ރަށްރަށުގެ މަގުމަތީގައި އުޅޭ ބުޅާތަކުގެ ހާލަތުވެސް ދެނެގަންނަނީ
-
ޕެޓް ކެއަރ ފެސިލިޓީ މަސައްކަތްތައް ރަށްތަކަށް ވެސް ފުޅާކުރަންޖެހޭ
ރަށްރަށުގެ މަގުމަތީގައި އުޅޭ ބުޅާތަކުގެ ހާލަތު ދެނެގަތުމުގެ މަސައްކަތް ފަށަން ނިންމާފައިވާކަމަށް ދަނޑުވެރިކަމާއި ދިރޭތަކެއްޗާ ބެހޭ ވަޒީރު ޑރ. ޢާއިޝަތު ރަމީލާ ވިދާޅުވެއްޖެއެވެ. ވަޒީރު މިހެން ވިދާޅުވީ ޕީއެސްއެމް ނިއުސްގެ ރާއްޖެ މިއަދު ޕްރޮގްރާމުގައި ވާހަކަފުޅު ދައްކަވަމުންނެވެ.
ދަނޑުވެރިކަމާއި ދިރޭތަކެއްޗާ ބެހޭ ވަޒީރު ޑރ. ޢާއިޝަތު ރަމީލާ ވިދާޅުވީ މާލެ ސަރަހައްދުގައި މަގުމަތީގައި އުޅޭ ބުޅާތައް ގިނަވުމުގެ މައްސަލައަށް ހައްލެއް ގެނައުމަށް ރައީސުލްޖުމްހޫރިއްޔާ ޑރ. މުހައްމަދު މުޢިއްޒުގެ ތަޞައްވުރާއި އެއްގޮތަށް ބިނާކޮށްފައިވާ ޕެޓް ކެއަރ ފެސިލިޓީ ހުޅުވުމާއި ގުޅިގެން އެތަނުގެ މަސައްކަތްތައް ރަށްތަކަށް ވެސް ފުޅާކުރަންޖެހޭ ކަމަށެވެ.
އެކި ރަށްތަކުގެ މަގުމަތީގައި އުޅޭ ބުޅާތަކުގެ މައްސަލަތައްވެސް އެވުޒާރާއަށް ހުށަހަޅަމުންދާ ކަމަށް ވަޒީރު ވިދާޅުވިއެވެ.
ވަޒީރު ރަމީލާ ވިދާޅުވީ ޕެޓް ކެއަރ ފެސިލިޓީ ހުޅުވުމާއެކު މޮބައިލް ޓީމްތަކެއް އެކުލަވާލުމަށް ނިންމަވާފައިވާ ކަމަށެވެ.
"މޮބައިލް ޓީމްތައް އެކުލަވާލާފައި މަގުމަތީގައި އުޅޭ ބުޅާތަކުގެ އުނދަގޫތައް އެންމެ ބޮޑަށް މައްސަލަ ބޮޑުވެފައިވާ ރަށްތަކަށް ފުރަތަމަ ދަތުރުކުރާނީ. އަޅުގަނޑުމެންގެ ވެޓިނަރީ ޑޮކްޓަރުންނާއި ޓީމްތަކުގެ އެކި މެމްބަރުން އެތަންތަނަށް ދަތުރުކޮށް، އުޅޭ ބުޅާތަކުގެ އެސެސްމަންޓެއް ހަދާނެ އަދި ނިއުޓަރ ކުރަންޖެހޭނަމަ އެކަންވެސް ކުރާނެ" ވަޒީރު ރަމީލާ ވިދާޅުވިއެވެ.
ކޮންމެ ރަށެއްގައި ޕެޓް ކެއަރ ފެސިލިޓީއެއް ޤާއިމުކުރުމަކީ ކުރެވޭނެކަމެއް ނޫންކަން ފާހަގަކުރައްވަމުން ވަޒީރު ޑރ. ރަމީލާ ވިދާޅުވީ ސަރަހައްދީ ގޮތުން މުސްތަޤްބަލުގައި އެކި ސަރަޙައްދުތަކުގައި ފެސިލިޓީތައް ޤާއިމުކުރުމަކީ އެކަށީގެންވާކަމެއް ކަމަށެވެ. އަދި މޮބައިލް ޓީމުގެ ޚިދުމަތްތައް ރަށްތަކުގައި ދޭނެ ކަމަށްވެސް ވިދާޅުވިއެވެ.
"އޮޅު ހިޔާ"ގެ ނަމުގައި ހުޅުމާލެ ދެވަނަ ފިޔަވަހީގައި ޤާއިމުކޮށްފައިވާ ޕެޓް ކެއަރ ފެސިލިޓީ ހުޅުވާފައިވަނީ މި މަހުގެ 2ވަނަ ދުވަހުއެވެ. ޕެޓް ކެއަރ ފެސިލިޓީ ތަރައްޤީކޮށްފައިވަނީ 5000 އަކަ ފޫޓުގެ ބިމެއްގައެވެ.
ޕެޓް ކެއަރ ފެސިލިޓީން އާންމު ޗެކްއަޕްތަކާއި، ފަރުވާތަކާއި، އަދި އޮޕަރޭޝަންތަކުގައި ވެޓެރިނޭރިއަނަށް އެހީތެރިވުމާއި ވެޓެރިނޭރިއަން އަންގާ ގޮތުގެ މަތިން ބުޅަލަށް ބޭސް ދިނުން، ކާންދިނުމާއި، ބޭސްއެޅުން ހިމެނެއެވެ. އަދި އިންޖެކްޝަން ޖެހުމާއި، ލޭ ނެގުމާއި، ކުޑަކަމުދާ ތަކެތި ޓެސްޓްކުރުމާއި އެ ނޫން ވެސް ބަލި ދެނެގަތުމަށް ކުރާ ޓެސްޓުތައް ހެދުމުގެ އިތުރުން، އެނެސްތީސިއާ ބެލެހެއްޓުމާއި އޮޕަރޭޝަނަށްފަހު ރިކަވަރީގައި ތިބޭ ބުޅާތަކަށް ބޭނުންވާ ފަރުވާ ދިނުންވެސް ހިމެނެއެވެ.