މިދިޔަ އަހަރާއި އަޅާބަލާއިރު ތިލަމާލެ ބްރިޖްގެ މަސައްކަތުގެ ދުވެލި އަވަސްވެއްޖެ

ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވެރިކަމާއި ހަވާލުވެވަޑައިގަތް ފަހުން މިވީ އަހަރެއްހާ ދުވަހުގެ ތެރޭގައި ތިލަމާލެ ބްރިޖްގެ މަސައްކަތުގެ ދުވެލި ހަލުވިވެފައިވާކަމަށް ސަރުކާރުން ވިދާޅުވެއްޖެއެވެ.

ތިލަމާލޭ ބްރިޖަކީ ގްރޭޓަރ މާލޭ އޭރިއާގެ ތަރައްޤީއާއި ގުޅިފައިވާ މުހިއްމު މަޝްރޫޢެކެވެ. މިގޮތުން އިޤްތިޞާދީ އަދި އިޖުތިމާޢީ އެތައް ބަދަލަކާއި ގުޅިފައިވާ މިމަޝްރޫޢު ނިމިގެންދިޔުމަކީ މިސަރަޙައްދުގެ ރައްޔިތުންގެ އޮތް ބޮޑު އުއްމީދެކެވެ. ނަމަވެސް މިމަޝްރޫޢުގެ މަސައްކަތް ލަސްވުމުގެ ކަންބޮޑުވުން ސަރުކާރުން ވަނީ މީގެކުރިން ފާޅުކުރައްވާފައެވެ.

ތިލަމާލެ ބްރިޖުގެ މަސައްކަތް އަވަސްކުރުމަށް ކޮންޓްރެކްޓަރާއި ކުރެވުނު މަޝްވަރާތަކުން މިއަހަރު މަސައްކަތް ކުރިއަށްދިޔަ ސްޕީޑު އަވަސްކަމަށް ސަރުކާރުން ވިދާޅުވެއެވެ.

The Male-Thilamale' Bridge (MTL) project, a key and strategic mega-infrastructure project linked to the socio-economic development of our island nation has undergone significant progress in the last 52 weeks, subsequently reaching a total completion percentage of 46.58% as of… pic.twitter.com/TfZACQFq3F

— Ministry of Construction and Infrastructure (@MoCImv) November 12, 2024

ޢިމާރާތްކުރުމާއި ބިނާރާއި ބެހޭ ވުޒާރާއިން ވިދާޅުވީ މިދިޔަ އަހަރުގެ އޮކްޓޯބަރު މަހުގެ 15 ވަނަ ދުވަހާއި ހަމައަށް ނިމިފައިވަނީ ބްރިޖުގެ 28.70 އިންސައްތަ މަސައްކަތްކަމަށެވެ. އަދި ނިމުނު އޮކްޓޯބަރު މަހުގެ 15 ވަނަ ދުވަހާއި ހަމައަށް، މިވޭތުވެދިޔަ 52 ހަފްތާގެ ތެރޭގައި ބްރިިޖުގެ 46.58 އިންސައްތަ މަސައްކަތް ނިމިފައިވާކަމަށްވެސް ޢިމާރާތްކުރުމާއި ބިނާރާއި ބެހޭ ވުޒާރާއިން ވިދާޅުވެއެވެ.

ތިލަމާލެ މަޝްރޫޢުގެ މަސައްކަތް ލަސްވުމާއި ގުޅިގެން އެމަސައްކަތް ތާވަލާ އެއްގޮތަށް ކުރިއަށްގެންދިޔުމަށް އިންޑިއާގެ މަތީފަންތީގެ ވަފުދަކާއި ދިވެހި ސަރުކާރުން ވަނީ ބައްދަލުކުރައްވާ މަޝްވަރާކުރައްވާފައެވެ.

މި މަޝްރޫއުގެ ޓައިމްލައިންގައިވާ ގޮތުން މާލެއިން ގުޅިފަޅަށް މަސައްކަތްތައް ނިންމުމަށް ތާވަލުކޮށްފައިވަނީ 31 މަރޗް 2026އަށެވެ. ގުޅިފަޅުން ތިލަފުއްޓަށް ގުޅާލާ ބްރިޖްގެ މަސައްކަތް ނިންމުމަށް ތާވަލުކޮށްފައިވަނީ 30 ސެޕްޓެމްބަރު 2026އަށެވެ. މިއާއެކު މުޅި މަޝްރޫޢު ނިމޭނެކަމަށް ޓައިމްލައިންގައި ހިމަނާފައިވަނީ 30 ސެޕްޓެމްބަރު 2026 ކަމަށް އިމާރާތްކުރުމާއި ބިނާރާ ބެހޭ ވުޒާރާއިން ވިދާޅުވެއެވެ. ތިލަމާލޭ ބްރިޖްގެ މަސައްކަތް 2025ގެ ނިޔަލަށް ނުވަތަ 2026ގެ ކުރީކޮޅު ނިންމުމަކީ ސަރުކާރުގެ އަމާޒެކެވެ. ހަތަރު ސަރަޙައްދެއް ގުޅުވާލާ، 6.7 ކިލޯމީޓަރުގެ މިބްރިޖު ތަރައްޤީކުރުމަށް 7 ބިލިއަނަށްވުރެ ގިނަ ދިވެހި ރުފިޔާ ހޭދަކުރެއެއެވެ.