އޮންލައިންކޮށް ހުށަހަޅާ ޕާސްޕޯޓުތައް ކުޑަހުވަދޫން މިހާރު ނެގޭނެ

"އިމުގާ" މެދުވެރިކޮށް އޮންލައިންކޮށް ހުށަހަޅާ ޕާސްޕޯޓުތައް ދ. ކުޑަހުވަދޫން ނެގޭނެ އިންތިޒާމް ހަމަޖައްސައިފިއެވެ.

އިމިގްރޭޝަނުން ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވީ "އިމުގާ" މެދުވެރިކޮށް އޮންލައިންކޮށް ހުށަހަޅާ ޕާސްޕޯޓުތައް ކުޑަހުވަދޫން ނެގޭނެ އިންތިޒާމު މިހާރު ހަމަޖެހިފައިވާ ކަމަށެވެ. އެގޮތުން ޕާސްޕޯޓަށް އެދި ހުށައަޅާއިރު، ޕާސްޕޯޓް ނަގަން ބޭނުންވާ ތަން ނުވަތަ ކަލެކްޝަން ޕޮއިންޓެއްގެ ގޮތުގައި ކުޑަހުވަދޫ ޖެހުމުން ޕާސްޕޯޓް އެރަށުން ލިބޭނެ ކަމަށް އިމިގްރޭޝަނުން ވިދާޅުވެއެވެ.

ކުޑަހުވަދޫން ޕާސްޕޯޓު ނެގޭނީ ކޮންމެ ހަފްތާއެއްގެ ހޯމަ ދުވަހުއެވެ. މިއީ ކުޑަހުވަދޫ އާއި އެ އަތޮޅުގެ ރައްޔިތުންނަށް ލިބުނު ވަރަށް ބޮޑު ފަސޭހައަކަށް ވާނެއެވެ. އެއީ މީގެކުރިން އެރަށުގެ ރައްޔިތުންނާއި ކައިރީގައި އޮންނަ އެހެން ރަށްރަށުގެ ރައްޔިތުންވެސް ޕާސްޕޯޓް ބަލާ އަންނަން ޖެހެނީ މާލެއަށެވެ.

ދ. އަތޮޅުން ޕާސްޕޯޓުގެ ޚިދުމަތް!
"އިމުގާ" މެދުވެރިކޮށް އޮންލައިންކޮށް ހުށަހަޅާ ޕާސްޕޯޓުތައް މިހާރު ދ. ކުޑަހުވަދޫ އިން ނެގުމުގެ އިންތިޒާމް ވަނީ ހަމަޖެހިފައި.@min_mohst @ShamaanW @HomeMinistrymv #DhivehiPassport #MaldivesImmigration pic.twitter.com/yEgCtQ6cPM

— Maldives Immigration (@ImmigrationMV) December 1, 2024

ދިވެހި ރައްޔިތެއްކަން އަންގައިދޭ ކާޑާއި ޕާސްޕޯޓުގެ ޚިދުމަތް ރައްޔިތުންނާ ގާތުން އަވަހަށް ފޯރުކޮށްދިނުމުގެ ކަންކަން މުޅި ރާއްޖެއަށް ފުޅާކުރުމުގެ މަޝްރޫއު މިދިޔަ ނޮވްމެބަރު މަހުގެ 16 ވަނަ ދުވަހު ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވަނީ އިފްތިތާހްކޮށްދެއްވާފައެވެ. އައިޑީކާޑާއި ޕާސްޕޯޓުގެ ޚިދުމަތް މުޅި ރާއްޖެއަށް ފުޅާކުރުމުގެ މަޝްރޫއު އެއްކޮށް ނިންމުމަށް ހަމަޖެހިފައިވަނީ އަންނަ އަހަރުގެ ނިޔަލަށެވެ.

ޕާސްޕޯޓުގެ ޚިދުމަތް މިހާރު ލިބެނީ މާލެ ސަރަޙައްދުގެ އިތުރަށް ސިޓީތަކާއި ހއ. ދިއްދޫންނެވެ. އަދި މިއަހަރު ލ. ފޮނަދޫގައި އެ ޚިދުމަތް ފެށުމަށް އޮތީ ނިންމާފައެވެ.