މާދަމާއިން ފެށިގެން ވޭޕް އެތެރެކުރުން މަނާ، ވޭޕު ބޭނުންކުރުން ހުއްޓާލަން 1 މަސް

ބޮޑެތި މީހުންނާއި ކުޑަކުދިން އާދަޔާޚިލާފަށް ދެވިހިފައިފައިވާ ވޭޕް ނުވަތަ އީ-ސިނގިރޭޓު މަނާކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ނިންމަވާފައެވެ. މި ނިންމެވުމާ އެއްގޮތަށް ޤާނޫނު އިސްލާޙުކުރުމަށް މަޖިލީހަށް ބިލު ހުށައެޅީ މިދިޔަ މަހުގެ 23 ވަނަ ދުވަހުއެވެ.

ދުންފަތް ކޮންޓްރޯލްކުރުމާބެހޭ ޤާނޫނަށް 1 ވަނަ އިސްލާޙު ގެނައުމުގެ ބިލު މަޖިލީހުން ފާސްކުރުމާ ގުޅިގެން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިހާރު ވަނީ މި ބިލު ތަސްދީޤުކުރައްވާފައެވެ.

ދިވެހިރާއްޖޭގައި ވޭޕް އެތެރެކުރުމާއި ބޭނުންކުރުން މަނާކުރުމަށް ރައީސުލްޖުމްހޫރިއްޔާ ނިންމެވުންވީ ގިނަ ބައެއްގެ ތަޢުރީފް އަމާޒުވި ނިންމެވުމަކަށެވެ. މިގޮތުން ޞިއްޙީ ދާއިރާގައި މަސައްކަތްކުރާ މީހުންނާއި ބެލެނިވެރިންނާއި މުދައްރިސުންވަނީ މި ނިންމެވުމަށް ތަޢުރީފްކޮށްފައެވެ.

ވޭޕް ބޭނުންކުރުމަކީ އިންސާނާގެ ސިކުނޑިއަށް ގެއްލުން ލިބޭ، ތަފާތު އެކި ބަލިތަކަށް މަގު ފަހިކުރުވާ ނުބައި އާދައެކެވެ. ވޭޕް މަނާކުރުމަށް ރައީސް ނިންމެވި ރޫޙުގެ ފަހަތުގައިވަނީ މިފަދަ ނުބައި އާދަތަކުން ޒުވާން ޖީލު ސަލާމަތް ކުރުމެވެ. އެއީ އެންމެ ގިނައިން ވޭޕު ބޭނުންކުރަނީ ޒުވާނުންކަމުގައިވާތީއެވެ.

ދުންފަތް ކޮންޓްރޯލްކުރުމާބެހޭ ޤާނޫނަށް ގެނައި އިސްލާޙު ރައީސުލްޖުމްހޫރިއްޔާ މިހާރު ތަސްދީޤުކުރައްވާފައިިވީ ނަމަވެސް، މާދަމާއިން ފެށިގެން އަމަލުކުރާނީ އައު އިސްލާޙުގެ އެއްބަޔަށެވެ. އަނެއް ބަޔަށް އަމަލުކުރާނީ އަންނަ މަހުގެ 15 ވަނަ ދުވަހުން ފެށިގެންނެވެ.

މާދަމާއިން ފެށިގެން ޢަމަލުކުރާ ބައިގައި ވޭޕާ ގުޅޭގޮތުން ހިމެނޭ ކަންކަން:

އިލެކްޓްރޯނިކް ސިނގިރޭޓް އަދި އެފަދަ ވޭޕްކުރުމަށް ބޭނުންކުރާ އާލާތްތަކާއި އެ އެއްޗެއްސާއެކު ބޭނުންކުރުމަށް ތައްޔާރުކޮށްފައިވާ އުފެއްދުންތައް ދިވެހިރާއްޖެއަށް އެތެރެކުރުން މަނާވާނެއެވެ. އަދި މިކަމާ އެއްވެސް ފަރާތަކުން ޚިލާފުވެއްޖެނަމަ، އެފަރާތެއް 50،000 ރުފިޔާއިން ޖުރިމަނާކުރެވޭނެއެވެ.

އެފަރާތަކުން އެތެރެކުރި ކޮންމެ އިލެކްޓްރޯނިކް ސިނގިރޭޓް ނުވަތަ ވޭޕްކުރުމަށް ބޭނުންކުރާ އާލާތަކަށް 10،000 ރުފިޔާގެ މަގުން ޖޫރިމަނާކުރެވޭނެއެވެ.

އަންނަ މަހުގެ 15އިން ފެށިގެން ޢަމަލުކުރާ ބައިގައި ވޭޕާ ގުޅޭގޮތުން ހިމެނޭ ކަންކަން:

އިލެކްޓްރޯނިކް ސިނގިރޭޓް އަދި އެފަދަ ވޭޕްކުރުމަށް ބޭނުންކުރާ އާލާތްތަކާއި އެ އެއްޗެއްސާއެކު ބޭނުންކުރުމަށް ތައްޔާރުކޮށްފައިވާ އުފެއްދުންތައް ދިވެހިރާއްޖޭގައި ވިއްކުމާއި ހިލޭބެހުމާއި ބޭނުންކުރުން މަނާވާނެއެވެ. އަދި މިކަމާ އެއްވެސް ފަރާތަކުން ޚިލާފުވެއްޖެނަމަ، އެފަރާތެއް 20,000 ރުފިޔާއިން ޖޫރިމަނާކުރެވޭނެއެވެ.

އަދި ވިއްކާ ކޮންމެ އިލެކްޓްރޯނިކް ސިނގިރޭޓް ނުވަތަ ވޭޕްކުރުމަށް ބޭނުންކުރާ އާލާތަކަށް 10,000 ރުފިޔާގެ މަގުން ޖޫރިމަނާކުރެވޭނެއެވެ. އަދި ވޭޕް ބޭނުންކޮށްފިނަމަ 5،000 ރުފިޔާއިން ޖޫރިމަނާކޮށް، ވޭޕް ހިލޭ ބަހައިފިނަމަ 10،000 ރުފިޔާއިން ޖޫރިމަނާކުރެވޭނެއެވެ.

ޚިލާފަށް އިލެކްޓްރޯނިކް ސިނގިރޭޓް އަދި އެފަދަ ވޭޕްކުރުމަށް ބޭނުންކުރާ އާލާތެއް ނުވަތަ އެފަދަ އެއްޗަކާއެކު ބޭނުންކުރުމަށް ތައްޔާރުކޮށްފައިވާ އުފެއްދުމެއް ވިއްކީ ނުވަތަ ހިލޭ ބެހީ ކުޑަކުއްޖަކަށް ކަމުގައިވާނަމަ، ޢާންމު އަގުން އެފަރާތެއް ޖޫރިމަނާކުރުމުގެ އިތުރުން، އެފަރާތެއް 50,000 ރުފިޔާއިން ޖޫރިމަނާކުރެވޭނެއެވެ.

ވޭޕް ބޭނުންކުރުން މަނާކުރެވި އެ އިސްލާޙު ތަސްދީޤުކުރެއްވުމާ ގުޅިގެން ޞިއްޙީ ދާއިރާގައި މަސައްކަތްކުރާ ފަރާތްތަކާއި ބެލެނިވެރިން ވަނީ ޕީއެސްއެމް ނިއުސްއާ ވަނީ ޝުޢޫރު ޙިއްސާކޮށްފައެވެ.

"ފުރާވަރުގެ ކުދިންނާއި ޒުވާން ކުދިންގެ ސިކުނޑިތައް ދެވިހިފުމުން މައްސަލަތައް ދިމާވޭ. ހަނދާނުގެ މައްސަލާތަކާއި ފިލާވަޅަށް ސަމާލުކަން ދިނުމާއި ބުއްދި ފުރިހަމަވުމަށް އަސަރުއެބަކުރޭ." ޞިއްޙީ ދާއިރާގެ މީހުން ބުންޏެވެ.

"ރައީސް ނިންމެވި ވަރަށް ރަނގަޅު ނިންމުމެއް ވޭޕު މަނާކުރުމަކީ. މިއީ އެއްގޮތަކަށްވެސް ބޭނުންކުރަންވާނެ އެއްޗެއް ނޫން. އަދުގެ ކުޑަކުދިން ހަލާކުވެ މިދަނީ ވޭޕުގެ ސަބަބުން." ބެލެނިވެރިން ބުންޏެވެ.

ދިވެހިރާއްޖެއަށް ވޭޕް އެތެރެކުރުމާއި ބޭނުންކުރުން މަނާކުރުމުން މިޤައުމަށް ދިމާވެފައިވާ އިޖުތިމާޢީ ބޮޑު މައްސަލައަކަށް ޙައްލު ލިބޭނެއެވެ. އަދި ބަލިތަކާއި ނުބައި އާދަތަކުން ދިވެހި މުޖުތަމަޢު ދުރުކުރެވޭނެކަން ގިނަ ބަޔަކު ޤަބޫލުކުރެއެވެ.