ފަރުދުންގެ ހައްޤުތަކަށް އިޙްތިރާމްކުރާ ފަދައިން ދައުލަތުގެ ހައްޤުތަކަށް އިޙްތިރާމް ކުރަން ޖެހޭ: ވަޒީރު ނާޒިމް

ފަރުދުންގެ ހައްޤުތައް އިޙުތިރާމްކުރާ ފަދައިން ދައުލަތުގެ ހައްޤުތަކަށްވެސް އިޙްތިރާމް ކުރަން ޖެހޭ ކަމަށް ސިއްޙަތާއި ބެހޭ ވަޒީރު އަބްދުﷲ ނާޒިމް އިބްރާހީމް ވިދާޅުވެއްޖެއެވެ. ވަޒީރު މިހެން ވިދާޅުވީ، ބައިނަލްއަޤްވާމީ އިންސާނީ ހައްޤުތަކުގެ ދުވަހުގެ ރަސްމީ ޖަލްސާގައި ވާހަކަ ދައްކަވަމުންނެވެ.

އައްޑޫސިޓީގައި ކުރިއަށްގެންދިޔަ ބައިނަލްއަޤްވާމީ އިންސާނީ ހައްޤުތަކުގެ ދުވަހުގެ ރަސްމީ ޖަލްސާ ޝަރަފުވެރިކޮށްދެއްވައި ވާހަކަފުޅުދައްކަވަމުން ސިއްޙަތާއި ބެހޭ ވަޒީރު އަބްދުﷲ ނާޒިމް ވަނީ އިންސާނީ ހައްޤުތައް ކަށަވަރު ކުރުމުގައި ރާއްޖެއިން މިހާތަނަށް ގިނަ ކުރިއެރުންތަކެއް ހޯދާވާފައިވާކަން ފާހަގަކުރައްވާފައެވެ. އެގޮތުން ތަހުޒީބު މުޖްތަމަޢުގެ ތަރައްޤީއާއި އިންސާނީ ހައްޤުތައް ގުޅިފައިވާކަން ވަޒީރު ފާހަގަކުރެއްވިއެވެ.

އެއާއެކު އިންސާނީ ހައްޤުތައް ކަށަވަރު ކުރެވޭނީ ދައުލަތުގެ ހިންގުން ހަރުދަނާ ކުރެވިގެން ކަން އެމަނިކުފާނު ވިދާޅުވިއެވެ. ވަޒީރު ނާޒިމްގެ ވާހަކަފުޅުގައި، އިންސާނީ ހައްޤުތައް ކަށަވަރުކުރުމުގައި ފަރުދުންގެ ހައްޤުތަކަށް އިޙުތިރާމް ކުރާ ފަދައިން ދައުލަތުގެ ހައްޤުތަކަށް އިޙްތިރާމުގެ މުހިއްމުކަން ވަނީ ފާހަގަކުރައްވާފައެވެ.

"ވަކިވަކި ފަރުދުންގެ ހައްޤުތަކަށް އިޙްތިރާމް ކުރާ ފަދައިން ދައުލަތުގެ ހައްޤުތަކަށްވެސް އިޙްތިރާމް ކުރަންޖެހޭ. މިކަން ކުރެވޭނީ މީހުންގެ ވިސްނުން ބަދަލުކޮށްގެން" ސިއްޙަތާއި ބެހޭ ވަޒީރު ވިދާޅުވިއެވެ.

މިރަސްމިއްޔާތުގެ ތެރެއިން ވަޒީރު އަބްދުﷲ ނާޒިމް ވަނީ ހިއުމަން ރައިޓްސް ކޮމިޝަނުން މިއަހަރު ކޮށްފައިވާ "ރައިޓް ސައިޑް އޮފް ލައިފް" ދިރާސާގެ ރިޕޯޓް ނެރެދެއްވާފައެވެ. މި ދިރާސާއަކީ އެކޮމިޝަނުގެ މަސައްކަތާއި ރާއްޖޭގެ އިންސާނީ ހައްޤުތައް ކަށަވަރު ކުރެވޭ މިންވަރު ވަޒަންކޮށް، ހައްޤުތަކަށް އާންމުން ހޭލުންތެރިވެފައިވާ މިންވަރު ދެނެގަތުމަށް ކުރާ ދިރާސާއެކެވެ.

މިރަސްމީއްޔާތުގައި ވާހަކަފުޅުދައްކަވަމުން ހިއުމަން ރައިޓްސް ކޮމިޝަންގެ ރައީސް މަރިޔަމް މުނާ ވިދާޅުވީ، އިންސާނީ ހައްޤުތަކުގެ ދުވަސް ފާހަގަކުރަމުންދާއިރު މިއަހަރު އެކޮމިޝަނަށް ކުރެވުނު އެންމެ މުހިންމު އެއް މަސައްކަތަކީ ރައިޓް ސައިޑް އޮފް ލައިފް ދިރާސާގެ މަސައްކަތް ކަމަށެވެ. އަދި ދިރާސާގެ އަލީގައި ފާހަގަވިކަންކަން ދައުލަތުގެ އިދާރާތަކަށް ހުށަހަޅުއްވައި އިސްލާހުކުރަން މަސައްކަތް ކުރައްވާނެ ކަމަށް މުނާ ވިދާޅުވިއެވެ.

ބައިނަލްއަޤްވާމީ އިންސާނީ ހައްޤުތަކުގެ ދުވަސް މިއަހަރު އައްޑޫސިޓީގައި ފާހަގަކުރަމުންދާއިރު، މި ދުވަސް ފާހަގަކުރުމުގެ އެ ސިޓީގެ ހިތަދޫގައި އާއިލީ ހަވީރެއް ބޭއްވުމަށް ވަނީ ހަމަޖެހިފައެވެ.