"ކޮޕް 29"ގައި ބައިވެރިވެވަޑައިގަތުމަށް ވަޒީރު ޠާރިޤް އަޒަރުބައިޖާނަށް

ތިމާވެށީގެ އެންމެ ބޮޑު ބައްދަލުވުން ކަމުގައިވާ "ކޮޕް 29" ގައި ބައިވެރިވެވަޑައިގަތުމަށް މޫސުމީ ބަދަލުތަކާއި ތިމާވެއްޓާއި ހަކަތައާ ބެހޭ ވަޒީރު ޠާރިޤް އިބްރާހީމް އަޒަރުބައިޖާންގެ ވެރިރަށް ބާކޫއަށް ފުރާވަޑައިގެންފިއެވެ.

ވަޒީރު ޠާރިޤް އިބްރާހީމްގެ އަރިހުގައި އެވުޒާރާގެ އިސްވެރިންގެ ޓީމެއް ބައިވެރިވެވަޑައިގަންނަވައެވެ.

މިފަހަރުގެ ކޮޕް ސަމިޓުގައި ރާއްޖޭން މުހިންމު ދައުރެއް އަދާކުރާނެކަމަށް މީގެކުރިން ވަޒީރު ޠާރިޤްވަނީ ވިދާޅުވެފައެވެ. ކޮޕްގެ ހަވާސާގައި 4 އިވެންޓެއް ރާއްޖޭން އިންތިޒާމުކުރުމަށްވަނީ ހަމަޖެހިފައެވެ. އޭގެތެރޭގައި އޭޑީބީއާ ގުޅިގެން އިއާދަކުރަނިވި ހަކަތައާ ގުޅޭ އިވެންޓަކާއި، ކޮޕްގެ އެޓޯލްސް ނޭޝަންގެ ޗެއަރގެ ހައިސިއްޔަތުން ފަރުތައް ހިމާޔަތްކުރުމުގެ މުހިންމުކަމާ ގުޅޭގޮތުން "ސަސްޓެއިނަބަލް ކޮރަލް ރީފް މެނޭޖްމަންޓް"ގެ އިތުރުން ކުދި ޖަޒީރާ ޤައުމުތަކުގެ ކްލައިމެޓް އެޑަޕްޓޭޝަން މިނިސްޓީރިއަލް ޗެމްޕިއަނެއްގެ ގޮތުގައި ހަރަކާތެއްހިމެނެއެވެ.

Minister @ThoriqIbrahim departs to Baku to attend UNFCCC COP29.

Watch this space for updates on Maldives at COP29. pic.twitter.com/nNc8p5NjIN

— Min. of Climate Change, Environment and Energy (@MoEnvmv) November 10, 2024

ކޮޕަށް ދިއުމުގެ ކުރިން، ތިމާވެއްޓާ ގުޅޭ މައްސަލަތަކާއި ގުޅޭގޮތުން ޒުވާނުންގެ ޚިޔާލު ހޯދުމަށް ޚާއްސަ އިވެންޓެއްވަނީ ކުރިއަށް ގެންގޮސްފައެވެ. އެޚިޔާލުތަކަށް ބިނާކޮށް، ކޮޕަށް ގެންދިއުމަށް ރާއްޖޭގެ ޒުވާނުންގެ ފަރާތުން ޚާއްސަ ސްޓޭޓްމަންޓެއްވަނީ ތައްޔާރުކޮށްފައެވެ.

ކޮޕް 29 ގައި ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ބައިވެރިވެވަޑައިގެން ތަޤުރީރު ކުރެއްވުމަށްވަނީ ހަމަޖެހިފައެވެ.

މޫސުމީ ބަދަލުތަކުން އަރައިގަތުމަށް ކުރާ ހޭދައަށް ބޭނުންވާ މާލީ އެހީ، ރާއްޖެ ފަދަ ޤައުމުތަކަށް ހޯދައި ދިނުމަށް ރާއްޖޭން ދަނީ ކޮޕްގައި ވަކާލާތުކުރަމުންނެވެ.

މިދިޔަ އަހަރު ދުބާއީގައި ކުރިއަށްދިޔަ ކޮޕް-28ގެ ބައްދަލުވުމުގައިވެސް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުވަނީ ބައިވެރިވެވަޑައިގަންނަވާފައެވެ.

މިއަހަރުގެ ކޮޕް ސަމިޓު ކުރިއަށްދާނީ މިމަހުގެ 11 އިން 22ގެ ނިޔަލަށް އަޒަރުބައިޖަންގެ ވެރިރަށް ބާކޫގައެވެ. މިއަހަރު ކޮޕްގެ ޝިޢާރަކީ "އިން ސޮލިޑޭރިޓީ ފޯރ އަ ގްރީން ވޯލްޑް" މިއެވެ. ކޮޕް ސަމިޓަކީ ދުނިޔެއަށް ކުރިމަތިވަމުންދާ ތިމާވެށީގެ މައްސަލަތަކާއި ގުޅޭގޮތުން އދ.ގެ މެމްބަރު ޤައުމުތަކުގެ ތެރެއިން ކުދި ބޮޑު ހުރިހާ ޤައުމަކުން ބައިވެރިވާ އެންމެ ބޮޑު ސަމިޓެވެ.