅެކެވެ. އެމަނިކުފާނުގެ މި ވަޢުދުފުޅު ފުރިހަމަކުރެއްވުމަށް ކުރެއްވި މަސައްކަތުގެ ދަށުން "ފަންނިއްޔާތު، ވިމަންސް އެޑިޝަން" ގެ ނަމުގައި ވޯކް-އިން ސެޝަނެއް ބާއްވައި ފަންނިއްޔާތުގެ ދާއިރާއިން އަންހެން ބޭފުޅުންނަށް ކުރިއަށްދިއުމަށް ހުޅުވާލާ ފުރުސަތުތަކާ ގުޅޭގޮތުން ވަނީ މަޢުލޫމާތު ފޯރުކޮށްދެއްވާފައެވެ.

މި ވުޒާރާއިން ފަންނިއްޔާތުގެ ދާއިރާއިން މީހުން ބިނާކުރުމަށް ގިނަ މަސައްކަތްތަކެއް ވަނީ ކުރައްވާފައެވެ.

އެގޮތުން ކޯޑިންގެ ދާއިރާއިން ދުނިޔޭގެ ބާޒާރުގައި ދިވެހި ޒުވާނުން ކުރިއަށް ދިޔުމަށް ބޭނުންވާ ހުނަރުތައް ތަރައްޤީކޮށްދީ ފުރުސަތުތައް ތަނަވަސްކޮށްދިނުމަށް އެކުލަވާލި ޚާއްޞަ ޕްލޭންގެ ތެރެއިން ކުރިއަށް ގެންދެވޭ ސިލްސިލާ ހަރަކާތް "ޔޫތު ހެކް 2024" ނަމުގައި ސިލްސިލާކޮށް ބާއްވާ ހަރަކާތެއް ވަނީ ފަށާފައެވެ. ޔޫތު ހެކަތޮން ލޯންޗުކޮށް ޔޫތު ހެކަތޮން ވޯކިންގް 2 ސެޝަނެއް ޒުވާނުން ބާރުވެރިކުރުމާއި ބެހޭ ވުޒާރާއިން މިދިޔަ އަހަރު ތެރޭ ވަނީ ބާއްވާފައެވެ.

އެކި ފަންނުތަކުގެ ޒުވާނުންނަށް ތަމްރީނު ފުރުސަތުފަހިކޮށްދީ އެ ދާއިރާތަކުން ޤައުމީ ސަނަދެއް ހާސިލްކުރުމަށް މަގުފަހިކޮށްދިނުމަށް ޒުވާނުން ބާރުވެރިކުރުމާ ބެހޭ ވުޒާރާއިން ކުރިއަށް ގެންދާ ކޮމިއުނިޓީ އަޕްސްކިލިން ޕްރޮގްރާމަކީ ފާހަގަކޮށްލެވޭ ޕްރޮގްރާމެކެވެ.

ރާއްޖޭގެ ވަޒީފާގެ ބާޒާރުގައި ހުރި ވަޒީފާގެ ފުރުޞަތުތަކާއި ތަފާތު ދާއިރާތަކުން ކުރިއަށް ދެވެންހުރި ރޮނގުތަކާ ބެހޭގޮތުން ޒުވާނުންނަށް މަޢުލޫމާތު ފޯރުކޮށްދީ ވަޒީފާގެ މާޙައުލާ މެދު ހޭލުންތެރިކުރުމުގެ މަޤްސަދުގައި ކުންފުނިތަކާއި މުއައްސަސާ އަދި ރިސޯޓްތައް ގުޅިގެން "ކެރިއަރ އެކްސްޕްލޮރޭޝަން" ކުރިއަށް ގެންދެއެވެ. މިހާތަނަށް 2 ޕްރޮގްރާމެއް ހިންގި 40 ކުދިންވަނީ ބައިވެރިވެފައެވެ.

ޒުވާނުން ބިނާކުރުމުގެ ދާއިރާގެ އިތުރުން ފަންނުވެރިކަމުގެ ދާއިރާއަކީ މި ވުޒާރާގެ މުހިންމު މަސައްކަތެކެވެ. އެގޮތުން ޒުވާން ފަންނުވެރިންނަށް އާޓް ގެލަރީ އަދި އެހެނިހެން ގޮތްގޮތުން ހުނަރު ދައްކާލުމުގެ ފުރުސަތުތައް އެވުޒާރާއިން ވަނީ މިދިޔަ އެއް އަހަރުތެރޭ ފަހިކޮށްދީފައެވެ.

ރާއްޖޭގެ މީޑިއާ ދާއިރާ ހަރުދަނާ ކުރުމަކީވެސް މި ވުޒާރާގެ މަސައްކަތެކެވެ. އެގޮތުން ރައީސުލްޖުމްހޫރިއްޔާގެ ވަޢުދުފުޅެއްގެ ގޮތުގައި ހިމެނޭ މީޑިއާ ވިލެޖުގެ މަސައްކަތް ކުރަނީ މި ވުޒާރާގެ ބެލުމުގެ ދަށުންނެވެ.

ޝައްކެއްވެސް ނެތެވެ. ޒުވާނުން ބާރުވެރިކުރުވުމަކީ ހަމައެކަނި ކުޅިވަރާއި މުނިފޫހިފިލުވުމުގެ ޒަރިއްޔާއިން ޒުވާނުން ކުރިއެރުވުމެއް ނޫނެވެ. ތަފާތު ހުނަރުތައް ދަސްކޮށްދީ ދިރިއުޅުމުގެ މައިދާނާ ކުރިމަތިލާން ކެރޭ ބަޔަކަށް ޒުވާނުން ހެދުމަކީ ސަރުކާރުގެ ޖުމްލަ އަމާޒެކެވެ.

މިފަދަ އެތައް މަސައްކަތަކާއެކު މައުލޫމާތާއި ފަންނުގެ ދާއިރާ ހަރުދަނާކޮށް އިޖްތިމާޢީ ދުޅަހެޔޮކަމަށް މަގުފަހިކުރުވުމަކީ ޒުވާނުން ބާރުވެރިކުރުވުމާއި މައުލޫމާތާއި ފަންނާ ބެހޭ ވުޒާރާއިން މިވޭތުވެ ދިޔަ އަހަރު ކުރި މުހިންމު މަސައްކަތެވެ. އެހެން ކަމުން ވޭތުވެ ދިޔައީ ވުޒާރާއަށް ކާމިޔާބު އަހަރެއް ކަމަށް ޤަބޫލުކުރަން ޖެހެއެވެ.