އައިޔޫއެމްއިން އިންތިޒާމްކުރާ 6 ވަނަ އިޤްރައު ފޮތް މަޢުރަޒު ފަށައިފި

ދިވެހިރާއްޖޭގެ އިސްލާމީ ޔުނިވަރސިޓީ (އައިޔޫއެމް)އިން އިންތިޒާމްކުރާ "އިޤްރައު ފޮތް މަޢުރަޒު 2024" ފަށައިފިއެވެ.

އައިޔޫއެމް "އިޤްރައު" ފޮތް މަޢުރަޒަކީ ހެޔޮއަގުގައި ފޮތް ގަތުމުގެ މާޙައުލެއް އުފެއްދުމަށާއި، ފޮތް ވިއްކާ ފަރާތްތަކަށް އެފުރުޞަތު ފަހިކޮށްދިނުމުގެ އިތުރުން، މުޖުތަމަޢުގެ އަފުރާދުންގެ މެދުގައި ފޮތްތެރިކަމަށް އޮންނަ ޝައުޤުވެރިކަން އިތުރުކުރުމުގެ މަޤްޞަދުގައި ބާއްވާ މަޢުރަޒެކެވެ.

ފޮތް މަޢުރަޒު ކުރިއަށްދާނީ 16 ވަނަ ދުވަހުގެ ނިޔަލަށް ޔުނިވަރސިޓީގެ ހޯލުގައެވެ. ބުދަ ދުވަހު ބޭއްވި ޚާއްސަ ރަސްމިއްޔާތެއްގައި ފޮތް މަޢުރަޒު ހުޅުވުމުގެ ހަފުލާ ޝަރަފްކޮށްދެއްވީ ދިވެހި ބަހުގެ އެކެޑަމީގެ ރައީސް ޑރ. އަޝްރަފް ޢަބްދުއްރަޙީމެވެ. މި ރަސްމިއްޔާތުގައި ސަރުކާރުގެ ފަރާތުން އަރުވާ ޝަރަފުގެ އިނާމް ލިބިވަޑައިގެންފައިވާ ބައެއް ބޭފުޅުންނާއި ޤައުމީ ކުތުބުޚާނާގެ ވެރިންނާއި ޔޫތް މިނިސްޓްރީގެ ވެރިންގެ އިތުރުން ޔުނިވަރސިޓީގެ ވެރިންނާއި މުވައްޒަފުން އަދި ދަރިވަރުން ބައިވެރިވިއެވެ.

އައު ފޮތް އިފްތިތާޙުކުރުމާއި ފޮތް ހަދިޔާކުރުން ވެސް މި ރަސްމިއްޔާތުގައި ކުރިއަށް ދިޔައެވެ. އަދި ޔުނިވަރސިޓިގެ ޕޯސްޓް ގްރެޖުއޭޓް ސެންޓަރުގެ ޕޯސްޓް ގްރެޖުއޭޓް ރިސަރޗް ބުލެޓިންގެ ދެވަނަ އަދަދު ނެރެފައިވާއިރު މި އަހަރުވެސް މި މަޢުރަޒުގައި ފޮތް ވިއްކާ އަދި ޝާއިޢު ކުރައްވާ ފަރާތްތަކުގެ އިތުރުން ލިޔުންތެރިންވެސް ބައިވެރިވާނެ ކަމަށް އައިޔޫއެމްއިން ބުންޏެވެ.

ފޮތް މަޢުރަޒުގައި ބައިވެރިވި ފަރާތްތަކަކީ:

• މެސެޖް އޮފް އިސްލާމް
• ނޮވެލްޓީ ބުކްޝޮޕް
• ދިވެހިބަހުގެ އެކެޑަމީ
• ބުންޔާން ބުކްސް
• އެންޑެވަރ
• ފަނާޝް
• އައިކެންރީޑް
• އާމިނަތު އިބްރާހީމް، އައިނާ ޕަބްލިކޭޝަންސް
• ޙަސަން ނަސީމް، ބުކްސް އެންޑް ބްލޮކްސް
• ނިއުޝާދު ޢަބްދުލްޙަންނާން، އިލްމާން ޕަބްލިކޭޝަންސް
• ޙައްވާ ލީޝާ، ލީޝް ވިސާމް
• ނަސްރީނާ އިސްމާޢީލް، ކީން ސްޓާރ ލަރނަރސް
• ފަސީހާ ހާތިމް، މިއުސް ބުކްޝޮޕް
• ވިއްސާރަދުނި
• ދިވެހިރާއްޖޭގެ އިސްލާމީ ޔުނިވަރސިޓީ

ފޮތް މަޢުރަޒުގައި އެކި ޢުމުރުފުރާތަކުގެ ތަފާތު މާއްދާތަކުގެ ފޮތްތައް ހެޔޮ އަގުގައި ލިބެން ހުންނާނެއެވެ. އިޤްރައު ފޮތް މަޢުރަޒަކީ ޢާއްމުންނަށް ހުޅުވާލައިގެން ހިންގާ ޙަރަކާތަކަށް ވާތީ، ޢާއްމުންގެ މެދުގައި ޢިލްމީ ހޭލުންތެރިކަން އިތުރުކުރުމުގެ ގޮތުން 2 ޕެނަލް ޑިސްކަޝަން 13 އަދި 14 ނޮވެމްބަރުގައި ކުރިއަށްދާނެކަމަށް އައިޔޫއެމްއިން ވިދާޅުވެއެވެ.

ޕެނަލް ޑިސްކަޝަންތަކުގައި ވާހަކަ ދައްކާނީ "ދިވެހި ބަސް ކުރިއެރުވުމުގައި ފޮތްތެރިކަން" އަދި "އިސްލާމްދީނާ ވަރި" މި މައުޟޫއުތަކަށެވެ. އަދި މަޢުޟޫތަކަށް އިންޞާފުކުރައްވާނީ ދާއިރާތަކުން ފާހަގަކޮށްލެވޭ ޢިލްމީ ބޭފުޅުންނެވެ. މަޢުޟޫއާ ގުޅޭގޮތުން ސުވާލު ހުށަހެޅުމުގެ ފުރުޞަތު އާންމުންނަށް ލިބިގެންދާނެއެވެ.

މަޢުރަޒު ހިނގަމުންދާއިރު އެކި ޢުމުރުފުރައިގެ ކުޑަކުދިންނަށް އަމާޒުކޮށްގެން ވާހަކަ ކިޔައިދިނުމާއި، މަދަޙަ، ބަނދި، ރައިވަރު އަދި ވާހަކަ ކިޔުމާއި ތަފާތު ހުނަރުތައް ދަސްވާނެފަދަ ޙަރަކާތްތައް ހިމެނޭގޮތަށް "ނޮލެޖް ކޯނަރ" ހިންގުމަށްވަނީ ހަމަޖެހިފައިވާކަމަށް އައިޔޫއެމްއިން ވިދާޅުވެއެވެ.

މި ޙަރަކާތްތައް ކުރިއަށް ދާނީ 15 އަދި 16 ވާ ހުކުރު އަދި ހޮނިހިރު ދުވަހުގެ ހަވީރު 16:00 އިން 18:00 އަށެވެ. އައިޔޫއެމްއިން ވިދާޅުވީ ޢުމުރުން 6 އަހަރާއި 11 އަހަރާއި ދެމެދުގެ ކުދިންނަށް އަމާޒުކޮށްގެން ހިންގާ "ބުކްމާކް" ފަރުމާކުރުމުގެ މުބާރާތެއް ޔުނިވަރސިޓީގެ ކުތުބުޚާނާގައި ކުރިއަށްދާނެ ކަމަށާއި މި މުބާރާތް ކުރިއަށްދާނީ ނޮވެމްބަރ 15 ވާ ހުކުރު ދުވަހުގެ 16:00 އިން 18:00 އަށް ކަމަށެވެ.

2018 ވަނަ އަހަރުން ފެށިގެން އަހަރަކު އެއްފަހަރު ހިންގަމުން އަންނަ "އިޤްރައު" ފޮތް މަޢުރަޒު މިއަހަރު ދިވެހިރާއްޖޭގެ އިސްލާމީ ޔުނިވަރސިޓީގެ ލާރނިން ސެންޓަރުތައް ޤާއިމްކުރެވިފައިވާ ރަށްރަށުގެ ތެރެއިން، ލ. ފޮނަދޫ އަދި ފުވައްމުލަކުގައިވެސް ކުރިއަށްދާނެ ކަމަށް އައިޔޫއެމްއިން ވިދާޅުވެއެވެ. މި ދެރަށުގައި ފޮތް މަޢުރަޒު ކުރިއަށްދާނީ ނޮވެމްބަރ 15 އަދި 16 ވަނަ ދުވަހުގެ ހަވީރު 4:00 އިން 6:00 އަށެވެ.

އިޤްރައު ފޮތް މައުރަޒަކީ ހައިބްރިޑް ފޮތް މަޢުރަކަށްވާއިރު މަޢުރަޒުގައި އޮންލައިންކޮށް ފޮތް ވިއްކާނީ www.iqra.com.mv އިންނެވެ. މި ވެބްސައިޓް މެދުވެރިކޮށް ބޭރު ޤައުމުތަކުގައި ދިރިއުޅޭ ދިވެހިންނާއި އަދި ބިދޭސީންނަށް ވެސް ފަސޭހައިން ފޮތް ގަނެވޭނެ ނިޒާމެއް އައިޔޫއެމްއިން ވަނީ ޤާއިމުކޮށްފައެވެ.