ކުރީގެ ސަރުކާރުތަކަށް އަތްލަން ނުކެރުނު އިޖްތިމާޢީ ބޮޑެތި މައްސަލަތައް ހައްލުކޮށް ނަތީޖާ ދައްކާނަން: ވަޒީރު އިޙްސާން

ކުރީގެ އެއްވެސް ސަރުކާރަކަށް އަތްލާން ނުކެރުނު އިޖްތިމާޢީ ބޮޑެތި މައްސަލަތައް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ހައްލުކޮށްދެއްވާ އެކަންކަމުގައި ރައްޔިތުންނަށް ނަތީޖާ ދައްކާނެކަމަށް ދާޚިލީ ސަލާމަތާއި ފަންނިއްޔާތާ ބެހޭ ވަޒީރު ޢަލީ އިޙްސާން ވިދާޅުވެއްޖެއެވެ.

ވަޒީރު ވިދާޅުވީ، މަސްތުވާތަކެއްޗާއި، ގޭންގް ކުށްތަކާއި، ޤަވާއިދާ ޚިލާފަށް އުޅޭ ބިދޭސީންގެ މައްސަލަތައް ފަދަ ރާއްޖޭގައި ޒަމާނުއްސުރެ މޫލާފައިހުރި ބޮޑެތި އިޖްތިމާޢީ މައްސަލަތައް ހައްލުކުރުމަށް މި ސަރުކާރުގެ ފުރަތަމަ 52 ހަފްތާގެ ތެރޭގައި މުހިންމު މަސައްކަތްތަކެއް ފެށިފައިވާކަމަށެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރަށް 1 އަހަރު ފުރުމާގުޅިގެން ޕީއެސްއެމް ނިއުސްއިން ގެނެސްދިން "ހަފްތާ 52" ޕްރޮގްރާމުގައި ދާޚިލީ ސަލާމަތާއި ފަންނިއްޔާތާ ބެހޭ ވަޒީރު ޢަލީ އިޙްސާން ވަނީ އެ ވުޒާރާގެ ދަށުން ކުރެވުނު މުހިންމު މަސައްކަތްތަކާއި ކާމިޔާބީތައް ހިއްސާކުރައްވާފައެވެ.

ވަޒީރު ވިދާޅުވީ، އެ ވުޒާރާއާ މެންޑޭޓްކޮށްފައިވާ ކަންކަމުގެ ތެރެއިންވެސް ރައީސުލްޖުމްހޫރިއްޔާގެ ޚާއްސަ އިސްނެންގެވުމަކަށް ރާއްޖޭގައި ހުރި އިޖްތިމާޢީ ބޮޑެތި މައްސަލަތަކަށް އިސްކަންދީ މުހިންމު މަސައްކަތްތަކެއް ފަށާފައިވާކަމަށެވެ. އަދި މި މަސައްކަތްތައް ކުރުމުގައި ދާޚިލީ ސަލާމަތާއި ގުޅުންހުރި ހުރިހާ އިދާރާއެއް އެއް ފުރާޅެއްގެ ދަށަށް ގެނެސްފައިވުމަކީ ރޭވުންތެރިކަމާއެކު ކަންކަން ތަންފީޒުކުރުމަށް ލިބިގެންދިޔަ ބޮޑު ބާރެއްކަމަށް ވަޒީރު ވިދާޅުވިއެވެ.

"ވުޒާރާ މިގޮތަށް ބައްޓަންކުރެވި ޚާއްސަކޮށް މިކަމާގުޅޭ މައްސަލަތައް ހައްލުކުރެވޭނެ ހުރިހާ އިދާރާއެއް މި ވުޒާރާގެ ދަށަށް ގެނެސް ބައްޓަންކުރެއްވި ކުރެއްވުމުން އެނގިގެން ދަނީ ރައްޔިތުންގެ ސަލާމަތާއި ރައްކާތެރިކަމަށް ރައީސް ދެއްވާ އަހައްމިއްޔަތު. މީގެކުރިން އެކިއެކި ވުޒާރާތަކުގެ ދަށުން މި އިދާރާތައް މަސައްކަތްކުރަމުން އައިއިރުގައި ބައެއް ކަންކަން ނުކުރެވި، ބައެއް ކަންކަން ފަހަތަށްޖެހި، ކުރަން އުނދަގޫވެފައި އޮތީ. އެހެންނަމަވެސް ރައީސް އެކަން ދެކެވަޑައިގެން އެއް ވުޒާރާއެއްގެ ދަށަށް މިތަންތަން ގެނައީ ކޮލާބްރޭޓްކޮށްގެން ރަނގަޅަށް ގުޅިގެން މަސައްކަތްކޮށް ރައްޔިތުންގެ ސަލާމަތާއި ރައްކާތެރިކަން ކަށަވަރުކޮށްދިނުމަށްޓަކާ." ވަޒީރު ޢަލީ އިޙްސާން ވިދާޅުވިއެވެ.

ވަޒީރު އިޙްސާން ވިދާޅުވީ، ސަރުކާރުގެ ފުރަތަމަ 52 ހަފްތާގެ ތެރޭގައި ކުރެވުނު މަސައްކަތްތަކުންވެސް މަސްތުވާތަކެއްޗާއި، ގޭންގު ކުށްތަކާއި، ޤަވާއިދާ ޚިލާފަށް އުޅޭ ބިދޭސީންގެ މައްސަލަ ޙައްލުކުރުމަށްޓަކާ ކާމިޔާބު މަސައްކަތްތަކެއް ފެށިފައިވާކަމަށެވެ. އަދި މިކަންކަމުގައި ފާހަގަކުރެވޭ ފަދަ ކުރިއެރުންތަކެއް ލިބިފައިވާކަމަށެވެ.

"ގޭންގު މައްސަލަ އެއްކޮށް ހައްލުކުރުމާއި ޑްރަގްގެ މައްސަލަ އެއްކޮށް ހައްލުކުރުމާއި ޤަވާއިދާ ޚިލާފަށް އުޅޭ ބިދޭސީންގެ މައްސަލަ އެއްކޮށް ހައްލުކުރުމާއި ކުށުގެ މާހައުލުގައި އުޅޭ ކުޑަކުދިންގެ މައްސަލަތައް ހައްލުކުރުމާއި ރާއްޖޭގެ ޖަލުތަކުގައި މި ދިމާވާ މައްސަލަތައް ހައްލުކުރުން، މިއީ އަޅުގަނޑު ފާހަގަކޮށްލާނެ ބޮޑެތި ކަންކަން. އަޅުގަނޑުމެންނަށް މި ދާއިރާއިން ބޮޑެތި ކާމިޔާބީތައް ޙާޞިލުކުރެވިފައިވަނީ، ރަނގަޅު ނަތީޖާތަކެއް ނެރެވިފައި ބޮޑެތި މަސައްކަތްތައް ފެށިފައި، އަދި އަންނަ އަހަރަށް ލަފާކުރާ މަސައްކަތްތައް ފެށުމަށްޓަކާ ކުރަންޖެހޭ ވަރަށް ގިނަ ކަންކަން ކުރެވި ނިންމާފައި މިވަނީ މި 1 އަހަރު ދުވަހުގެ ތެރޭގައި." ވަޒީރު ވިދާޅުވިއެވެ.

ދާޚިލީ ސަލާމަތާއި ފަންނިއްޔާތާ ބެހޭ ވަޒީރު ޢަލީ އިޙްސާން ވިދާޅުވީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ޚާއްސަ އިރުޝާދާއެކު ކަނޑާއި ވައިގެމަގުން ރާއްޖެއަށް މަސްތުވާތަކެތި އެތެރެކުރުމަށް ހުރި ދޮރުތައް ބަންދުކޮށް، މަސްތުވާތަކެތީގެ ވިޔަފާރިކުރާ ނެޓްވޯކްތައް ހުއްޓުވުމަށް ޚާއްސަ އިސްކަމެއްދީގެން މަސައްކަތްކުރަމުންދާކަމަށެވެ. އަދި މިފަދަ ކުށްތަކަށް އަރައިގަންނަ ފަރާތްތަކަށް ބޭނުންވާ ރިހެބިލިޓޭޝަން ފަރުވާގެ ނިޒާމު ހަރުދަނާކުރުމަށްވެސް މުހިންމު މަސައްކަތްތަކެއް ކުރަމުންދާކަމަށް ވަޒީރު ވިދާޅުވިއެވެ.

ހަމައެހެންމެ ގޭންގު ކުށްތައް ހުއްޓުވުމާއި، ސައިބަރ ކްރައިމްތައް ހުއްޓުވުމަށް ފުލުހުންގެ ތެރެއިން ކުރެވޭ މަސައްކަތްތައްވެސް ކުރިއަށްވުރެ ފުޅާކޮށްފައިވާކަމަށް ވަޒީރު ވިދާޅުވިއެވެ. ވަޒީރު ވިދާޅުވީ، މިފަދަ މައްސަލަތައް ހައްލުކުރުމަށްޓަކާ ފުލުހުންގެ ކެޕޭސިޓީ އިތުރުކުރުމަށް ކުރަންޖެހޭ މަސައްކަތްތަކާއެކުއެކީ، ޤާނޫނަށް ގެންނަންޖެހޭ އިސްލާޙުތައް ދެނެގަނެ، އެ ބަދަލުތައް ގެނައުމުގެ މަސައްކަތްތައްވެސް ކުރަމުންދާކަމަށެވެ.

މިއާއެކު މަސްތުވާތަކެއްޗާއި، ގޭންގު ކުށްތަކާއި، ޤަވާއިދާ ޚިލާފަށް އުޅޭ ބިދޭސީންގެ މައްސަލަ ހައްލުކުރުމަށް ކުރާ މަސައްކަތްތައް މިހާރަށްވުރެއްވެސް ފުޅާކުރެވި، މި ދާއިރާއިން ރައްޔިތުންނަށް ތަފާތު ބޮޑު ބަދަލުތަކެއް ގެނެސްދެވޭނެކަމަށް ދާޚިލީ ސަލާމަތާއި ފަންނިއްޔާތާ ބެހޭ ވަޒީރު ޢަލީ އިޙްސާން ވިދާޅުވިއެވެ.