ސަރުކާރުގެ އިސް ވެރިންނަށް ރައީސްގެ އިންޒާރެއް: ކޮރަޕްޝަންގެ އަމަލެއް ހިންގައިފިނަމަ ވަގުތުން ފިޔަވަޅު އަޅާނަން

ސަރުކާރުގެ އިސްވެރިއަކު ކޮރަޕްޝަނުގެ ޢަމަލެއް ހިންގައިފިނަމަ، ވަގުތުން ފިޔަވަޅު އަޅުއްވާނެ ކަމަށާއި ކޮރަޕްޓް ވެއްޖެނަމަ އަޅަންޖެހޭ ފިޔަވަޅުތައް ހާޤީޤީ މާނައިގައި ތަންފީޒު ކުރައްވާނެ ކަމުގެ އިންޒާރު ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ދެއްވައިފިއެވެ.

އެމަނިކުފާނު މިހެން ވިދާޅުވީ ސަރުކާރު ކުންފުނިތަކުގެ އިސް ވެރިން ތިއްބަވާ ވަޓްސްއެޕް ގްރޫޕެއްގައި ހިއްސާ ކުރެއްވި މެސެޖެއްގައެވެ.

ރައީސުލްޖުމްހޫރިއްޔާގެ މެސެޖުގައި ވިދާޅުވީ އެއްވެސް ބޭފުޅަކު ޤަވާއިދާ ޚިލާފަށް ނުވަތަ އުސޫލާ ޚިލާފަށް އެއްވެސް މީހަކަށް ކަމެއް ކޮށްދީފިނަމަ ނުވަތަ ކޮރަޕްޝަންގެ ޢަމަލެއް ހިންގައިފިކަން އެމަނިކުފާނަށް އެނގޭ ހިސާބުން އަޅަންޖެހޭ ފިޔަވަޅު އެމަނިކުފާނު އަޅުއްވާނެ ކަމަށެވެ.

އަދި ކޮރަޕްޝަން އެއްވެސް ގޮތެއްގައި ބަލައިނުގަންނާނެ ކަމަށް ވިދާޅުވެ އެމަނިކުފާނު ވަނީ "ޒީރޯ ޓޮލަރެންސް" ހަޤީޤީ މާނައިގައި ތަންފީޒު ކުރައްވާނެ ކަމަށް ވިދާޅުވެފައެވެ.

"އެއްވެސް ބޭފުޅަކު ޤަވާއިދާ ޚިލާފު އަމަލެއް ހިންގައިފި ނަމަ ނުވަތަ ހިންގަން ފުރުސަތުދީފި ނަމަ ނުވަތަ އެއްވެސް މީހަކަށް ބޭއިންސާފުން ކަމެއް މަގުފަހި ކޮށްދިނުން ފަދަ ކަމެއް ކޮށްދީފިނަމަ ނޫންނަމަ އެފަދަ އެއްވެސް މައުލޫމާތެއް އަޅުގަނޑަށް ލިބިއްޖެ ނަމަ އަޅުގަނޑު އަޅަން ޖެހޭ ފިޔަވަޅެއް އަޅާނެ ކަމުގައި ދަންނަވަން، ކޮރަޕްޝަން ޓޮލަރޭޓެއް ނުކުރާނަން. ޒީރޯ ޓޮލަރަންސް ހަގީގީ މާނައިގައި ތަންފީޒު ކުރާނެ ވާހަކަ ދަންނަވަން" ރައީސުލްޖުމްހޫރިއްޔާ ވިދާޅުވިއެވެ.

ރައީސުލްޖުމްހޫރިއްޔާ ކުންފުނިތަކުގެ ވެރިންނަށް މިކަން އަންގަވާފައިމިވަނީ ހައުސިންގ ޑިވެލޮޕްމެންޓް ކޯޕަރޭޝަންނަށް ބިންވެރިޔާ ސްކީމުގެ ޝަރުތު ހަމަނުވާ ސަރުކާރު ކުންފުންޏެއްގެ ވެރިއެއް ލިޔުމެއް ގޯތި ލިބިފައިވާކަމުގެ ލިއުމެއް ހުށަހެޅުއްވި މައްސަލައިގައެވެ. މިމައްސަލައިގެ ޖިނާޢީ ތަހުޤީޤެއް މިވަގުތު ފުލުހުން އެންޓި ކޮރަޕްޝަން ކޮމިޝަނާއި ގުޅިގެން ދަނީ ހިންގަމުންނެވެ.

ރައީސުލްޖުމްހޫރިއްޔާ ކުންފުނިތަކުގެ ވެރިންނަށް ދެއްވި އިންޒާރާއެކު، ސަރުކާރުން ހިއްސާވާ ކުންފުނިތަކާއި އިދާރާތަކުގެ ވެރިން ދަނީ ކޮރަޕްޝަނާއި ދެކޮޅަށް ރައީސުލްޖުމްހޫރިއްޔާ ނަންގަވާފައިވާ ސްޓޭންޑަށް ތާޢިދު ކުރައްވާމުންނެވެ. އަދި ކުންފުނިތަކުގެ ވެރިން ވަނީ އެކަމުން ދޭހަވަނީ އެމަނިކުފާނު ހުންނެވީ ރައްޔިތުންގެ ފަޅީގައިކަން ފާހަގަކުރައްވައި އެގޮތުގައި ތިއްބަވާނެކަމަށް ވިދާޅުވެފައެވެ.

މީގެ އިތުރުން ކުންފުނިތަކާއި އިދާރާތަކުގެ ވެރިން ވަނީ، އެ ފަރާތްތަކުގެ ޒިންމާއަކީ ރައްޔިތުންނަށް ޚިދުމަތްކުރުންކަން ފާހަގަކުރައްވާ ނަޒާޙަތްތެރިކަމާއެކު އެކަން ކުރައްވާނެ ކަމަށް ވިދާޅުވެފައެވެ.

ސަރުކާރުން ކޮރަޕަޝަނާއި ދެކޮޅަށް ތެދުވެފައިވާއިރު، ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވެރިކަމަށް ވަޑައިގެންނެވީ ކޮރަޕްޝަނަށް އެމަނިކުފާނުގެ ސަރުކާރެއްގައި ފުރުސަތު ނުދެއްވާނެ ކަމަށް ވިދާޅުވެ އެކަމަށް ވައުދުވެވަޑައިގަންނެވެ.