އެކިއެކި އިންތިޚާބުތަކާ ދިމާކޮށް 1،900 ކުށްވެރިން މިދިޔަ ސަރުކާރުން މިނިވަން ކުރި: ރައީސް
-
ބަދަލު ހިފުމުގެ ރޫހުގައި އެއްވެސް ކަމެއް ނުކުރައްވާނެކަމަށް ވިދާޅުވި
-
މި ސަރުކާރުން މާފުދީ މިނިވަންކޮށްފައިވާނީ 86 ކުށްވެރިން
އެކިއެކި އިންތިޚާބުތަކާ ދިމާކޮށް 1،905 ކުށްވެރިން މިދިޔަ ސަރުކާރުން މިނިވަންކުރިކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ތޮއްޑޫގެ ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުވަނީ މިދިޔަ ސަރުކާރުގައި މާފުދީ، މިނިވަންކުރި ކުށްވެރިންގެ އަދަދުތައް ހާމަކުރައްވައިފައެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ މިދިޔަ ސަރުކާރުގައި ކޮންމެ އިންތިޚާބަކާ ދިމާކޮށް އެތައް ސަތޭކަ ކުށްވެރިންނެއް ދޫކުރިކަމަށެވެ. އެގޮތުން މިދިޔަ ސަރުކާރުގައި ގައިދީން މިނިވަންކޮށްފައިވަނީ ގައުމާ މެދު ވިސްނާލުމެއް ނެތިކަމަށް ރައީސް ވިދާޅުވިއެވެ. ރައީސް ވިދާޅުވީ މިދިޔަ ސަރުކާރުން 1905 ކުށްވެރިން ދޫކޮށްލީ އެކި އިންތިޚާބުތަކާ ދިމާކޮށްކަމަށެވެ.
"އެކި އިންތިޚާބުތަކާ ދިމާކޮށް ޖަލުތަކުގައި ތިބޭ ކުށްވެރިން އެއްވެސް ވަރެއްގެ ރިހެބްލިޓޭޝަނެއްގެ ތެރެއަށް ނުގޮސް މަގުމައްޗަށް ދޫކޮށްލާތަން ފެނުނު. އޭގެ ސަބަބުން ވަރަށް ގިނަ އެކި ކަހަލަ ނުރައްކާތެރި ކަންތައް އަނިޔާވެރި ކަންކަން މަގުމަތީ ހިނގާ. ހަމަނުޖެހުން އުފެދިފައިވޭ." ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.
މިދިޔަ ސަރުކާރުން ދޫކޮށްލި ކުށްވެރިންގެ ތަފާސްހިސާބު
-2019 ވަނަ އަހަރު 762 ކުށްވެރިން ދޫކޮށްލި
-2021 ވަނަ އަހަރު 458 ކުށްވެރިން ދޫކޮށްލި
-2022 ވަނަ އަހަރު 256 ކުށްވެރިން ދޫކޮށްލި
-2023 ވަނަ އަހަރު 429 ކުށްވެރިން ދޫކޮށްލި
ރައީސް ވިދާޅުވީ އެ މަނިކުފާނުގެ ވެރިކަމުގައި ކްލެމެންސީއާއި އަދި ރައީސަށް ލިބިދީފައިވާ ބާރުގެ ތެރެއިން އަދަބު ލުއިކޮށްދީގެން މާފުދީ މިނިވަންކޮށްފައިވާނީ 86 ކުށްވެރިން ކަމަށެވެ. އަދި މި ސަރުކާރުން އިންތިޚާބުތަކާ ދިމާކޮށް ސިޔާސީ ވިސްނުމެއްގައި އެއްވެސް ބަޔަކު ޖަލުން ދޫކޮށްލާފައިނުވާނެ ކަމަށްވެސް ރައީސް ވިދާޅުވިއެވެ.
ޖަލުގައި ތިބޭ މީހުންނަށް ރިހެބްލިޓޭޝަނާއި ސަރުކާރުގެ މަޝްރޫއުތަކުގައި ބައިވެރިވެވޭ ގޮތަށް ކެބިނެޓުން ނިންމި ނިންމުން ފާހަގަކުރައްވައި ރައީސް ވިދާޅުވީ މީގެ ސަބަބުން ގައިދީން ޖަލުން ނުކުންނައިރު ތިބޭނީ ކަންތައްތަކެއް ދަސްވެފައި ކަމަށެވެ.
ރައީސް ވިދާޅުވީ ސަރުކާރުން ބޭނުންވަނީ މުޖުތަމަޢުއަށް ހަމަޖެހުން ގެންނަންކަމަށެވެ. އެހެންކަމުން ސިޔާސީ ވިސްނުމެއްގައި ބަދަލު ހިފުމުގެ ރޫހުގައި އެއްވެސް ކަމެއް ނުކުރައްވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.