އަވަސް ފިޔަވަޅުތަކުން ހާމަވަނީ ކޮރަޕްޝަން ހުއްޓުވަން ހުދު ގިރުވާނުލީ ގިންތިއަށްވެސް ނުބައްލަވާނެކަން

ރާއްޖޭގެ ސިޔާސީ މައިދާނުގައި ހަރަކާތެރިިވާ އެކި ފަރާތްތަކުގެ ނަޒާހަތްތެރިކަމާމެދު ސުވާލު އުފެއްދޭ އެތައްކަމެއް މާޒީގައި ވަނީ ފެނިގެން ގޮސްފައެވެ. އެކަމުގެ ހަޤީޤަތްތަކެއް ތާރީޚުން ފެންނަން އެބަހުއްޓެވެ.

ރާއްޖޭގައި ހިންގާފައިވާ ކޮރަޕްޝަންގެ ބޮޑެތި މައްސަލަތަކުގެ ތެރެއިން ފަހުގެ ތާރީޚަށް ބަލާއިރު، ކުރީގެ ރައީސް އަލްއުސްތާޛު މައުމޫން އަބްދުލްޤައްޔޫމްގެ ވެރިކަމުގައި 1990 ވަނަ އަހަރު ފެންމަތިވި ފިޝަރީޒް ޕްރޮޖެކްޓް އިމްޕްލިމެންޓޭޝަން ޑިޕާޓްމެންޓް (އެފްޕީއައިޑީ) ކޮރަޕްޝަން މައްސަލަ ފާހަގަކުރެވެއެވެ. އޭގެ ފަހުން ދިވެހިން ކޮރަޕްޝަނާއި އެކު އެންމެ ބޮޑަށް ދައްކާ ވާހަކައަކީ އެމްއެމްޕީއާރްސީގެ ބޮޑު ޚިޔާނާތުގެ ވާހަކައެކެވެ. މިހާތަނަށްވެސް ޝަރީޢަތް ހިންގަމުން އައިސްފައިވާ މިމައްސަލާގައިވެސް ގިނަ ތުހުމަތުތަކެއް އެތައްބަޔަކަށް ކުރެވިފައިވެއެވެ.

ނިމިދިޔަ ރައީސް އިބްރާހީމް މުޙައްމަދު ޞާލިޙުގެ ސަރުކާރުގައިވެސް ފިތްކަނޑައިގެންދާ ވަރުގެ ބޮޑެތި ކޮރަޕްޝަން މައްސަލަތަކެއް ފެންމަތިވެފައިވެއެވެ. އެގޮތުން ވެންޓިލޭޓަރުތަކުގެ މައްސަލައާއި ސަރުކާރު ހިއްސާވާ ކުންފުނިތައް މެދުވެރިކޮށް ހިންގާފައިވާ ކަމަށް ތުހުމަތު ކުރެވޭ ބޮޑެތި ކޮރަޕްޝަންގެ މައްސަލަތައް ހިމެނެވެ. އެކުންފުނިތައް ދަރައި ނުހިންގޭ ހާލަތައް ގޮސްފައިވާއިރު، އެބުރަވެސް އުފުލަން ޖެހެނީ ދައުލަތަށެވެ.

މިއީ ދިވެހި ދިމިޤްރާތީ ތާރީޚުގައި ކަޅު ސަފުހާތަކެވެ. އަދުގެ ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވެރިކަމާއި ހަވާލުވެވަޑައިގަންނަވާ އެންމެ ފުރަތަމައަށް ދެއްވި ތަޤުރީރުގައިވެސް ކޮރަޕްޝަނަށް ހަރުއަޑުން ނޫނެކޭ ބުނާނެކަން ފާހަގަކުރެއްވިއެވެ. އަދި އެމަނިކުފާނުގެ ސަރުކާރުގައި އެކަމަށް ފިޔަވަޅުއަޅުއްވާތަން ފެނިގެންދާނެ ކަމުގެ ޔަޤީންކަން ދެއްވިއެވެ.

ދިވެހި ޤައުމުގެ ހިންގުމުގެ ނިޒާމުގެ ތެރޭގައި ހުރި މައްސަލަތައް ހައްލުކޮށް، ކޮރަޕްޝަނަށް މަގުފަހިވާ ގޮތަށް ހުޅުވިފައިހުރި ދޮރުތައް ބަންދު ކުރައްވަން އެމަނިކުފާނު މަސައްކަތް ފެށްޓެވިއެވެ. ސަރުކާރުގެ މާލީ ހިސާބުތައް ހެދުމުގައި ހުރި އޮޅުބޮޅުންތައް ފިލުވައި، ހަޤީޤީ މަންޒަރު ރައްޔިތުންނަށް ފެންނަ ގޮތް ހެއްދެވިއެވެ.

އެގޮތުން އެމަނިކުފާނުގެ ސަރުކާރުގައި ހިމެނޭ ފަރާތަކަށް ތުހުމަތެއް ކުރެވުމުންވެސް ފަސްޖެހުމެއް ނެތި އަދި ހުރި މަޤާމަކަށް ނުބަލައި ފިޔަވަޅު އަޅުއްވާނެ ކަމުގެ އެންމެ ސާފު ހެކި މިދަނީ ފެންނަމުނެވެ. އަދި އެކަމުގައި އެމަނިކުފާނު އަޅުއްވާ އަވަސް ފިޔަވަޅުތަކުން، ސަރުކާރުގެ ތެރެއިން ކޮރަޕްޝަނަށް ޖާގަ ނުޖެއްވާނެކަން ހާމަވެއެވެ.

މިއަދު އެންމެ ބޮޑު އެއް ތުހުމަތެއް ކުރެވެނީ، ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ)ގެ މައްޗަށެވެ. ކުރީ ސަރުކާރުން ހިންގި ގެދޮރުވެރިޔާ ސްކީމާއި މެދު ގިނަ ބައެއްގެ ޝަކުވާތަކެއް އޭރުވެސް ހުއްޓެވެ. ނަމަވެސް ސްކީމުގެ އުސޫލްތަކާއި އެއްގޮތަށް ބިން ލިބިފައިވާ ފަރާތްތަކަށް އެ ބިންތައް ސަރުކާރުން ހަވާލުކުރިއެވެ. މައްސަލަ ޖެހުނީ ސަރުކާރު ކުންފުންޏެއްގެ ޑެޕިއުޓީ މެނޭޖިންގް ޑިރެކްޓަރަކަށް ޝަރުތު ހަމަނުވާއިރުވެސް ބިމެއް ލިބުނު ކަމުގެ ލިޔުމެއް ހުށަހަޅައިގެން މަސައްކަތް ފެށި ހިސާބުންނެވެ.

މިކަން ސޯޝަލް މީޑިއާގައި ފެންމަތިވި ހިސާބުން ދިވެހި ފުލުހުން ވަނީ އެކަމުގެ ޖިނާޢީ ތަޙުޤީގެއް ފަށާފައެވެ. އަދި އެމައްސަލަ އެންޓި-ކޮރަޕްޝަނުންވެސް ވަނީ ބަލަން ފަށާފައެވެ. މި މައްސަލަ ފެންމަތިވެ ތަހުޤީޤު ކުރަން ފެށިތާ 24 ގަޑިއިރުތެރޭ މައްސަލައިގެ ޒިންމާ ނަގަންޖެހޭ ލެވަލްގައިތިބި ފަރާތްތައްވަނީ މަސްޢޫލިއްޔަތުތަކުން އެކަހެރިކޮށްފައެވެ. މިކަމުންވެސް ހާމަވަނީ އަދުގެ ސަރުކާރުން ކޮރަޕްޝަންގެ އަމަލުތައް ބަލައިނުގަންނާނެ މިންވަރެވެ.

އަދުގެ ރައީސުލްޖުމްހޫރިއްޔާ ވިދާޅުވަނީ އެމަނިކުފާނުގެ ސަރުކާރުގެ ސިޔާސަތަކަށް ވާނީ، ކޮރަޕްޝަނާ ދެކޮޅަށް ކުރެވޭ ކޮންމެ ކަމެއްގައި، އެއީ ކުޑަޔަސް، ބޮޑަސް މި ސަރުކާރުގެ އެއްބާރުލުން ފުރިހަމައަށް ދޭނެ ކަމުގެ ޔަޤީންކަން ދިނުންކަމަށެވެ. އެމަނިކުފާނު ވިދާޅުވީ ކޮރަޕްޝަން އުފަންވާ ހާއްޔަކީ ހުދު ގިރުވާނު ކަމަށް ބުނެވޭއިރު، ކޮރަޕްޝަންގެ ކުށަކީ ހުދު ގިރުވާނުލީ ގިންތީގެ ކުށެއް ކަމަށްވެސް ބުނެވޭކަމަށެވެ. އެހެންކަމުން އިޚުލާސްތެރިވެ ރަނގަޅުމަގުން ހިނގަން ފައިތިލަ ސީދާކުރަންޖެހޭކަމަށް ރައީސް ވިދާޅުވިއެވެ.

"އަޅުގަނޑު ތިޔަބޭފުޅުންނަށް އަރުވާނެ ޔަޤީންކަމަކީ، އިރާދަކުރެއްވިއްޔާ އަޅުގަނޑުމެންގެ ސަރުކާރު ކޮރަޕްޓް ނުވެ ހިންގާނަންކަން. ހަމަ އެހެންމެ، އަޅުގަނޑުމެންގެ ސަރުކާރުގައި އެއްވެސް ފަރާތަކުން އެފަދަ ކަމެއް ހިންގާކަން ސާބިތުވެއްޖެ ހާލަތެއްގައި ނަމަ، އެފަރާތަކާމެދު އަޅަންޖެހޭ ޤާނޫނީ ފިޔަވަޅު އަޅުގަނޑުމެން ފަސްޖެހުމެއްނެތި އަޅާނެކަން. އެކަމުގައި އަޅުގަނޑުމެން އެއްވެސްވަރަކަށް ޚިޔާލުތަފާތުވުމެއް ނޯންނާނެކަން" 2023 ވަނަ އަހަރު ފާހަގަކުރި ބައިނަލްއަޤްވާމީ އެންޓި-ކޮރަޕްޝަން ދުވަހުގެ މުނާސަބަތުގައި ބޭއްވެވި ޖަލްސާގައި ރައީސުލްޖުމްހޫރިއްޔާ ވިދާޅުވިއެވެ.

ސަރުކާރުގެ ކުންފުނިތަކުގެ ވެރިންނަށް ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވަނީ ކޮރަޕްޝަން ބަލައިނުގަންނާނެކަން ވަނީ އަންގާފައެވެ. އެގޮތުން އެފަދަ އެއްވެސް ޢަމަލެއް ހިންގައި ނުވަތަ އެފަދަ ކަމަކަށް މަގުފަހިކޮށްދިންކަން އެމަނިކުފާނަށް އެނގޭ ހިސާބުން ވަގުތުން ފިޔަވަޅު އަޅުއްވާނެ ކަމަށް އެމަނިކުފާނު ވަނީ ވިދާޅުވެފައެވެ.

އަދުގެ ސަރުކާރުން ބޭނުންވަނީ ރައްޔިތުންގެ ކުރިއެރުމާއި ފާގަތިކަމަށް ސީރިއަސް މަސައްކަތް ކުރަންކަމަށާއި އެމަނިކުފާނުގެ ސަރުކާރެއްގައި ކޮރަޕްޝަނަށް މަގުފަހިވާފަދަ އެއްވެސް ކަމެއް ކުރުމުގެ ފުރުޞަތު ނުދެއްވާނެކަމުގެ ޔަގީންކަން ރައީސުލްޖުމްހޫރިއްޔާ ވަނީ ދެއްވާފައެވެ. އަދި އެފަދަކަމެއް ކުރާ ފަރާތެއް ފެނިއްޖެނަމަ ޚުދު އެމަނިކުފާނު އިސްވެ ފުރަތަމަ އެކަމަށް ފިޔަވަޅު އަޅުއްވާނެކަން ރައީސް ވަނީ ހާމަކުރައްވާފައެވެ.

ރައްޔިތުން ސަރުކާރަށް ކުރާ ތާޢީދު އެންމެ ކުޑަކޮށްލާ އެންމެ ނޭދެވޭ އެއްކަމަކީ ކޮރަޕްޝަނުގައި ޖެހުމެވެ. އެކަން ދެނެތިބެ އަދުގެ ސަރުކާރުންދަނީ ރައްޔިތުންގެ އިތުބާރާއި ލޯބި ހޯދަން ކޮރަޕްޝަންފަދަ ނޭދެވޭ އަމަލުތަކަށް ނޫނެކޭ ބުނާނެކަން ހާމަކުރަމުންނެވެ.