އުފެއްދުންތެރިކަމުގެ މައުރަޒަކީ ބޭރުގެ އިންވެސްޓަރުން ހޯދުމަށް ލިބޭ ރަނުގެ ފުރުސަތެއް: ޒިޔާއު

ދިވެހިންގެ އުފެއްދުންތެރިކަމުގެ މައުރަޒު 2025 ވެގެންދާނީ ކުދި ވިޔަފާރިތަކަށް ބޭރުގެ އިންވެސްޓަރުން ހޯދުމަށް ލިބިގެންދާ ރަނުގެ ފުރުސަތަކަށް ކަމުގައި ބިޒްނަސް ސެންޓަރ ކޯޕަރޭޝަން، ބީސީސީގެ މެނޭޖިންގ ޑިރެކްޓަރ އިބްރާހިމް ޒިޔާއު ވިދާޅުވެއްޖެއެވެ.

އޭނާ މިހެން ވިދާޅުވީ، ދިވެހިރާއްޖޭގެ އަޑުގެ 62 ވަނަ އަހަރީ ދުވަހުގެ ޕްރޮގްރާމެއްގައި ވާހަކަދައްކަވަމުންނެވެ.

ދިވެހިންގެ އުފެއްދުންތެރިކަމުގެ މައުރަޒު 2025 އަކީ ރާއްޖޭގެ އުފެއްދުންތެރިކަން އިތުރުކުރުމާއި ވިޔަފާރި ފުޅާކުރުމުގެ މަޤްޞަދުގައި އުފެއްދުންތެރިކަމަށް އަމާޒުކޮށްގެން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިސްނެންގެވުމާއި އިރުޝާދުގެ ދަށުން ބާއްވާ މައުރަޒެކެވެ.

ބީސީސީގެ މެނޭޖިންގ ޑިރެކްޓަރ އިބްރާހިމް ޒިޔާއު ވިދާޅުވީ، މިއީ ރާއްޖޭގައި މިހާތަނަށް ބާއްވާ އެންމެ ބޮޑު މައުރަޒުކަމަށެވެ. މިއީ މުޅި ރާއްޖެއަށް ހުޅުވާލެވިގެން ވާދަވެރި ގޮތެއްގައި ބޭއްވޭ މައުރަޒަކަށް ވާނެކަމަށް އޭނާ ވިދާޅުވިއެވެ. އެކްސްޕޯގެ ތެރެއިން ރާއްޖޭގައި ތިބި ފަންނުވެރިން ޕްރޮމޯޓްކޮށް އެމީހުންގެ ހުނަރު ތަރައްޤީކުރުމަށް ގިނަ ކަންތައްތަކެއް ކުރިއަށްދާނެއެވެ.

ޒިޔާއު މި އެކްސްޕޯ ވެގެންދާނީ ރާއްޖޭގައި ހުރި ވިޔަފާރީގެ ފުރުސަތުތަކާއި ކުދި ވިޔަފާރިތަކާއި އެހެން ވިޔަފާރިތަކާއި ގުޅުވާލަދޭ އަދި ފަންނުވެރިންނާއި ވިޔަފާރިތަކާއިވެސް ގުޅުވާލަދޭނެ ބޮޑު އެކްސްޕޯއަކަށެވެ. މި އެކްސްޕޯއަށް ގިނަ އަދަދެއްގެ ފަތުރުވެރިންގެ ސަމާލުކަން ހުއްޓޭއިރު އެކްސްޕޯއަށް ރާއްޖެއިން ބޭރުގެ އިންވެސްޓަރުންވެސް އަންނާނެކަމަށް އޭނާ ވިދާޅުވިއެވެ. މިފަދަ ބޮޑު މަސައްކަތަކަށް ރާއްޖޭގެ އުތުރާއި ދެކުނުންވެސް އެއްބާރުލުން ބޭނުންވާކަމަށް އޭނާ ވިދާޅުވިއެވެ.

"އެކްސްޕޯ ހުޅުވާލާނީ އިންޓަނޭޝަނަލް މާކެޓަށާއި އެއްކޮށް. ރާއްޖެއިން ބޭރުގެ ފަރާތްތައްވެސް އެކްސްޕޯގައި ހަރަކާތްތެރިވަމުންދާނެ. ދުނިޔޭގެ އެކި ޤައުމުތަކަށް އިންވިޓޭޝަން ފޮނުވާނަން. އެ ޤައުމުތަކުން އެކްސްޕޯއަށް ވަޑައިގެން އެބޭފުޅުން ބޭނުންވާ ކަންތައްތައް ހޯދައި އިންވެސްޓްކުރާނެ ދިމާތައް ހޯދުމުގެ މަސައްކަތް ކުރިއަށްދާނެ." ޒިޔާއު ވިދާޅުވިއެވެ.

މި އެކްސްޕޯ އޮންނާނީ އަންނަ މެއި މަހުއެވެ. ހުޅުމާލޭ ސެންޓްރަލް ޕާކުގައި އެކްސްޕޯ ކުރިއަށްދާނީ 1 ހަފްތާގެ މުއްދަތަކަށެވެ. އެކްސްޕޯގައި ބައިވެރިވުމުގެ ފުރުސަތު މިހާރު ވަނީ ހުޅުވާލާފައެވެ.