ހަނިމާދޫ އެއަރޕޯޓުގައި ސީޕްލޭންގެ ޚިދުމަތް ވަރަށް އަވަހަށް ފެށޭނެ: އެމްއޭސީއެލް

ހަނިމާދޫ އިންޓަރނޭޝަނަލް އެއަރޕޯޓުގައި ސީޕްލޭންގެ ޚިދުމަތް ވަރަށް އަވަހަށް ފަށާނެ ކަމަށް މޯލްޑިވްސް އެއަރޕޯޓްސް ކޮމްޕެނީ ލިމިޓެޑް، އެމްއޭސީއެލްއިން ވިދާޅުވެއްޖެއެވެ.

ސަރުކާރުންވަނީ ރީޖަނަލް އެއަރޕޯޓްސް ކޮމްޕެނީ، މޯލްޑިވްސް އެއަރޕޯޓްސް ކޮމްޕެނީ ލިމިޓެޑް، އެމްއޭސީއެލްގެ ދަށަށް ބަދަލުކުރުމަށް ނިންމަވާފައެވެ.

ރައްޔިތުންގެ މަޖިލީހުގެ ސްޓޭޓް އޯންޑް އެންޓަރޕްރައިސަސް، އެސްއޯއީ ކޮމިޓީގައި ވާހަކަދައްކަވަމުން އެމްއޭސީއެލްގެ ޑެޕިއުޓީ މެނޭޖިން ޑިރެކްޓަރ މުޖުތަބާ ލަތީފު ވިދާޅުވީ އެމްއޭސީއެލްގެ ދަށަށް ރީޖަނަލް އެއަރޕޯޓްސް ގެނައުމަށްޓަކައި ކުރަންޖެހޭ މަސައްކަތްތައް ކުރެވެމުންދާކަމަށެވެ. އެގޮތުން މި ހަފްތާގެތެރޭގައި ހިއްސާ ބަދަލުކުރާ އެއްބަސްވުމެއްގައި ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު، ޕީސީބީ، ރީޖަނަލް އެއަރޕޯޓްސް އަދި އެމްއޭސީއެލްއާ ދެމެދު ސޮއިކުރުމަށް ހަމަޖެހިފައިވާ ކަމަށް މުޖުތަބާ ވިދާޅުވިއެވެ.

އަދި މިގެންނަ ބަދަލާއެކު ހަނިމާދޫ އެއަރޕޯޓުން ދޭ ޚިދުމަތްތައް ރަނގަޅުކުރުމުގެ ޕްލޭންތަކެއް އެބަހުރިކަމަށާއި، އާމްދަނީ އިތުރުކުރުމަށްޓަކައި ކުރެވޭނެ އެންމެ މުހިންމު އެއް މަސައްކަތަކީ ހަނިމާދޫގައި ސީޕްލޭންގެ ޚިދުމަތް ފެށުން ކަމަށް މުޖުތަބާ ވިދާޅުވިއެވެ.

"ހަނިމާދޫ ބޭނުންވަނީ ފައިދާވާ އެއަރޕޯޓަކަށް ހެދުން، ވަރަށް އަވަހަށް ސީޕްލޭން ގާއިމްކުރާނަން، އިންޓަރނޭޝަނަލް އެއަރޕޯޓެއް ފީސިބްލްވާނީ އެފަދަ ޚިދުމަތެއް ދެވިގެން،" މުޖުތަބާ ވިދާޅުވިއެވެ.

މުޖުތަބާ ވިދާޅުވީ ސީޕްލޭން ޓަރމިނަލެއްވެސް އެތަނުގައި ތަރައްޤީކުރާނެ ކަމަށެވެ. އަދި މިކަން ވަރަށް އަވަހަށް ހާސިލްވާނެކަމުގެ ޔަޤީންކަން މުޖުތަބާ ދެއްވިއެވެ.

ހަނިމާދޫ އިންޓަރނޭޝަނަލް އެއަރޕޯޓުގެ މަސައްކަތްތައް މިހާރު ކުރިއަށްދާގޮތަށް ބަލާއިރު، އަންނަ އަހަރުގެ ފެބްރުއަރީމަހު ނިމޭނެ ކަމަށް ވަނީ ލަފާކޮށްފައެވެ. ހަނިމާދޫ އިންޓަރނޭޝަނަލް އެއަރޕޯޓު މަޝްރޫޢަކީ މުޅި އުތުރުގެ ފަތުރުވެރިކަމާއި ގުޅިފައިވާ ބޮޑުތިލަދުންމަތީގެ އިޤްތިޞާދާއި ސީދާ ގުޅިފައިވާ މަޝްރޫޢެކެވެ. މިމަޝްރޫޢުގެ މަސައްކަތް ފެށީ މިދިޔަ އަހަރުގެ ޖެނުއަރީ މަހުގެ ތެރޭގައެވެ.

މި މަޝްރޫޢުގެދަށުން މިއަހަރުގެ އޮކްޓޫބަރުމަހު އައު ރަންވޭ ވަނީ އިފްތިތާހުކޮށްފައެވެ. އައު ރަންވޭއަކީ 2465 މީޓަރުގެ ދިގު ރަންވޭއެކެވެ. އަލަށް ތަރައްޤީކުރާ ރަންވޭއާ ކުރީގެ ރަންވޭ އޮތް ސަރަޙައްދުގައި ފުށުއެރުންތަކެއް ހުރުމުގެ ސަބަބުން، އައު ރަންވޭގެ ފުރަތަމަ ފޭސްގައި 1200 މީޓަރުގެ ސަރަޙައްދު ތަރައްޤީކޮށް، އެ ބައި ބޭނުންކުރަން ހުޅުވާލީ މިއަހަރުގެ ޖެނުއަރީމަހުގެ 28 ވަނަ ދުވަހުއެވެ.

ކުރިން އޮތް ރަންވޭއަކީ 150 މީހުންގެ އެއަރ ކްރާފްޓްތައް ޖެއްސޭ ފެންވަރުގެ ރަންވޭއެއް ނަމަވެސް ބޮޑު ކުރި ރަންވޭއާއެކު 250-300 މީހުން އުފުލޭ ބޮޑެތި އެއަރކްރާފްޓްތައް ޖެއްސޭނެއެވެ. ހަނިމާދޫ އިންޓަރނޭޝަނަލް އެއަރޕޯޓް މަޝްރޫޢަކީ އަތޮޅުތަކުގައި މިހާތަނަށް ކުރިއަށްގެންދާ އެންމެ ބޮޑު އެއް މަޝްރޫޢެވެ. މިއީ 136.6 މިލިއަން ޑޮލަރުގެ މަޝްރޫޢެކެވެ. މިއެއަރޕޯޓް ތަރައްޤީކޮށް ނިމުމުން އަހަރަކު 1.3 މިލިއަން ފަސިންޖަރުންނަށް ޚިދުމަތް ދެވޭނެއެވެ.