އަމާން މުޖުތަމަޢުއެއް ޤާއިމުކުރުމަށް ރައްޔިތުންގެ ޚިޔާލާއި މަޝްވަރާ ހޯދުމަށް ފުލުހުންގެ ބޮޑު ހަރަކާތެއް
-
ހަރަކާތުގެ ތެރެއިން އެކި ކުށްތަކުން ރައްކާތެރިވުމަށް އާންމުން ހޭލުންތެރިކޮށްފައިވޭ
އަމާން މުޖުތަމައުއެއް ޤާއިމުކުރުމަށް ފުލުހުންގެ ފަރާތުން ރައްޔިތުންނާއި ގުޅިގެން ކުރެވޭ ތަފާތު މަސައްކަތްތަކާ މެދު ރައްޔިތުންގެ ޚިޔާލާއި މަޝްވަރާ ހޯދުމަށް "ވޯކް އެންޑް ޓޯކް"ގެ ނަމުގައި ފުލުހުން ބޮޑު ހަރަކާތެއް ކުރިއަށް ގެންގޮސްފިއެވެ.
މި ހަރަކާތް ކުރިއަށް ގެންދިޔައީ ފުލުހުންގެ ޚިދުމަތް ޤާއިމުކޮށްފައިވާ ހުރިހާ ރަށެއްގައި އެއްވަގުތެއްގައެވެ.
މި ހަރަކާތް މާލޭގެ އެކި ސަރަަހައްދުތަކުގައި ކުރިއަށްދިޔައިރު ޕާކުތަކާއި އަތިރިމައްޗާއި އެކި މަގުތަކުގައި ތިބި އާންމުންނާއި ބައްދަލުކޮށް ފުލުހުން ވާހަކަ ދައްކާފައިވެއެވެ.
"ވޯކް އެންޑް ޓޯކް" ގެ ނަމުގައި ފުލުހުން ހިންގި ހަރަކާތުގައި ކޮމިޝަނަރ އޮފް ޕޮލިސް ހިމެނޭހެން ހުރިހާ ރޭންކެއްގެ ގިނަ އަދަދެއްގެ ފުލުހުން ވަނީ މަގުތަކަށް ނިކުމެ އާންމު ރައްޔިތުންގެ ހާލު ބަލާ، ރައްޔިތުންގެ ކަންބޮޑުވުންތައް އޮޅުންފިލުވާފައެވެ.
މި ހަރަކާތުގައި ރައްޔިތުން ފުލުހުންނާމެދު ހިތްހަމަޖެހޭ މިންވަރު ބެލުމަށްޓަކައި އެކި ސުވާލުތައް ކުރި ކަމަށް ފުލުހުން ވިދާޅުވިއެވެ.
މީގެއިތުރުން ހަރަކާތުގެ ތެރެއިން އެކި ކުށްތަކުން ރައްކާތެރިވުމަށް އާންމުން ހޭލުންތެރިކޮށް، ސްކޭމްގެ މައްސަލަތަކާއި މެދުވެސް އާންމު ރައްޔިތުން ހޭލުންތެރިކޮށްފައިވެއެވެ.
ފުލުހުން މި ހަރަކާތް ހިންގާފައިވަނީ ފުލުހުންގެ ސްޓްރެޓީޖިކް ޕްލޭންގައިވާ މުޖުތަމައުގެ ބައިވެރިވުމާއެކު ފުލުހުންގެ ޚިދުމަތް ދިނުމުގެ ދަށުން އެކުލަވާލާފައިވާ އިސްތިރާޖީ ލަނޑުދަނޑިތައް ހާސިލްކުރުމުގެ މަސައްކަތުގެ ތެރެއިންނެވެ.
ދިވެހި ފުލުހުންގެ ޚިދުމަތުން ވިދާޅުވީ މި ހަރަކާތް މެދުވެރިކޮށް މުސްތަޤުބަލުގައި ރައްޔިތުންނާއި ފުލުހުންގެ މެދުގައި އޮންނަ ގުޅުން ބަދަހިވެ، މުޖުތަމައުގެ ކަންބޮޑުވުންތައް ދެނެގަނެ، މުޖުތަމައުގައި ހިނގާ ކުށްތައް މަދުކުރެވި، ފުލުހުންނަކީ ރައްޔިތުންގެ އިތުބާރު ލިބިފައިވާ ބަޔަކަށް ހެދުމަކީ އަމާޒު ކަމަށެވެ.