ކާރިސާތަކަށް ދުރާލާ އިންޒާރު ދޭ ނިޒާމްތައް ހަރުދަނާކޮށް ކުރިއަރުވަނީ

ދުނިޔޭގެ ތިމާވެއްޓަށް އަންނަމުންދާ ބަދަލުތަކުގެ ނުރަނގަޅު އަސަރު ރާއްޖެ ފަދަ ކުދި ޖަޒީރާ ޤައުމުތަކުން ދަނީ ތަޙަމަލު ކުރަމުންނެވެ. އުދައެރުމާއި ވިއްސާރަވެ ފެންބޮޑުވުންފަދަ ހާދިސާތަކުގެ ސަބަބުން ދިިރިއުޅެން ކުރާ މަސައްކަތްތަކަށާއި، ގޯތިގެދޮރާއި އާންމުންގެ މުދަލަށް ބޮޑެތި ގެއްލުންތަކެއް ލިބެއެވެ.

މޫސުމީ ގޮތުންނާއި އެނޫންވެސް ގޮތްގޮތުން ކުރިމަތިވެދާނެ ކާރިސާތަކުގެ ސަބަބުން ރާއްޖޭގެ ތިމާވެށްޓާއި ބިނާވެށި ރައްކާތެރިކުރުމަށްޓަކައި "މޯލްޑިވްސް ޑިޒާސްޓަރ ރިސްކް ރިޑަކްޝަން ސްޓްރެޓަޖީ 2024 – 2030" ވަނީ އެކުލަވަލާފައެވެ.

ވިލުންތެރި ރާއްޖެއެއް ބިނާ ކުރުމުގެ މަސައްކަތް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީން ދަނީ މެދުކެނޑުމެއް ނެތި ކުރަމުންނެވެ. މި އަމާޒު އިތުރަށް ހަރުދަނާކުރުމަށް ވަނީ 7 އަހަރު ދުވަހަށް އަމާޒުކޮށްގެން ރާއްޖޭގެ ކާރިސާ ހިރާސް ކުޑަކުރުމަށް އިސްތިރާޖެއް އެކުލަވާލާފައެވެ.

މިފަދަ އިސްތިރާޖެއް އެކުލަވާލުން ދައްކުވައިދެނީ ކާރިސާ ހިރާސް ކުޑަކުރުމަށް ރައީސުލްޖުމްހޫރިއްޔާގެ ޑރ. މުހައްމަދު މުޢިއްޒުގެ ސަރުކާރުން ދެއްވާ އިސްކަމެވެ. މި އިސްތިރާޖު މޫސުމީ ގޮތުންނާއި އެނޫންވެސް ގޮތްގޮތުން ކުރިމަތިވެދާނެ ކާރިސާތަކުގެ ސަބަބުން ރާއްޖޭގެ ތިމާވެށްޓާއި ބިނާވެށި ރައްކާތެރިކުރުމަށްޓަކައި މައިގަނޑު 7 ކަމެއް ހިމަނާފައިވެއެވެ. އެއީ؛

• ކާރިސާގެ ކަންކަން ބެލެހެއްޓުމާއި ގުޅޭ ޤާނޫނީ އިޖުރާއަތްތައް ހަރުދަނާކުރުން.
• މަލްޓި-ހެޒަޑް ރިސްކް އެސެސްމަންޓް ހެދުމާއި ފުރިހަމަކުރުން
• ބިނާވެއްޓާއި ގުދުރަތީ ވަޞީލަތްތަކުގެ ތެރެއިން ކާރިސާތަކާ ކުރިމަތިލުމުގެ ޤާބިލުކަން އިތުރުކުރުން.
• ކާރިސީތަކަށް މުޖުތަމަޢު ވިލުންތެރިކަން އިތުރުކޮށް އެކަށީގެންވާ ގޮތެއްގައި އިޖާބަދިނުމަށް ބާރުއެޅުން.
• ދުރާލާ އިންޒާރު ދޭ ނިޒާމްތައް ހަރުދަނާކުރުމާއި ކުރިއެރުވުން.
• ކާރިސާތާކުން އަރައިގަތުމާއި އަލުން އާރާސްތުވުމުގެ ކެރިފޯރުންތެރިކަން އިތުރުކުރުން.
• ކުރިމަތިވާ ކާރިސާތަކަށް ދެމެހެއްޓެނިވި ގޮތެއްގައި ތައްޔާރުވުމުގެ ސަޤާފަތެއް އާލާކުރުން.

މި އިސްތިރާޖާ ގުޅޭގޮތުން ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީގެ ޗީފް އެގްޒެކެޓިވް އޮފިސަރ ހިސާން ހަސަން ވިދާޅުވީ މި އިސްތުރާޖް ވެގެންދާނީ ކުރިމަގުގައި ދިމާވެދާނެ ކާރިސާތަކަށް ތައްޔާރުވުމުގެ ޤާބިލުކަން އިތުރުކުރުމަށާއި ކާރިސާތަކަށް ވިލުންތެރި ރާއްޖެއެއް ބައްޓަން ކުރުމަށް އެހީތެރިވެދޭނެ މަގުޗާޓަކަށްކަމަށެވެ.

"ބައިނަލްއަޤްވާމީ އެކިއެކި މުހިއްމި މުއާހަދާތަކާއި އެއްބަސްވުންތަކުގައި ރާއްޖެދަނީ ބައިވެރިވެ ފައިތިލަ ސާބިތުކުރަމުން. ކާރިސީ ހިރާސް ކުޑަކުރުމާއި ދުރާލާ އިންޒާރުދޭނެ ނިޒާމްތައް ހަރުދަނާކޮށް، އެކަންކަން ބަލަހައްޓާ މީހުންގެ ޤާބިލުކަން އިތުރުކުރުމަށް ގިނަ މަސައްކަތްތަކެއް ކުރަމުންދޭ." އެންޑީއެމްއޭގެ ޗީފް އެގްޒެކެޓިވް އޮފިސަރ ހިސާން ހަސަން ވިދާޅުވިއެވެ.

މޯލްޑިވްސް ޑިޒާސްޓަރ ރިސްކް ރިޑަކްޝަން ސްޓްރެޓަޖީގެ މައިގަނޑު މަޤްސަދަކީ މޫސުމީ ގޮތުންނާއި އެނޫންވެސް ގޮތްގޮތުން ކުރިމަތިވެދާނެ ކާރިސާތަކުގެ ސަބަބުން ރާއްޖޭގެ ތިމާވެށްޓާއި ބިނާވެށި ރައްކާތެރިކުރުމެވެ. އަދި ރައްޔިތުންގެ ގެދޮރާއި މުދާ ހިމާޔަތްކުރުމާއި، ކާރިސާތަކަށް ކުރިއާލާ ތައްޔާރުވުމާއި، ކާރިސާތަކަށް ވިލުންތެރި މުޖުތަމަޢުއެއް ބިނާކުރުމާއި، ދެމެހެއްޓެނިވި ތަރައްޤީގެ ލަނޑުދަނޑިތައް ޙާޞިލުކުރުމަކީވެސް މި ސްޓްރެޓެޖީގެ އަމާޒެކެވެ.

މި ސްޓްރެޓަޖީގެ ސަބަބުން ޤުދުރަތީ ކާރިޘާތަކުން ލިބިދާނެ އަދި ލިބޭ ގެއްލުންތައް ކުޑަކުރުމަށާއި، މިދާއިރާއިން އިންސާނީ ވަސީލަތް ތަރައްޤީ ކުރުމަށް އިތުރު ފުރުޞަތުތައް ފަހިވެގެންދާނެއެވެ.

ރާއްޖެއަކީ މޫސުމަށް އަންނަ ބަދަލުތަކުގެ ސަބަބުން ކުދި އަދި ބިންތިރި ޖަޒީރާ ޤައުމުތަކަށް ލިބޭ ގެއްލުމާއި ގުޅޭގޮތުން ބައިނަލްއަޤްވާމީ މައިދާނުގައި އަބަދުވެސް ވަކާލާތުކުރާ ގައުމެކެވެ. އެހެންކަމުން މިފަދަ ސްޓްރެޓަޖީއެއްގެ ސަބަބުން މިކަންކަމަށް ވަކާލާތުކޮށް އަޑުއުފުލުމުގެ ފުރުސަތު އިތުރުކުރެވިދާނެއެވެ.