މިދިޔަ މަހު އިމްޕޯޓު އެކްސްޕޯޓުން ދައުލަތަށް 249 މިލިޔަން ރުފިޔާ
-
ނޮވެމްބަރު މަހު ރާއްޖެއަށް އެތެރެކޮށްފައިވަނީ 4 ބިލިޔަން ރުފިޔާގެ މުދާ
-
އެކްސްޕޯޓް ކުރި މުދަލުގެ އަގު ހުރީ 120 މިލިޔަން ރުފިޔާގައި
އިމްޕޯޓު އެކްސްޕޯޓުން ނޮވެމްބަރު މަހު ދައުލަތަށް 249 މިލިޔަން ރުފިޔާ ލިބިފައިވާކަމަށް ކަސްޓަމްސްގެ ތަފާސްހިސާބުތަކުން ދައްކައިފިއެވެ.
މޯލްޑިވްސް ކަސްޓަމްސް ސަރވިސްއިން، އާންމުކޮށްފައިވާ ތަފާސްހިސާބުތައް ދައްކާ ގޮތުން ތެލަށް ކުރި ހޭދަ އުނިކޮށް މިދިޔަ އަހަރާއި މިއަހަރު އިމްޕޯޓް ހުރީ އެއްވަރެއްގައެވެ. އެގޮތުން މިދިޔަ އަހަރުގެ ނޮވެމްބަރު މަހު އަދި މިއަހަރުގެ ނޮވެމްބަރު މަހުވެސް އިމްޕޯޓްކޮށްފައިވަނީ 3.4 ބިލިޔަން ރުފިޔާގެ މުދަލެވެ. ނަމަވެސް ތޭލަށް ކުރި ހޭދައާއި އެކު މިދިޔަ އަހަރު ނޮވެމްބަރު މަހު ޖުމްލަ 4.3 ބިލިޔަން ރުފިޔާގެ މުދާ ވަނީ ރާއްޖެއަށް އެތެރެކޮށްފައެވެ. މިއަހަރު ނޮވެމްބަރު މަހު ރާއްޖެއަށް އެތެރެކޮށްފައިވަނީ 4 ބިލިޔަން ރުފިޔާގެ މުދަލުގައެވެ.
ނޮވެމްބަރުމަހު ރާއްޖެއަށް އެންމެ ގިނައިން އެތެރެކޮށްފައިވަނީ މެޝިނަރީ އާއި އިލެކްޓްރިކް ސާމާނު، ތެލުގެ ބާވަތްތަކުގެ އިތުރުން ކާބޯތަކެތީގެ ބާވަތްތަކެވެ.
އަދި ރާއްޖެއަށް އެންމެ ގިނައިން މުދާ އެތެރެކޮށްފައިވަނީ ޔޫ.އޭ.އީ، ޗައިނާ، އިންޑިއާ، ސިންގަޕޫރު އަދި މެލޭޝިއާއެވެ.
ނޮވެމްބަރު މަހު އެންމެ ގިނައިން މުދާ އެތެރެކޮށްފައިވާ ޤައުމުތައް
ޔޫ.އޭ.އީ – 103 މިލިޔަން ރުފިޔާ
ޗައިނާ - 608 މިލިޔަން ރުފިޔާ
އިންޑިއާ – 582 މިލިޔަން ރުފިޔާ
ސިންގަޕޫރު – 253 މިލިޔަން ރުފިޔާ
މެލޭޝިއާ - 167 މިލިޔަން ރުފިޔާ
މިދިޔަ އަހަރާއި އަޅާބަލާއިރު ނޮވެމްބަރު މަހު އިމްޕޯޓު އެއްވަރެއްގައި ހިފެހެއްޓިފައިވާއިރު، ކާބޯތަކެއްޗާއި، ތަލާއި އަދި އިލެކްޓްރޯނިކް ސާމާނާއި މެޝިނަރީތަކަށް ކުރި ހޭދަ 500 މިލިޔަން ރުފިޔާއަށްއަރައެވެ.
އެގޮތުން ކާބޯތަކެތީގެ އިމްޕޯޓް އަގު ހުރީ 883 މިލިޔަން ރުފިޔާއެވެ. މެޝިނަރީ އަދި އެލެކްޓްރޯނިކް ސާމާނުގެ އިމްޕޯޓް އަގު 717 މިލިޔަން ރުފިޔާގައި ހުރިއިރު، މި ދިޔަ ނޮވެމްބަރު މަހު ތެލަށް 582 މިލިޔަން ރުފިޔާ ހޭދަކޮށްފައިވެއެވެ.
ކަސްޓަމްސްގެ ތަފާސްހިސާބުތައް ދައްކާގޮތުން ރާއްޖެއިން މުދާ އެކްސްޕޯޓުކުރި މިންވަރު ވަނީ ދަށްވެފައެވެ. އެގޮތުން މިދިޔަ އަހަރު ނޮވެމްބަރުމަހު ރާއްޖެއިން ވަނީ 216 މިލިޔަން ރުފިޔާގެ މަސް ބޭރުކޮށްފައެވެ. ނަމަވެސް މިއަހަރުގެ މި މުއްދަތުގައި އެކްސްޕޯޓް ހުރީ 120 މިލިޔަން ރުފިޔާގައެވެ.
ތަފާސްހިސާބުތައް ދައްކާގޮތުން ނޮވެމްބަރު މަހު ރާއްޖެ އިމްޕޯޓު އެކްސްޕޯޓުން ވަނީ 249 މިލިޔަން ރުފިޔާ ލިބިފައެވެ. މިދިޔަ އަހަރުގެ މިމުއްދަތުގައި އިމްޕޯޓު އެކްސްޕޯޓުން ލިބިފައިވަނީ 429 މިލިޔަން ރުފިޔާއެވެ.