ރައްޔިތުންގެ މެންބަރުންވެސް މަޤާމުން ދުރުކުރެވޭނެ ގޮތް އޮންނަންޖެހޭ: މަޖިލީހުގެ ރައީސް

ޤާނޫނު އަސާސީން ލިބިދޭ ބާރުން ޤައުމުގެ އެންމެ މަތީ ވެރިޔާ މަޤާމުން ދުރުކުރެވޭނެ ގޮތް ފަހިކޮށްދީފައި އޮތްނައިރު، އޭގެ ދަށުން ރައްޔިތުން އިންތިޚާބުކުރާ އެހެން މެންބަރުންވެސް މަޤާމުން ވަކިކުރެވޭނެ ފުރުޞަތު ނެތުމަކީ މި ޒަމާނަށް ފައިހަމަކުރާ އުސޫލެއް ނޫންކަމަށް ރައްޔިތުންގެ މަޖިލީހުގެ ރައީސް ޢަބްދުއްރަޙީމް ޢަބްދުﷲ ވިދާޅުވެއްޖެއެވެ. މަޖިލީހުގެ ރައީސް މިހެން ވިދާޅުވީ ޖުމްހޫރީ ދުވަހާ ގުޅިގެން ޕީއެސްއެމް ނިއުސްއަށް ދެއްވި ޚާއްސަ އިންޓަވިއުގައެވެ.

ރައްޔިތުންގެ މަޖިލީހުގެ ރައީސް ޢަބްދުއްރަޙީމް ޢަބްދުﷲ ވިދާޅުވީ ޖުމްހޫރީ ވެރިކަމުގެ ނިޒާމަކީ ދުނިޔޭގައިވެސް އެންމެ ކާމިޔާބު ނިޒާމުކަމަށާއި ޖުމްހޫރިއްޔަތަކަށް ބަދަލުވެ ރާއްޖެއިން ހޯދާފައިވަނީ ބޮޑު ކުރިއެރުމެއްކަމަށެވެ. މި ނިޒާމުން ފަހިކޮށްދޭ އެންމެ މުހިންމު އަސާސަކީ ރައްޔިތުންގެ މަޝްވަރާއާއި ޚިޔާލާއި ރައްޔިތުން ނިންމާ ނިންމުންތަކުގެ މައްޗަށް ކުރާ ވެރިކަމަކަށްވުންކަމަށް ޢަބްދުއްރަޙީމް ވިދާޅުވިއެވެ.

މަޖިލީހުގެ ރައީސް ވިދާޅުވީ ޤާނޫނުތަކާއި ސިޔާސަތުތައް އެކުލަވާލާލުމުގައި ވަގުތާ ޙާލަތާއި، ޒަމާނަށް އަންނަ ބަދަލުތަކަށް ރިޢާޔަތްކުރަންޖެހޭކަމަށެވެ. އެގޮތުން ރާއްޖޭގެ މިހާރު ހުރި ޤާނޫނުތަކަށްވެސް އިސްލާހު ގެންނަންޖެހޭ މުހިންމު ކަންތައްތަކެއް ހުރިކަމަށް ޢަބްދުއްރަޙީމް ވިދާޅުވިއެވެ.

އެންމެ ބޮޑު ބަދަލެއް ގެންނަންޖެހޭ ކަމެއްގެ ގޮތުގައި ފާހަގަކުރެއްވީ، ރައްޔިތުން އައްޔަނުކުރާ ކޮންމެ މަޤާމެއްގައި ހުންނަ މީހަކީ، ރައްޔިތުން ބޭނުންވެއްޖެ ޙާލަތުގައި ދުރުކުރެވޭނެ ފުރުޞަތު ޤާނޫން އޮންނަޖެހޭ ކަމެއްގެ ގޮތުގައި ފާހަގަކުރެއްވިއެވެ.

ޢަބްދުއްރަޙީމް ވިދާޅުވީ ރައްޔިތުން އިންތިޚާބުކުރާ ޤައުމުގެ އެންމެ މަތީ ވެރިޔާ، ރައީސުލްޖުމްހޫރިއްޔާ ވަކިކުރުމުގެ ބާރު ރައްޔިތުންގެ މަޖިލީހަށް އޮންނަކަމަށެވެ. ޤައުމުގެ އެންމެ މަތީ ވެރިޔާ ވަކިކުރުމުގެ ގޮތް އޮންނައިރު، އެއަށްވުރެ ކުޑަ އާބާދީއެއްގެ ރައްޔިތުން ވޯޓުދީ ހޮވާ މީހުންނަށްވެސް، މި އުސޫލުން ޢަމަލުކުރެވޭނެ ގޮތެއް އޮންނަންޖެހޭކަމަށް މަޖިލީހުގެ ރައީސް ވިދާޅުވިއެވެ. ޢަބްދުއްރަޙީމް ވިދާޅުވީ މުޅި ރައްޔިތުން އައްޔަނުކުރާ ވެރިޔާ ބަދަލުކުރެވޭނަމަ، 5000 މީހުން ވޯޓުދީ އިންތިޚާބުރާ މީހާ، އެފަދަ ޙާލަތެއް ކުރިމަތިވެއްޖެނަމަ ވަކިކުރެވޭނެ ގޮތް ޤާނޫގައި ލިޔެވިފައި އޮންނަންޖެހޭކަމަށް މަޖިލީހުގެ ރައީސް ވިދާޅުވިއެވެ.

"މެންބަރުން ވަކިކުރެވޭނެ ގޮތެއް ޤާނޫނުގައި ނެތް. އެންމެ މަތީ ވެރިޔާ ބަދަލުކުރުމުގެ ފުރުޞަތު އޮވޭ. އޭގެ ދަށަށް އިންތިޚާބުކުރާ މީހުން ވަކިކުރެވޭނެ ފުރުޞަތު ނެތުމަކީ މި ޒަމާނަށް ފެތޭ ކަމެއް ނޫން. އަދި ޤަބޫލެއް ނުކުރަން އެހެންކަމަށް އެކަން އޮންނަންވާނީ." ރައްޔިތުންގެ މަޖިލީހުގެ ރައީސް ޢަބްދުރައްހީމް ޢަބްދުﷲ ވިދާޅުވިއެވެ.

ޢަބްދުއްރަޙީމް ވިދާޅުވީ މުޅިން އައު މުހިންމު ޤާނޫނުތަކެއް ގެނައުމާއި ޤާނުނުތަކަށް ބޭނުންވާ ބަދަލުތައް ގެނައުމުގެ މުހިންމު މަސައްކަތްތަކެއް 20ވަނަ މަޖިލީހުގެ ދަޢުރުގައި ކުރައްވާނެކަމަށެވެ. އަދި މިހާރުވެސް އޭގެ ވަރަށް ގިނަ މަސައްކަތްތައް ކުރިއަށްދާކަމަށެވެ.

ޢަބްދުއްރަޙީމް ވިދާޅުވީ ދަޢުލަތުގެ އާމްދަނީއާއި ގުޅޭ ބަދަލުތައް ގެނައުމަށް ހުށައެޅުމަކީ މެންބަރުންނަށް އޮންނަ ފުރުޞަތަކަށް ނުވާތީ، މާލީ ދާއިރާއާއި ގުޅޭ އިސްލާހުތައް ގެނައުމުގައި ވަގުތު ނަގާނެކަމަށެވެ.

މިހާރުގެ މަޖިލީހުގެ ޢަމާޒަކީ ހަމަހުރެފައި ޤާނޫނުތަކަށް ބަދަލު ގެނައުން ނޫންކަމަށާއި، ދެމެހެއްޓެނިވި ގޮތުގައި ކުރިއަށްދެވޭނެ ބަދަލުތަކެއް ގެނައުންކަމަށް ޕީއެސްއެމްއަށް ދެއްވި ޚާއްސަ އިންޓަވިއުގައި ރައްޔިތުންގެ މަޖިލީހުގެ ރައީސް ޢަބްދުއްރަޙީމް ޢަބްދުﷲ ވިދާޅުވިއެވެ.