އައިވަރީ ކޯސްޓްގެ ގައުމީ ފުޓްބޯޅަ ޓީމުގެ ކޯޗަކަށް ފްރާންސްގެ ހާވޭ ރެނާޑް ހަމަޖައްސައިފިއެވެ.
2015 ވަނަ އަހަރުގެ އެފްރިކަން ކަޕް އޮފް ނޭޝަންސްގެ ޗެމްޕިއަންކަން އައިވަރީ ކޯސްޓަށް ހޯދައިދިން ހާވޭ ރެނާޑް އަލުން އެ މަގާމަށް ހަމަޖައްސާފައިވަނީ ނިމިގެންދިޔަ ވޯލްޑްކަޕްގައި އައިވަރީ ކޯސްޓަށް ކޯޗުކޮށްދިން އެމާސް ފާއޭ އާއިއެކު ހަދާފައިވާ އެއްބަސްވުމުގެ މުއްދަތު ހަމަވުމުންނެވެ.
ފާއޭގެ އިރުޝާދުގެ ދަށުން އައިވަރީ ކޯސްޓް ވަނީ ވޯލްޑްކަޕްގެ ނޮކްއައުޓް ބުރަށް ފުރަތަމަ ފަހަރަށް ކޮލިފައިވެފައެވެ. ނަމަވެސް ނޮކްއައުޓް ބުރުގައި ނޯވޭ އާއި ދެކޮޅަށް ކުޅުނު މެޗުން އައިވަރީ ކޯސްޓް ވަނީ ބަލިވެފައެވެ.
އުމުރުން 57 އަހަރުގެ ހާވޭ ރެނާޑް ވަނީ އެންގޯލާ އާއި މޮރޮކޯގެ އިތުރުން ސައުދި އަރަބިއްޔާ އަދި ޒެމްބިއާގެ ގައުމީ ޓީމަށް ކޯޗުކޮށްދީފައެވެ. ޒެމްބިއާ އާއިއެކު އޭނާ ވަނީ 2012 ވަނަ އަހަރުގެ އެފްރިކަން ކަޕް އޮފް ނޭޝަންސްގެ ޗެމްޕިއަންކަންވެސް ހޯދާފައެވެ.
ޕެރިހުގައި ބޭއްވި އޮލިމްޕިކްސް ކުޅިވަރު މުބާރާތުގައި ރެނާޑް ވަނީ ފްރާންސްގެ އަންހެން ގައުމީ ޓީމަށްވެސް ކޯޗުކޮށްދީފައެވެ. އަދި 2023 ވަނަ އަހަރުގެ އަންހެނުންގެ ވޯލްޑްކަޕްގައިވެސް އޭނާ ވަނީ ފްރާންސްގެ ގައުމީ ޓީމަށް ކޯޗުކޮށްދީފައެވެ.
ހާވޭ ރެނާޑް އަށް އެންމެ އަވަހަށް އޮތް އިމްތިހާނަކީ އަންނަ އަހަރު ކެންޔާ އާއި ޓެންޒޭނިޔާގެ އިތުރުން ޔުގަންޑާގައި ބޭއްވުމަށް ހަމަޖެހިފައިވާ އެފްރިކަން ކަޕް އޮފް ނޭޝަންސްގައި ރަގަޅު ނަތީޖާއެއް ހޯދުމެވެ.
އެފްރިކަން ކަޕް އޮފް ނޭޝަންސްގެ ކޮލިފައިން އަންނަ މަހު ފެށުމަށްވަނީ ހަމަޖެހިފައެވެ.