މުއްސަނދި ޤައުމުތަކުގެ އެސްޑީއާރު ރިޒާވުން ބައެއް، ކުދި ޤައުމުތަކަށް ދިނުމަށް ރާއްޖެއިން ގޮވާލައިފި

އިންޓަނޭޝަނަލް މަނިޓަރީ ފަންޑުން ދުނިޔޭގެ އެކި ޤައުމުތަކަށްއެހީވުމަށް އުފައްދާފައިވާ ސްޕެޝަލް ޑްރޯވިން ރައިޓްސް، އެސްޑީއާރު ރިޒާވުން ބައެއް، ކުދި ޖަޒީރާ ޤައުމުތަކަށް ދިނުމަށް ދިވެހިރާއްޖެއިން ގޮވާލައިފިއެވެ. ރާއްޖެއިން މިކަމަށް ގޮވާލާފައިވަނީ ރާއްޖެއާއި އެންޓީގާ އެންޑް ބާބިޔުޑާގެ އިތުރުން، އިންޓަނޭޝަނަލް އިންސްޓިޓިއުޓް ފޮރ އެންވަރަޔަމަންޓް އެންޑް ޑިވެލޮޕްމެންޓް، އައިއައިއީޑީން އިންތިޒާމުކޮށްގެން ކޮޕް29ގެ ހަވާސާގެ ތެރެއިން ބޭއްވި ހައި ލެވެލް ސައިޑް އެވެންޓުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ޚާއްޞަ މަންދޫބެއްގެ ހައިސިއްޔަތުން މޫސުމީ ބަދަލުތަކާއި ތިމާވެށްޓާއި ހަކަތައާބެހޭ ވަޒީރު ޠާރިޤް އިބްރާހީމް ދެއްކެވި ވާހަކަފުޅުގައެވެ.

ސްޕެޝަލް ޑްރޯވިން ރައިޓްސް، އެސްޑީއާރަކީ 1969 ވަނަ އަހަރު އައިއެމްއެފުން ތަޢާރަފްކޮށްފައިވާ ބައިނަލްއަޤުވާމީ ރިޒަރވް އެސެޓު ފަންޑެކެވެ. މިހާތަނަށް މި ފަންޑުގައި 943 ބިލިޔަން އެމެރިކާ ޑޮލަރު ހިމެނެއެވެ. މިއީ ދުނިޔޭގެ ޤައުމުތަކަށް އެހީވުމަށް އުފައްދާފައިވާ ފަންޑެކެވެ.

ހައި ލެވެލް ސައިޑް އެވެންޓުގައި ރައީސުލްޖުމްހޫރިއްޔާގެ ޚައްޞަ މަންދޫބެއްގެ ހައިސިއްޔަތުން ވާހަކަފުޅުދައްކަވަމުން މޫސުމީ ބަދަލުތަކާއި ތިމާވެށްޓާއި ހަކަތައާބެހޭ ވަޒީރު ޠާރިޤް އިބްރާހީމް ވިދާޅުވީ މޫސުމީ ބަދަލުތަކުން އަރައިގަނެ، ވިލުންތެރިވުމަށް ކުދި ޖަޒީރާ ޤައުމުތަކުންކުރާ މަސައްކަތުގައި މާލީ އެހީ ދިނުމަށް އެސްޑީއާރުގެ އޮނިގަނޑު މުރާޖަޢާކުރަންޖެހޭ ކަމަށެވެ. މީގެ ސަބަބުން ކުދި ޖަޒީރާ ޤައުމުތަކަށް ދިމާވާ ދަރަނީގެ މައްސަލައަށް ހައްލެއް ލިބޭނެކަމަށް ވަޒީރު ވިދާޅުވިއެވެ.

ވަޒީރު ވަނީ އެސްޑީއާރުގެ އޮނިގަނޑު ބަދަލުކުރެވޭނެ ގޮތެއް ހުށައަޅާފައެވެ. އެގޮތަކީ އެސްޑީއާރުގެ ރިޒަރވުން މުއްސަނދި ޤައުމުތަކަށް ކަނޑައަޅާފައިވާ ފައިސާގެ މިންވަރުގެ ތެރެއިން އެ ޤައުމުތަކުން ބޭނުންނުކުރާ މިންވަރެއް ކުދި ޤައުމުތަކަށް ދިނުންކަމަށް ވަޒީރު ވިދާޅުވިއެވެ. މީގެ ސަބަބުން ކުދި ޤައުމުތަކުގެ ފޮރިން ރިޒަރވް އިތުރުވެ، މާލީ ދަތިތަކުން އަރައިގަތުމަށް އެހީތެރިވެދޭނެކަމަށް ވަޒީރު ވިދާޅުވިއެވެ.

ވަޒީރު ވަނީ ސްމޯލް އައިލެންޑް ޑިވަލޮޕިން ސްޓޭޓްސް، ސިޑްސްގެ 4 ވަނަ ބައިނަލްއަޤުވާމީ ބައްދަލުވުމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒާއި އެންޓީގާ އެންޑް ބާބިޔުޑާގެ ބޮޑުވަޒީރު ގަސްޓޮން ބަރައުންއާ ދެބޭފުޅުން އިޢުލާންކުރެއްވި ޑެޕްޓް ސަސްޓެއިނަބިލިޓީ ސަޕޯޓް ސަރވިސް، ޑީއެސްއެސްއެސްއާ ގުޅޭގޮތުންވެސް ވާހަކަދައްކަވާފައެވެ.

ޑީއެސްއެސްއެސްއަކީ ތަރައްޤީވަމުން އަންނަ ކުދި ޖަޒީރާ ޤައުމުތައް، މޫސުމީ ބަދަލުތަކަށް ވިލުންތެރިވުމަށާއި އިޤުތިޞާދީ ގޮތުން ވިލުންތެރި ޤައުމުތަކަކަށް ހެދުމަށް ތަޢާރަފްކުރި ޚިދުމަތެކެވެ.

ވަޒީރު ވިދާޅުވީ ކުދި ޤައުމުތަކުން މޫސުމީ ބަދަލުތަކަށް ވިލުންތެރިވުމަށް ކަނޑައަޅާފައިވާ ލަނޑުދަނޑިތައް ވަކި މިންވަރަކަށް ޙާސިލްކޮށްފިނަމަ، ދަރަނި މަޢާފުވާގޮތަށް ޑީއެސްއެސްއެސްގެ ދަށުން މަސައްކަތް ކުރެވިދާނެ ކަމަށެވެ.

"މުއްސަނދި މާލީ އެހީދޭ ފަރާތްތަކަށް މުހިންމު ދައުރެއް އަދާކުރެވިދާނެ މިކަމުގައި. ދަރަނި މަޢާފުކޮށްދީފިނަމަ، ފައިސާ ބާކީވާ މިންވަރަކުން ދެމެހެއްޓެނިވި ފަތުރުވެރިކަމެއް ކުރުމަށާއި ތަޢުލީމާއި ޞިއްޙީ ދާއިރާގެ ކުރިއެރުމަށް އިންވެސްޓްކުރެވޭނެ." ވަޒީރު ވިދާޅުވިއެވެ.

ކޮޕް29 ބައްދަލުވުމަކީ ދިވެހިރާއްޖެއިން ދެމެހެއްޓެނިވި ތަރައްޤީގެ ލަނޑުދަނޑިތަކާއި މޫސުމީ ބަދަލުތަކަށް ހޭނުމަށް ކުރަމުންދާ މަސައްކަތަށް އަލިއަޅުވާލުމަށް ފުރުސަތު ލިބޭ ވަރަށް މުހިންމު ބައްދަލުވުމެކެވެ. ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަކީ ސްމޯލް އައިލެންޑް ޑިވެލޮޕިން ސްޓޭޓްސް (ސިޑްސް) އަށް ދިމާވާ ތަފާތު ގޮންޖެހުންތަކަށް ވަރަށް ބޮޑަށް ވަކާލާތު ކުރައްވާ ބޭފުޅެކެވެ.