ގެދޮރުވެރިކަމުގެ ރަން ޒަމާނަކަށް މިދިވެހިރާއްޖެ ގެންގޮސްދިނުމަކީ، މިނިވަންކަމާއި އިސްތިޤުލާލުގެ ވާހަކައަށްފަހު ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު އެންމެ އިސްކަންދެއްވާ އެއް ސިޔާސަތެވެ.
"ބިންވެރިކަމާއި ގެދޮރުވެރިކަމަކީ، ރާއްޖޭގައި ވަރަށް ޙައްސާސީ މައްސަލައެއް. އެކަމުގެ ސަބަބުން، އާއިލީ އިޖުތިމާޢީ މައްސަލަތައް ނިކުމޭ. ދީނީ، އަޚްލާޤީ މައްސަލަތައްވެސް އުފަންވޭ. ހަމަ އެހެންމެ، ޞިއްޙީ އެތައް ގެއްލުންތަކަކާވެސް ކުރިމަތިލާންޖެހޭ. އިރާދަކުރެއްވިއްޔާ، ބިންވެރިކަމާއި ގެދޮރުވެރިކަމުގެ ރަންޒަމާނެއް ދިވެހީންނަށް ގެނެސްދޭނީ، މި ފެށުނު ރިޔާސީ އައު ދައުރުގައި. އިރާދަކުރެއްވިއްޔާ ވަރަށް އަވަހަށް، ޒަމާނީ އައު ޝަހަރުތަކެއްގެ ޒީނަތްތެރި މަލަތައް، ދިވެހި ފަޅުފަޅުން އުފުލިލާނެ." ޒަޢާމަތާ ހަވާލުވެވަޑައިގެން، ޤައުމާ މުޚާޠަބު ކުރައްވައި ދެއްވި ފުރަތަމަ ތަޤުރީރުގައި ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވިއެވެ.
ރައީސުލްޖުމްހޫރިއްޔާ ވެރިކަމާ ހަވާލުވެވަޑައިގެން އެންމެ ފުރަތަމަ ނިންމެވި އެއް ނިންމެވުމަކީ، ސަރުކާރުގެ މަޝްރޫޢުތަކުން ދޫކޮށްފައިވާ އިޖްތިމާޢީ ބޯހިޔާވަހިތަކުގެ ކުލި ކުޑަކޮށްދެއްވުމެވެ. އެގޮތުން ވަޒީރުންގެ މަޖިލީހުގެ މަޝްވަރާއާއެކު ޑިސެމްބަރު މަހުގެ 5ވަނަ ދުވަހު، ރައީސުލްޖުމްހޫރިއްޔާވަނީ ހިޔާ ފްލެޓާއި، ވިނަރެސް އަދި އެހެނިހެން މަޝްރޫޢުތަކުން ލިބިފައިވާ ފްލެޓްތަކުގެ ކުލި ކުޑަކޮށް، އަދި އަރާފައިވާ ޖޫރިމަނާތައް މަޢާފްކޮށްދެއްވާފައެވެ. އަދި ހިޔާ ފްލެޓްތަކުގެ ފިނިޝިން މަސައްކަތަށް ހޭދަވި ފައިސާވެސް އިޢާދަކޮށްދެއްވަން ނިންމަވާ އެކަން ދަނީ ތަންފީޒުކުރަމުންނެވެ.
ދެން އެމަނިކުފާނު ފެއްޓެވީ ނިމުނު ސަރުކާރުން ރައްޔިތުންނަށް ވަޢުދުވެ، ނަމަވެސް ފުރިހަމަވުމާ ގާތަށްވެސް ގޮސްފައި ނުވާ ހައުސިން މަޝްރޫޢުތަކުގެ ބޮޑު ޒިންމާ ނަންގަވާ، އެމައްސަލަތައް ޙައްލުކޮށްދެއްވުމުގެ މަސައްކަތެވެ. އެގޮތުން ހުޅުމާލެ، ގުޅިފަޅު، ގިރާވަރުފަޅު ތަރައްޤީކުރުމުގެ ނަމުގައި ކުރީ ސަރުކާރުން ފެށި މަސައްކަތް ހުއްޓާނުލާ ރައްޔިތުންނަށް އެ ޙައްޤު އަދާކޮށްދެއްވާނެކަމުގެ ޔަގީންކަން ރައީސުލްޖުމްހޫރިއްޔާ ދެއްވިއެވެ. އޭގެދަށުން ހުޅުމާލެއިން ހަވާލުކުރަންޖެހޭ ބިންތައް މިހާރު ވަނީ ހަވާލުކޮށްފައެވެ.
އަދި ގިރާވަރުފަޅާއި ގުޅީފަޅު ހިއްކުމުގެ މަސައްކަތް ހުއްޓާނުލާ ކުރިއަށްގެންދެވުމާއި އެތަންތަން ތަރައްޤީކުރާނެގޮތުގެ މާސްޓަރ ޕްލޭން ފައިނަލް ކުރުމުގެ މަސައްކަތްތައް މިހާރުވެސް ދަނީ ކުރިއަށްގެންދަވަމުންނެވެ. އަދި ގިރާވަރު ފަޅުގައި ނެތްވަރުން ދޫކުރި ހާހަކަށްވުރެ ގިނަ ބިން ގުޅިފަޅަށް ވަނީ ބަދަލުކޮށްދެއްވާފައެވެ.
އެންމެ ބޮޑު މަސައްކަތެއް ކުރައްވަމުންދަނީ އޮޅުވާލި 4000 ފްލެޓް ލިސްޓްގެ މައްސަލަ ހައްލުކުރުމަށެވެ. އޭސީސީގެ ތަޙުޤީގުގައި ބުނެފައިވަނީ ފްލެޓް ދޭން ލިސްޓުގައި ހިމެނި %60 މީހުންގެ ޝަރުތު ހަމަނުވާކަމަށެވެ. އެހެންކަމުން އޭސީސީގެ އެންގުމާ އެއްގޮތަށް މައްސަލަ ހައްލުކުރުމަށް، އެކަމަށް ޚާއްސަ ހައުސިން ކޮމިޓީ އެކުލަވާލާ، ކޮމިޓީގެ މަސައްކަތްތައް މިހާރު ވަނީ ފުރިހަމަކޮށްފައެވެ. ކޮމިޓީގެ ލަފައާއި އެއްގޮތަށް، ގެދޮރުވެރިކަމާ ބެހޭ ވުޒާރާއިން މިހާރު ދަނީ ލިސްޓު އިސްލާހުކޮށް އަލުން
ނެރުމަށް ތައްޔާރުވަމުންނެވެ. މިމަޝްރޫޢުން ފްލެޓް ލިބޭނީ އޭގެ އެންމެ ހައްގުވެރިންނަށްކަމުގެ ޔަގީންކަން ރައީސުލްޖުމްހޫރިއްޔާ ވަނީ ދެއްވާފައެވެ.
މީގެއިތުރުން ރައީސުލްޖުމްހޫރިއްޔާގެ އެންމެ ބޮޑު ތަޞައްވުރު، ރަސްމާލެ ހިއްކުމުގެ މަސައްކަތް މިހާރު ފަށައިގެންދަނީ ކުރަމުންނެވެ. އެމަނިކުފާނުގެ ތަޞައްވުރަކީ މާލެ ސަރަޙައްދުގައި 65000 ގެދޮރު ޔަގީންކޮށްދިނުމެވެ. 1153 ހެކްޓަރުގެ ބިން ހިއްކާ ރަސްމާލެއިން އެކަނިވެސް 11000 ގޯއްޗާއި 26000 ފްލެޓް ތަރައްޤީކުރެއްވުމަށް ވަނީ ހަމަޖެހިފައެވެ.
މާލެ ސަރަޙައްދުގެ އިތުރުން އަތޮޅުތަކުގެ އެކި ސަރަހައްދުތަކަށް ބަހާލައިގެން 20000 ހައުސިން ޔުނިޓް ތަރައްޤީކުރެއްވުމަށް ވަނީ ނިންމަވާފައެވެ. މީގެތެރެއިން ބ.އޭދަފުށީގައި 1000 ހައުސިން ޔުނިޓް ތަރައްޤީކުރުމަށް ޗައިނާގެ ކުންފުންޏަކާ މިހާރު ވަނީ ހަވާލުކޮށްފައެވެ. އަދި އަރބަން ސެންޓަރުތަކުގެ ގޮތުގައި ތަރައްޤީކުރާ 7 ސަރަޙައްދުގައި ގިނަ މަޝްރޫއުތައް ހިންގާނެއެވެ.
ގެދޮރުވެރިކަމުގެ ދާއިރާއިން މުޅި ރާއްޖެ ހިމެނޭހެން ފައްޓަވާފައިވާ އެންމެ ބޮޑު މަސައްކަތަކީ "ހިޔާވެހި" ފައިނޭންސް ސްކީމްގެ މަސައްކަތެވެ. މިއީ ގެދޮރު އެޅުމަށް ދަތިވެފައިވާ ފަރާތްތަކަށް ޚާއްސަކޮށް، ބޭންކްތަކާއި ގުޅިގެން ކޮންމެ އަހަރަކު ދޫކުރާ 2 ބިލިއަން ރުފިޔާގެ ފައިނޭންސިން ފެސިލިޓީއެވެ. މިމަސައްކަތަށް ކޮންމެ އަހަރެއްގެ ބަޖެޓުން ސަރުކާރުން 1 ބިލިއަން ރުފިޔާ އިންވެސްޓްކުރުމަށް ރައީސް ވަނީ ނިންމަވާފައެވެ. މީގެތެރޭގައި ހިމެނެނީ ފުރަމާލެއަށް 6 މިލިއަން، އަރބަން ސެންޓަރުތަކަށް 3 މިލިއަން އަދި ވަކިވަކި ރަށްތަކަށް ދޫކުރާ 1 މިލިއަންގެ ލޯނެވެ. މިއީ %5 ގެ ޕްރޮފިޓް މާޖިނެއް ހިމެނޭގޮތަށް އިސްލާމިކް ޝަރީޢާގެ އުސޫލުތަކާއި އެއްގޮތްވާގޮތުގެ މަތިން ދޭ ލޯނެކެވެ. މި ފުރުޞަތަށް މިހާރު ވަނީ ހުޅުވާލާފައެވެ.
އަންނަ އަހަރުގެ ބަޖެޓަކީ މިހާތަނަށް ގެދޮރުވެރިކަމުގެ ދާއިރާއަށް ކަނޑައަޅާ އެންމެ ބޮޑު ބަޖެޓެވެ. ގެދޮރުއެޅުމަށް ދޫކުރާ 2 ބިލިއަންގެ ފައިނޭންޝަލް ފެސިލިޓީގެ އިތުރުން، ސަރުކާރުން ހިންގާ ގެދޮރު ބިނާކުރުމުގެ ޢުމްރާނީ މަޝްރޫޢުތަކަށް 1.8 ބިލިޔަން ރުފިޔާ ބަޖެޓުގައި ވަނީ ކަނޑައަޅާފައެވެ.
"ބޯހިޔާވަހިކަމުގެ މައްސަލަ ޙައްލުކުރުމަށް އަންނަ އަހަރުގެ ބަޖެޓުގައި ޚާއްސަ އިސްކަމެއް ދޭނަން. އަންނަ އަހަރުގެ ބަޖެޓަކީ ރާއްޖޭގެ ތާރީޚުގަވެސް ގެދޮރުވެރިކަމަށްޓަކާ އެންމެ ބޮޑަށް މަގުފަހިކޮށްދޭ ބަޖެޓަށް ވާނެ." ޤައުމީ ޔުނިވަރސިޓީގެ ދަސްވެނިވުމުގެ ރަސްމިއްޔާތުގައި ރައީސުލްޖުމްހޫރިއްޔާ ވިދާޅުވެފައިވެއެވެ.
މީގެއިތުރުން ގެދޮރުވެރިކުރުމާ ގުޅޭ އެންމެހާ މަސައްކަތްތައް އޮންލައިން ޕްލެޓްފޯމަކުން ކުރިއަށްގެންދިއުމަށް "ހިޔާވެހި ޕޯޓަލް" ވަނީ އިފްތިތާޙުކޮށްފައެވެ. މި ޕޯޓަލްގައި ގެދޮރުވެކަމުގެ މަޝްރޫޢުތަކުގައި ބައިވެރިވާން ބޭނުންނަމަ، ކުރިއާލާ މީހާގެ މަޢުލޫމާތު ހިމަނާ ޕްރޮފައިލްއެއް ހެދޭނެއެވެ. ސަރުކާރުން އިޢުލާނުކުރާ ސްކީމްތަކާއި އޭގެ މަޢުލޫމާތާއި އަދި ފޯމު ހުށައެޅުމުގެ ކަންކަން ކުރިއަށްގެންދާނީ މި ޕްލެޓްފޯމްގެ ތެރެއިންނެވެ.
ބިމާބެހޭ ޤާނޫނު، ޒަމާނީ ބަދަލުތަކަށް ފެތޭ ޤާނޫނަކަށް ބަދަލުކުރުމުގެ މަސައްކަތާ އެއްމެދު އިމާރާތްތައް ބެލެހެއްޓުން ހަރުދަނާ ކުރުމުގެ މަސައްކަތްތައްވެސް ދަނީ ކުރިއަށްގެންދަމުންނެވެ.
ރައީސުލްޖުމްހޫރިއްޔާގެ ވަޢުދަކީ އެމަނިކުފާނުގެ 5 އަހަރުގެ ދަޢުރު ނިމޭއިރު، ބޯހިޔާވަހިކަމުގެ
ކޮންމެވެސް އެއް މަޝްރޫޢަކުން ފުރުޞަތު ނުލިބޭ ރައްޔިތަކު ނެތްކަން ކަށަވަރުކުރެއްވުމެވެ.