ކޯސްޓްގާޑް: ރާއްޖޭގެ ކަނޑާއި ވައިގެ ސަރަޙައްދު ދިފާޢުކުރުމުގައި 45 އަހަރު

1980 ވަނަ އަހަރުގެ ޖަނަވަރީ މަހުގެ 1 ވަނަ ދުވަހު ރަސްމީ ގޮތުން ދިވެހި އަސްކަރިއްޔާގައި ފެށުނު ކޯސްޓްގާޑުގެ ޚިދުމަތަކީ ދިވެހިރާއްޖޭގެ މިނިވަންކަމާއި ސިޔާދަތާއި އިސްތިގުލާލު ހިމާޔަތްކުރުމުގައި މުހިންމު ދައުރެއް އަދާކުރައްވަމުންދާ ޚިދުމަތެކެވެ. މި ޚިދުމަތަށް މިއަދަށް 45 އަހަރު ފުރުނިއރު، ކޯސްޓްގާޑުގެ ޚިދުމަތަކީ ފަޚުރުވެރި ތާރީޚެއް އޮތް ޚިދުމަތެކެވެ.

މީގެ 45 އަހަރު ކުރިން ދިވެހި އަސްކަރިއްޔާގެ ވަކި ޚާއްޞަ ޔުނިޓެއްގެ ގޮތުގައި ކޯސްޓްގާޑުގެ ޚިދުމަތް ފެށިނަމަވެސް އޭގެ ކުރިންވެސް ރާއްޖޭގެ ކަނޑުގެ ސަރަޙައްދު ބެލެހެއްޓުމުގައި ދިވެހި ސިފައިން އައީ ހަރަކާތްތެރިވަމުންނެވެ. އޭރު މިޚިދުމަތް ދެމުން އައީ އައުޓްބޯޑު އިންޖީނުއެޅި 6.95 މީޓަރުގެ ކުޑަކުޑަ ތިން ލޯންޗާއެކު "ސިފައިންގެ ލޯންޗް ސެކްޝަން"ގެ ނަމުގައެވެ.

ކޯސްޓްގާޑުގެ ޒިންމާއަކީ ދިވެހިރާއްޖޭގެ ކަނޑާއި ވައިގެ ސަރަޙައްދު ދިފާޢުކުރުމާއި، ޚާއްސަ އިގްތިސާދީ ސަރަޙައްދު ހިމާޔަތްކޮށް ރައްކާތެރިކޮށް ބެލެހެއްޓުމާއި، މެރިޓައިމް ކްރިޓިކަލް އިންފްރާސްޓްރަކްޗަރ ހިމާޔަތްކޮށް ބެލެހެއްޓުމުގެ އިތުރުން ކަނޑުމަތީގައި ހާލުގައިޖެހޭ މީހުންނާ މުދާ ސަލާމަތްކުރުމެވެ.

ދިވެހިރާއްޖޭގެ ކަނޑުގެ ސަރަޙައްދުގައި ކޮންވެންޝަނަލް ނޭވީއަކުން އަދާކުރަންޖެހޭ ދައުރާއި ދިވެހިރާއްޖޭގެ މެރިޓައިމް ސިވިލް ޑިފެންސް އަދި ކަނޑުމަތީގެ ސަލާމަތާއި ރައްކާތެރިކަމުގެ މަސްއޫލިއްޔަތު ސިފައިންގެ ޤާނޫނާއި ރާއްޖޭގެ އެހެނިހެން ޤާނޫނުތަކުން ހަވާލުކޮށްފައިވާ ފަރާތަކީ ދިވެހިރާއްޖޭގެ ޤައުމީ ދިފާޢީ ބާރުގެ ކޯސްޓްގާޑާއެވެ.

ކޯސްޓްގާޑުން ކަނޑާއި ވައިގެމަގުން ހިންގަންޖެހޭ އޮޕަރޭޝަންތައް ރާވައި ހިންގަނީ، ރާއްޖޭގެ ސަރަޙައްދު ހަތަރު އޭރިއާއަކަށް ބަހާލައި ޤާއިމުކޮށްފައިވާ އޮޕަރޭޝަނަލް ކޮމާންޑްތަކުންނެވެ.

މިއިން ކޮންމެ އޭރިއާ ކޮމާންޑެއްގައި ވެސް އޮޕަރޭޝަނަލީ ސަބޯޑިނޭޓްވާ ކޯސްޓްގާޑު ސްކޮޑްރަންތަކެއް މިހާރު ވަނީ ޤާއިމުކޮށްފައެވެ. އަދި ރާއްޖޭގެ ކަނޑުގެ ސަރަޙައްދާއި ރާއްޖޭން އެހީތެރިކަން ފޯރުކޮށްދޭންޖެހޭ ބައިނަލްއަޤްވާމީ ކަނޑުގެ ސަރަޙައްދުތަކުގައި ހިނގާ ނުރައްކާތެރި ހާދިސާތަކުގައި ސާޗް އެންޑް ރެސްކިޔު ޚިދުމަތް ދިނުމަށްޓަކައި މެރިޓައިމް ރެސްކިއު ކޯޑިނޭޝަން ސެންޓަރެއްވެސް ކޯސްޓްގާޑުގައި ޤާއިމުކޮށް މިހާރު ދަނީ ޚިދުމަތް ދެމުންނެވެ.

ރާއްޖޭގެ އެކި ކަންކޮޅުތަކުގައި ބަލި މީހުން އެއްރަށުން އަނެއް ރަށަށް ކުއްލި ހާލަތުގައި އުފުލައިދިނުމުގައިވެސް ހަރަކާތްތެރިވަނީވެސް ކޯސްޓްގާޑުންނެވެ.

ކަނޑުމަތީގެ ސަލާމަތާއި ރައްކާތެރިކަން ދަމަހައްޓައި ކަނޑުމަތީގެ ހިތާމަވެރި ހާދިސާތައް މަދުކުރުމަށް ކޯސްޓްގާޑުން ކުރަމުންދާ އެންމެ ޚާއްޞަ މަސައްކަތަކީ މިދާއިރާއިން އާންމު ރައްޔިތުން ހޭލުންތެރިކުރުމެވެ. 1996 ވަނަ އަހަރު ކޯސްޓްގާޑުން މަސްވެރިން ހޭލުންތެރިކުރުމަށް ފެށި މެރިޓައިމް ސޭފްޓީ ޕްރޮގްރާމްތައް ދަތުރުވެރިންނާއި ސްކޫލްތަކުގެ ދަރިވަރުންގެ އިތުރުން ރިސޯޓްތަކަށްވެސް މިހާރުވަނީ ފުޅާކޮށްފައެވެ.

ކޯސްޓްގާޑުގެ ޚިދުމަތަށް 45 އަހަރު ފުރުނުއިރު، އެ ޚިދުމަތަކީ ޤައުމީ ދިފާއީ ބާރުގައި އެންމެ ގިނަ ފަންނީ މީހުން ބިނާކޮށްފައިވާ އެއް ދާއިރާވެސްމެއެވެ.

އެގޮތުން، ކޯސްޓްގާޑު ޓްރޭނިން ސްކޫލް ބިނާކޮށް، ބައިނަލްއަޤްވާމީ އަދި ޤައުމީ ސަނަދުގެ ފެންވަރަށް ކޯސްތައް ފަރުމާކޮށް ދަނީ ހިންގަމުންނެވެ. އެ ސްކޫލުން ހިންގާ ކޯސްތަކުގެ ތެރޭގައި ކޯސްޓްގާޑު ބޭސިކް ކޯހާއި، ސާރޗް އެންޑް ރެސްކިޔު ކޯހާއި، ބޭރުގެ އަސްކަރިއްޔާތަކަށް ހުޅުވާލައިގެން ބައިނަލް އަޤްވާމީ ފެންވަރުގައި ހިންގާ ކޯސްޓްގާޑު ބޭސިކް ޑައިވިންގ ކޯސް ފާހަގަކޮށްލެވެއެވެ.

ކޯސްޓްގާޑަކީ އަލަށް ސިފައިންގެ ޚިދުމަތާ ގުޅޭ ދެ ޖިންސުގެ ޒުވާނުންނަށް ވެސް ތަފާތު ފަންނީ ދާއިރާތަކުން ކުރިއަށް ދިއުމަށް ފުރުސަތު އޮތް ޚިދުމަތެކެވެ. އެގޮތުން، ނެވިގޭޝަން ނުވަތަ ނިޔަމިކަމާއި މާލިމީކަން، ޑައިވިންގ އެންޑް ސެލްވޭޖް، ސާރޗް އެންޑް ރެސްކިޔު، މެރިން އިންޖިނިއަރިންގ، ކިމިއުނިކޭޝަން، ގަނަރީ، ކަލްނަރީ، އޯޝަނަ ގްރަފީ، މީޓިއޮރޮލޮޖީ، ބޯޑިންގ، މެޑިކަލް، ނޭވަލް އާކިޓެކްޗަރ އަދި މެރިޓައިމް ލޯ ފާހަގަކޮށްލެވެއެވެ.

މީގެއިތުރުން ޕައިލެޓްކަމާއި، އެއަރ ކްރާފުޓް އިންޖިނިއަރކަމާއި، އެކްރޯ ޑައިނަމިކްސްގެ ދާއިރާއިންވެސް ކުރިއަށްދާން ބޭނުންވާ ޒުވާނުންނަށް ކޯސްޓްގާޑުގައި ފުރުސަތުތައް ވަނީ ހުޅުވާލާފައެވެ.

ދިވެހިރާއްޖޭގެ ސިޔާދަތާއި އިސްތިގުލާލު ހިމާޔަތްކުރުމުގައި ޤައުމީ ދިފާޢީ ބާރުގެ ކޯސްޓްގާޑުގެ ޚިދުމަތަކީ ޝުކުރު ޙައްގު ޚިދުމަތެކެވެ. ދިވެހި ކަނޑުތަކުގެ ރައްކާތެރިކަން ދިވެހި ދަތުރުވެރިންނަށާއި ރަށްރަށުގެ ރައްޔިތުންނަށް ކަށަވަރުވަނީ މި ޚިދުމަތުގެ ސަބަބުންނެވެ.