"ގުދުރަތީ މައްސަލަތަކުން އަރައިގަތުމަށް ދެމެހެއްޓެނިވި މާލީ އެހީތެރިކަން ރާއްޖެއަށް ވަރަށް މުހިންމު"

ގުދުރަތީ ގޮތުން ކުރިމަތިވާ ގޮންޖެހުންތަކުން އަރައިގަތުމަށް ދެމެހެއްޓެނިވި މާލީ އެހީތެރިކަން ހޯދުމަކީ ރާއްޖޭގެ ކުރިއެރުމަށް ވަރަށް މުހިންމުކަމެއްކަމުގައި މާލީ ވަޒީރު މޫސާ ޒަމީރު ވިދާޅުވެއްޖެއެވެ.

މަލީ ވަޒީރު ވިދާޅުވީ ދަ ނޭޗަރ ކޮންސަރވަންސީއާއެކު ޤާއިމުކުރާ އެއްބަސްވުމަކީ ދެމެހެއްޓެނިވި އަދި ފާގަތި މުސްތަޤުބަލަކާ ދިމާއަށް އެޅޭ މުހިންމު ފިޔަވަޅެއްކަމަށެވެ.

މިހާރު އަޒަރުބައިޖާންގެ ވެރިރަށް ބާކޫގައި ކުރިއަށްދާ ތިމާވެށީގެ އެންމެ ބޮޑު ބައްދަލުވުމުން "ކޮޕް 29"ގެ ހަވާސާގެ ތެރެއިން ރާއްޖެއިން ވަނީ ދަރ ނޭޗަރ ކޮންސަރވަންސީ، ޓީއެންސީއާއެކު އެއްބަސްވުމެއް އެކުލަވާލާފައެވެ.

މިއެއްބަސްވުމުގައި ސޮއިކުރުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން މާލީ ވަޒީރު މޫސާ ޒަމީރު ވިދާޅުވީ މި އެއްބަސްވުމުގެ ފައިދާ ރާއްޖެއަށް ވަރަށް ބޮޑަށް ކުރާނެކަމަށް ޤަބޫލުކުރައްވަކަމަށެވެ. އެގޮތުން ގުދުރަތީގޮތުން ކުރިމަތިވާ އެކި ގޮންޖެހުންތަކުން އަރައިގަތުމަށް ބޭނުންވާ މާލި އެހީތެރިކަން ކަށަވަރުވުމަކީ ރާއްޖޭގެ ކުރިމަގު ބައްޓަންކުރުމަށް މުހިއްމުކަމެއްކަމަށް ވިދާޅުވިއެވެ.

މާލީ ވަޒީރުގެ ވާހަކަފުޅުގައި ވަނީ ކާބަން ފައިނޭންސިންއާއި ކޮންޒަވޭޝަން ޓްރަސްޓް ފަންޑުތަކާއި އަދި ސަރުކާރާއި އަމިއްލަ ފަރާތްތަކުގެ ބައިވެރިވުން ހިމެނޭގޮތަށް މާލީ ވަޞީލަތްތައް ބޭނުންކޮށްގެން ރާއްޖޭގެ ތިމާވެށި ރައްކާތެރިކުރުމާއެކު އިޤްތިޞާދީ ކުރިއެރުވުން މުހިއްމުކަން ފާހަގަކުރައްވާފައެވެ.

މޫސުމަށް އަންނަ ބަދަލުތަކާ ކުރިމަތިލުމުގެ ޤާބިލުކަން އިތުރުކުރުމާއެކު އިޤްތިޞާދީ ދެމެހެއްޓެނިވިކަން ކުރިއެރުވުމަށް ދިވެހި ސަރުކާރާއި ޓީއެންސީއާއެކު ޤާއިމުކުރެވުނު އެއްބަސްވުމުގައި ސޮއިކުރުމުގެ ރަސްމިއްޔާތުގައި މާލީ ވަޒީރުގެ އިތުރުން މޫސުމީ ބަދަލުތަކާއި ތިމާވެއްޓާ ހަކަތައާ ބެހޭ ވަޒީރު ޠާރިޤް އިބްރާހީމާއި ޓީއެންސީގެ ގްލޯބަލް ޑިރެކްޓަރ މެލިސާވަނީ ބައިވެރިވެވަޑައިގަންނަވާފައެވެ.

މިއެއްބަސްވުމާއެކު ލިބޭ މާލީ އެހީތެރިކަމުގެ ބޭނުންކުރުމަށް ހަމަޖެހިފައިވަނީ ތިމާވެށި ހިމާޔަތްކުރުމުގެ މަސައްކަތްތަކަށާއި ރަށްރަށުގެ އިޤްތިޞާދު ކުރިއެރުވުމަށާއި، މޫސުމަށް އަންނަ ބަދަލުތަކާއި ކުރިމަތިލުމުގެ ޤާބިލުކަން އިތުރުކުރުމަށްކަމަށް ސަރުކާރުން ވިދާޅުވެއެވެ. ހަމައެއާއެކު މިއެއްބަސްވުމާއެކު ކުރެވޭ މަސައްކަތުގެ ތެރެއިން ރާއްޖޭގެ މެދުރާސްތާގެ މެކްރޯ ފިސްކަލް ސްޓެބިލިޓި ދެމެހެއްޓުމާއި ދަރަނީގެ ދެމެހެއްޓެނިވިކަން ކަށަވަރުކުރުމަށް އިތުރު ބާރަކަށް ވެގެންދާނެކަމަށް ސަރުކާރުން ވިދާޅުވެއެވެ.

ދަ ނޭޗަރ ކޮންސަރވަންސީއަކީ 1951 ވަނަ އަހަރުން ފެށިގެން ތިމާވެށި ޙިމާޔަތްކުރުމުގެ ދާއިރާގައި ދުނިޔޭގެ ފެންވަރުގައި އިސްދައުރެއް އަދާކުރަމުންދާ ޖަމްޢިއްޔާއެކެވެ. ތިމާވެށީގެ އެކި މައްސަލަތަކާއި މޫސުމީ ބަދަލުތަކުގެ ސަބަބުން ކުރިމަތިވާ ހުރަސްތަކުން އަރައިގަތުމަށް މިޖަމްޢިއްޔާއިންދަނީ ދުނިޔޭގެ 70 އަށްވުރެ ގިނަ ޤައުމަށް އެހީތެރިކަން ފޯރުކޮށްދެމުންނެވެ. އެގޮތުން ތިމާވެއްޓާ ރައްޓެހި ގްރީން ފައިނެންސިންގެ އެހީވެސް އެޖަމްޢިއްޔާއިން ދަނީ ފޯރުކޮށްދެމުންނެވެ.