ރާއްޖޭގައި މުދަލު ޒަކާތް ދެއްކުން މަދު، ސަބަބު ދެނެގަތުމަށް ދިރާސާއެއް ކުރަނީ

ރާއްޖޭގައި މުދަލު ޒަކާތް ދެއްކުން މަދުވާ ސަބަބުތައް ދެނެގަތުމަށް ޚާއްސަ ދިރާސާއެއް އަންނަ އަހަރު ކުރުމަށް ނިންމާފައިވާ ކަމަށް ޒަކާތު ހައުސް ހިންގުމާ ހަވާލުވެވަޑައިގެން ހުންނެވި ޑިރެކްޓަރ ޖެނެރަލް އޮފް ޒަކާތު، ފަޟީލަތުއްޝައިޚް ޢިއްޒައްދީން ޢަދްނާން ވިދާޅުވެއްޖެއެވެ.

ރާއްޖޭގެ ޒަކާތު ފަންޑަށް މިއަހަރުގެ މިހާތަނަށް ރެކޯޑު އަދަދަކަަށް ރުފިޔާ ލިބިފައިވެއެވެ. އެގޮތުން އަހަރުގެ މިހާތަނަށް 98 މިލިޔަނަށްވުރެ ގިނަ ރުފިޔާ އެ ފަންޑަށް ޖަމާވެފައިވާއިރު އަހަރަކު އެ ފަންޑު 100 މިލިޔަން ރުފިޔާއަށް އެރުވުމަކީ ސަރުކާރުގެ އަމާޒެކެވެ.

ޕީއެސްއެމް ނިއުސްގެ ރާއްޖެ މިއަދު ޕްރޮގްރާމުގައި ޑިރެކްޓަރ ޖެނެރަލް އޮފް ޒަކާތު ފަޟީލަތުއްޝައިޚް ޢިއްޒައްދީން ޢަދްނާން ވިދާޅުވީ ރާއްޖޭގައި ފިތުރު ޒަކާތް ދައްކާ މީހުންގެ އަދަދު އިތުރުވިނަމަވެސް މުދަލު ޒަކާތް ދައްކާ މީހުންގެ އަދަދު މަދުކަމަށެވެ. މުދަލު ޒަކާތް ނުދައްކާ ސީދާ ސަބަބުތައް އަދި މިހާތަނަށް ދެނެގަނެވިފައިނުވާ ކަމަށާއި އެ ސަބަބުތައް ދެނެގަތުމަށް އަންނަ އަހަރު ދިރާސާއެއް ކުރުމަށް ހަމަޖެހިފައިވާ ކަމަށްވެސް ވިދާޅުވިއެވެ.

ޢިއްޒައްދީން ވިދާޅުވީ މުދަލު ޒަކާތް ދައްކާ ނިސްބަތް މަދުވާ ސަބަބުތައް ދިރާސާއެއްގެ އަލީގައި ދެނެގަނެވިފައި ނެތް ނަމަވެސް މިހާތަނަށް ޒަކާތު ހައުސްއިން ހިންގި އެކި ހަރަކާތްތަކުގެ ތެރެއިން ބައެއް ސަބަބުތައް ދެނެގަނެވިފައިވާ ކަމަށެވެ. އެގޮތުން، މުދަލު ޒަކާތަކީ އިސްލާމް ދީނުގައި ކިހާ މުހިންމުކަމެއްކަމާމެދު އާންމުން ހޭލުންތެރިވެފައި ނެތުމަކީ މައިގަނޑު ސަބަބެއް ކަމަށް ޢިއްޒައްދީން ވިދާޅުވިއެވެ.

"އަޅުގަނޑުމެން އެންމެންނަކީ މުއްސަނދިންނެއް ނޫން. އެންމެންނަކީ ތަނަވަސްކަމެއް، އެހެންމީހުންނަށް އެހީތެރިވެވޭނެ ބައެއް ނޫން. ފުދުންތެރި މުހުތާދުވެރިން ތިބޭނެކަން ދަންނަންޖެހޭ. އެހެންވީމަ އެމީހުންނަށް އެ ލިބިދޭންޖެހޭ ޙައްގެއް ގޮތުގައި އަދި އިސްލާމް ދީނުގައި ﷲ ސުބުހާނަހޫ ވަތަޢާލާ، މުދަލުގެ މިލްކުވެރިފަރާާތަކީ އެކަލާންގެކަން. އެ ޙައްގު އަދާނުކުރާކަން. އެހެންވީމަ ދީނީގޮތުން މީހުންނަށް މިއީ ކިހާވަރެއްގެ ކަމެއްކަން ނޭނގުން މިއީ އެންމެ ބޮޑު އެއް ކަންތައް ކަންނޭގެ." ޢިއްޒައްދީން ވިދާޅުވިއެވެ.

ޢިއްޒައްދީން ވިދާޅުވީ ބައެއް މީހުން މުދަލުގެ ޒަކާތް ދެއްކުމުން އަތުގައި ހުންނަ މުދާ މަދުވާނެ ކަމަށް ދެކޭ ކަމަށާއި ނަމަވެސް މިހާތަނަށް މުސްލިމް ޤައުމުތަކުގައި ހަދާފައިވާ ދިރާސާތަކުންވެސް މުދަލުގެ ޒަކާތް ދައްކާ ފަރާތްތަކުގެ މުދަލުގައި ބަރަކާތްލައްވައި މުދާ އިތުރުވަމުންދާކަން ސާބިތުވެފައިވާކަމަށެވެ. އަދި ކުރިއަށް އޮތްތަނުގައި ޒަކާތު ހައުސްގެ ފަރާތުން ޒަކާތުގެ އެކި ކަންކަމަށް އާންމުން ހޭލުންތެރިކުރުމުގެ ގިނަ ޕްރޮގްރާމުތައް ކުރިއަށްގެންދާނެކަމަށްވެސް ވިދާޅުވިއެވެ.

މީގެ އިތުރުން ރާއްޖޭގައި ޒަކާތު ފަންޑު މެދުވެރިކޮށް ރައްޔިތުންނަށް ބޭނުންވާ މުހިންމު އެތައް ކަމެއްގައި އެހީތެރިކަން ފޯރުކޮށްދޭއިރު މުދަލު ޒަކާތް ދައްކާ މީހުންގެ އަދަދު އިތުރުވުމުން ޒަކާތު ފަންޑު ބޮޑުވެ، އާންމުންނަށް ފޯރުކޮށްދެވޭ އެހީވެސް އިތުރުވެގެންދާނެކަން ޢިއްޒައްދީން ފާހަގަކުރެއްވިއެވެ. ޒަކާތު ފަންޑު މެދުވެރިކޮށް ބޭސްފަރުވާއާއި ތައުލީމީ ދާއިރާއިން ގިނަ އެހީތަކެއް ކޮންމެ މަހަކުވެސް ދަނީ ދެމުންނެވެ.