ބްރިޖް ހައިވޭގައި ތިން ސައިކަލެއްޖެހި ހިނގި އެކްސިޑެންޓުގައި 5 މީހަކަށް އަނިޔާވެއްޖެ

ސިނަމާލެ ބްރިޖް ހައިވޭގައި ތިން ސައިކަލެއް ޖެހި ހިނގި އެކްސިޑެންޓްގައި ފަސް މީހަކަށް އަނިޔާވެއްޖެއެވެ.

ދިވެހި ފުލުހުންގެ ޚިދުމަތުން ވިދާޅުވީ، ބްރިޖު ހައިވޭގައި އެކްސިޑެންޓެއް ހިނގާފައިވާކަމަށް އެ އިދާރާއަށް ރިޕޯޓްކޮށްފައިވަނީ ރޭގެ 12:11 ހާއިރު ކަމަށެވެ. މި އެކްސިޑެންޓް ހިނގީ ބްރިޖް ހައިވޭއިން މާލެއިން ހުޅުމާލެއަށް ދަތުރުކުރި ސައިކަލެއް އޯވާޓޭކް ކުރުމަށް އުޅުމުގެ ތެރޭގައި އެހެން ސައިކަލެއްގައި ޖެހިގެންކަމަށް ފުލުހުން ވިދާޅުވިއެވެ. އަދި އެ ދެސައިކަލު އެކްސިޑެންޓްވެ ފަހަތުން އައި އެހެން ސައިކަލެއްގައި ޖެހުނުކަމަށް ފުލުހުން ވިދާޅުވިއެވެ.

މި އެކްސިޑެންޓުގައި ޖުމްލަ 5 މީހަކަށް ވަނީ އަނިޔާވެފައެވެ. އެގެ ތެރެއިން 4 މީހަކަށް ފަރުވާ ދިނުމަށް ފަހު ހޮސްޕިޓަލުން ދޫކޮށްފައިވާ ކަމަށް ފުލުހުން ވިދާޅުވިއެވެ. މި އެކްސިޑެންޓުގައި ދެން އަނިޔާވި މީހާއަށް ޓްރީޓޮޕް ހޮސްޕިޓަލުގައި ފަރުވާ ދެމުންދާ ކަމަށްވެސް ފުލުހުން ވިދާޅުވިއެވެ. އެނާގެ ހާލު ސީރިއަސް ނޫންކަމަށް އެ ހޮސްޕިޓަލާއި ހަވާލާދީ ފުލުހުން ވިދާޅުވެއެވެ.

ފުލުހުން ވިދާޅުވީ، އެކްސިޑެންޓުގައި ގަވާއިދާ ޚިލާފަށް ދުއްވި ސައިކަލު ޓޯކޮށްފައިވާ ކަމަށެވެ. އަދި އެކްސިޑެންޓް ތަހުގީގު ކުރަމުންދާކަމަށް ފުލުހުން ވިދާޅުވިއެވެ.