މިޞްރުގެ ސުވަޔިސް މަގު ނުވަތަ ކޯރު (ސުއެޒް ކެނޭލް)އަށް އިތުރު ކޮށްފައިވާ 10 ކިލޯމީޓަރުގެ އައު މަގުގެ އަޖުމަ ބަލައިފިއެވެ. ސުވަޔިސް ކޯރަކީ, ރަތް ކަނޑާއި މެޑިޓެރޭނިޔަން ކަނޑު ގުޅައިދިނުމަށް މިޞްރުގައި ބިނާ ކޮށްފައިވާ މަސްނޫއީ ކޯރެކެވެ. އެ ކޯރަށް އައު ބަޔެއް އިތުރު ކޮށްފައި ވަނީ ދެކުނު ފަރާތަށެވެ. ސުވަޔިސް ކޯރު ބޮޑުކޮށް ތަރައްޤީ ކުރުމަށް މިޞްރުން ހިންގަމުންދާ މަޝްރޫޢުގެ ބައެއް ނިންމައިލާފައި މި ވަނީ، އެ މަގު ހުރަސްކޮށް ދަތުރު ކުރާ އާގުބޯޓުފަހަރުގެ އަދަދު މަދުވެ، އެ ޤައުމަށް ލިބޭ އާމްދަނީ އެތަކެއް ގުނައަކުން ދަށްވެފައިވާ ދަނޑިވަޅެއްގައެވެ.
ސުވަޔިސް ކޯރު ހުރަސްކޮށް ދަތުރު ކުރާ އުޅަނދުފަހަރުގެ އަދަދު މަދުވެފައި ވަނީ، ރަތް ކަނޑު ހުރަސްކޮށް ދަތުރު ކުރާ އާގުބޯޓުފަހަރަށް އަމާޒުކޮށް ޔަމަންގެ ހަތިޔާރު އެޅި ޖަމާޢަތް، ޙޫޘީން ޙަމަލާ ދޭން ފެށުމުންނެވެ. އެއީ، ޔަހޫދީންނާ ދެކޮޅަށް ޙޫޘީން ފަށާފައިވާ އަސްކަރީ ހަރަކާތެއްގެ ދަށުން ދެމުންދާ ޙަމަލާތަކެކެވެ. އެ ޖަމާޢަތުން އަސްކަރީ ހަރަކާތްތައް ފަށާފައި ވަނީ، ފަލަސްޠީނުގެ ޣައްޒާގެ މުސްލިމުންގެ ނަސްލުހޭދު ކުރަން ޔަހޫދީ ފައުޖުން މީގެ 13 މަސް ކުރިން ލާއިންސާނީ ޖަރީމާތަކެއް ފެށުމާ ގުޅިގެންނެވެ.
ރަތް ކަނޑުން ދަތުރު ކުރާ އުޅަނދުފަހަރުގެ ތެރެއިން ޙޫޘީންގެ ޙަމަލާތައް އަމާޒު ކުރަމުން ދަނީ ޔަހޫދީ ކުންފުނިތަކުން ހިންގާ، އަދި ޔަހޫދީންނާ ގުޅުން އޮތް އުޅަނދުފަހަރާއި، ޒަޔަނިސްޓު އިސްރާއީލަށް މުދާ އުފުލާ ބޯޓުފަހަރަށެވެ. އަދި، ޔަހޫދީންގެ ޙިމާޔަތުގައި ޔަމަނަށް ބޮންއަޅަމުންދާ އެމެރިކާއާއި އިނގިރޭސިވިލާތުގެ އަސްކަރީ މަނަވަރުތަކާއި، އެ ޤައުމުތަކަށް ނިސްބަތްވާ އާގުބޯޓުފަހަރަށެވެ. ރަތް ކަނޑުގެ އިތުރުން ޢަދަން ކަނޑާއި، ބާބް އަލް-މަންދަބީ ކަނޑުން ދަތުރު ކުރާ އުޅަނދުފަހަރަށް ވެސް ޙޫޘީން ދަނީ ޙަމަލާތައް އަމާޒު ކުރަމުންނެވެ.
ސުވަޔިސް ކޯރުގައި އަލަށް ތަރައްޤީ ކޮށްފައިވާ 10 ކިލޯމީޓަރުގެ މަގުގެ އަޖުމަ ބަލާފައިވާ ކަން ހާމަ ކޮށްފައި ވަނީ އެ ކޯރުގެ ކަންކަން ބަލަހައްޓާ ސުއެޒް ކެނޭލް އޮތޯރިޓީ (އެސްސީއޭ)ންނެވެ. އެ އިދާރާއިން ބުނީ، އައު މަގުގެ އަޖުމަ ބެލުމުގެ ގޮތުން ދެ އާގުބޯޓެއް އެ މަގު ހުރަސްކޮށް ދަތުރު ކޮށްފައިވާ ކަމުގައެވެ. އަދި، އެ މަގުގެ އަޖުމަ ބެލުމުގެ ތެރޭގައި ނުރައްކާތެރި އެއްވެސް ހާދިސާއެއް ހިނގާފައި ނުވާ ކަމަށާއި، އިންތިޒާމު ކޮށްފައިވާ ގޮތަށް ކަންކަން ކުރިއަށް ދިޔަ ކަމުގައެވެ.
ސުވަޔިސް ކޯރު ބޮޑު ކުރުމަށް ހިންގަމުންދާ މަޝްރޫޢު މިޞްރުން އަވަސް ކޮށްފައި ވަނީ، 2021ވަނަ އަހަރު 'އެވަރ ގިވަން'ގެ ނަން ދީފައިވާ އާގުބޯޓެއް އެ ކޯރުގެ އައްސޭރިފަށަށް ފަރަށް އެރި ހާދިސާއާ ގުޅިގެންނެވެ. އެ ހާދިސާއާ ގުޅިގެން ހަ ދުވަހުގެ މުއްދަތަކަށް ކޯރު ބަންދު ކުރަން މަޖުބޫރުވިއެވެ. އަދި، ކަނޑުމަގުން މުދާ އުފުލުގެ ވިޔަފާރިއަށް ބޮޑެތި ގެއްލުންތަކެއް ލިބުނެވެ.
މިޞްރުގެ ސުވަޔިސް ކޯރަކީ އޭޝިޔާ ބައްރުގެ ޤައުމުތަކާއި ވިލާތުގެ ޤައުމުތަކުގެ ދެމެދުގައި ކަނޑު ހުރަސްކޮށް ދަތުރު ކުރެވެން އޮތް އެންމެ ކުރު، އަދި އެންމެ ފަސޭހަ މަގެވެ. އެ ޤައުމުގެ ރައީސް ޢަބްދުލްފައްތާޙް އަލް-ސީސީ ވިދާޅުވީ ސަރަޙައްދީ ހަމަނުޖެހުންތަކާ ގުޅިގެން ސުވަޔިސް ކޯރުން ލިބޭނެ ކަމަށް ކުރިން އަންދާޒާ ކުރެވުނު އާމްދަނީގެ ތެރެއިން 7 ބިލިޔަން އެމެރިކާ ޑޮލަރު މި އަހަރު ނުލިބޭ ކަމުގައެވެ. އަދި، 2023ވަނަ އަހަރު ސުވަޔިސް ކޯރުން ލިބުނު އާމްދަނީއާ އަޅައިބަލާއިރު މި އަހަރު ލިބިފައިވާ އާމްދަނީ %60 ދަށްވެފައިވާ ކަމުގައެވެ. ސުވަޔިސް ކޯރު އިތުރަށް ބޮޑުކޮށް، ތަރައްޤީ ކުރުމުގެ އައު މަޝްރޫޢެއް ފެށުމާ މެދު ވިސްނަމުންދާ ކަން މިޞްރުން މި އަހަރުގެ ކުރީކޮޅު އިޢުލާނު ކޮށްފައިވެއެވެ.
އެސްސީއޭން ބުނީ، އަލަށް ތަރައްޤީ ކޮށްފައިވާ މަގާއެކު، ސުވަޔިސް ކޯރުގައި ދެކޮޅަށް ދަތުރު ކުރެވޭ ގޮތަށް ފަރުމާ ކޮށްފައިވާ ބައިގެ ދިގުމިން 72 ކިލޯމީޓަރުން 82 ކިލޯމީޓަރަށް ބޮޑު ކުރެވިފައިވާ ކަމުގައެވެ. ސުވަޔިސް ކޯރަކީ ޖުމުލަ 193 ކިލޯމީޓަރު ދިގު މަގެކެވެ. "މިއާ އެކު، ދުވާލެއްގެ މައްޗަށް ކޯރު ހުރަސްކޮށް ދަތުރު ކުރާ އުޅަނދުފަހަރުގެ އަދަދު 6 ނުވަތަ 8ން އިތުރު ކުރެވޭނެ. އަދި، އެމަރޖެންސީ ޙާލަތްތައް މެނޭޖު ކުރުމުގައި ފަސޭހަވެގެން ދާނެ،" އެސްސީއޭން ބުންޏެވެ.