އޮކްޓޫބަރުމަހު ރާއްޖޭގެ ރަސްމީ ރިޒާވް 614.6 މިލިއަން ޑޮލަރަށް އިތުރުވެއްޖެ

ރާއްޖޭގެ ރަސްމީ ރިޒާވް އޮކްޓޫބަރު މަހު 614.6 މިލިއަން ޑޮލަރަށް އަރާފައިވާ ކަމަށް މަރުކަޒީ ބޭންކް (އެމްއެމްއޭ) ގެ ތަފާސްހިސާބުތަކުން ދައްކައިފިއެވެ.

އެމްއެމްއޭ އިން ނެރެފައިވާ ތަފާސްހިސާބުގައިވާ ގޮތުން، ސެޕްޓެންބަރުމަހު ރާއްޖޭގެ ރިޒާވްގައި ހުރީ 371.2 މިލިއަން ޑޮލަރެވެ. އެހެން ނަމަވެސް، އޮކްޓޫބަރުމަހު އެ އަދަދު ހުރީ 614.6 މިލިއަން ޑޮލަރުގައެވެ.

ރިޒާވް އިތުރުވެފައިވާ މައިގަނޑު ސަބަބަކީ ރިޒާވް ބޭންކް އޮފް އިންޑިއާ (އާރްބީއައި)އިން ކަރަންސީ ސްވޮޕްގެ ގޮތުގައި 400 މިލިއަން ޑޮލަރު ލިބިފައިވުންކަމަށް އެމްއެމްއޭއިން ވިދާޅުވިއެވެ. މި ފައިސާގެ ތެރެއިން 120 މިލިއަން ޑޮލަރު ރާއްޖޭގެ ބޭންކުތަކުގައި އިންވެސްޓްކޮށްފައިވާކަމަށްވެސް އެ އޮތޯރިޓީން މައުލޫމާތު ދެއްވައެވެ.

އެމްއެމްއޭއިން ވިދާޅުވީ މި ނިންމުމުގެ ސަބަބުން އެމްއެމްއޭގެ ރިޓާން އޮޕްޓިމައިޒްކުރުމުގެ މަގުސަދު ހާސިލުވުމުގެ އިތުރުން މާލީ ދާއިރާގެ ހަމަޖެހުމާއި ކުރިއެރުމަށް އެހީތެރިވެދީ، މުޅި އިގުތިސާދަށް އޭގެ ފައިދާ ކުރާނެކަމަށެވެ.

ރަސްމީ ރިޒާވް އިތުރުވި ނަމަވެސް، ޔޫސަބަލް ރިޒާވްގެ އަދަދުގެ ގޮތުގައި ފެންނަނީ 31.5 މިލިއަން ޑޮލަރެވެ. އެމްއެމްއޭ އިން ނެރެފައިވާ ނޫސްބަޔާނުގައި ވާގޮތުން، ޔޫސަބަލް ރިޒާވް ޑޭޓާ ހިސާބުކުރަނީ ރާއްޖޭގެ ބޭންކުތަކުގައި އިންވެސްޓްކޮށްފައިވާ 120 މިލިއަން ޑޮލަރު ހިމަނައިގެންނެވެ.

ސަރުކާރުން ދަނީ ދައުލަތުގެ މާލީ ނިޒާމަށް ކުރިމަތިވެފައިވާ ގޮންޖެހުންތައް ހައްލުކޮށް ރިޒާވް ރަނގަޅު ކުރުމަށް މަސައްކަތް ކުރަމުންނެވެ.