ހިޔާވަހި ސްކީމްގެ ދަށުން ފައިނޭންސިންއަށް އެދުމުގެ ފުުރުސަތު ހުޅުވާލައިފި

ގެދޮރު އެޅުމަށް ދަތިވެފައިވާ މީހުންނަށް ޚާއްސަކޮށްގެން ސަރުކާރުން އިފްތިތާހުކުރި "ހިޔާވެހި ފައިނޭންސިން" ސްކީމަށް ކުރިމަތިލުމަށް ފުރުޞަތު ހުޅުވާލައިފިއެވެ.

ހިޔާވަހި ފައިނޭންސިން ސްކީމް، ރައީސުލްޖުމްހޫރިއްޔާ އިފްތިތާޙުކޮށްދެއްވީ މިދިޔަ އަންގާރަ ދުވަހު އެކަމަށްޓަކައި ބޭއްވި ޚާއްސަ ރަސްމިއްޔާތުގައެވެ. މި ސްކީމްގެ އުސޫލާއި ފައިނޭންސް ހޯދުމާއި ގުޅޭ މަޢުލޫމާތު މިހާރު ވަނީ ގެޒެޓުގައި ޢާންމުކޮށްފައެވެ.

މުޅި ރާއްޖޭގެ އެކި ސަރަޙައްދުތަކަށް އަމާޒުކޮށް ހުޅުވާލި މި ސްކީމަކީ އިސްލާމިކް ޝަރީޢާގެ އުސޫލުތަކާ އެއްގޮތަށް އެންމެ އަގު ހެޔޮކޮށް ފޯރުކޮށްދޭ ފައިނޭންސިންއެވެ. މި ޕްރޮގްރާމަކީ ރާއްޖޭގެ 3 ބޭންކަކާ ގުޅިގެން އިސްލާމީ އުސޫލުން %5 ފައިދާގައި ކުރިއަށްގެންދާ ފައިނޭންސިން ޕްރޮގްރާމެކެވެ.

މިގޮތުން މި ޕްރޮގްރާމަށް ރާއްޖޭގެ އަތޮޅުތަކުން އެދި ހުށަހަޅުއްވާ ފަރާތްތަކަށް "ރަށްވެހި ފައިނޭންސިންގ ސްކީމް"ގެ ދަށުން 1 މިލިއަން ރުފިޔާ، މި ޕްރޮގްރާމަށް ކަނޑައަޅާފައިވާ އަރބަން ސެންޓަރތަކުން "ސަހަރު ފައިނޭންސިންގ ސްކީމް"އަށް އެދި ހުށައަޅާ ފަރާތްތަކަށް 3 މިލިއަން ރުފިޔާ އަދި މާލެ ސަރަޙައްދަށް ޚާއްޞަ "ފަހިމާލެ ފައިނޭންސިން ސްކީމް"އަށް 6 މިލިއަން ރުފިޔާއާހަމައަށް ފައިނޭންސް ލިބޭނެއެވެ. މާލެ ސަރަޙައްދަށް ހުލުވާލި ފުރުޞަތުގައި، ގޭގެ ބެހެނިވެރިންނާއެކު އެކުވެގެން ހަ މިލިޔަން ރުފިޔާއިން ފެށިގެން 10 މިލިޔަން ރުފިޔާގެ ފައިނޭންސަށް އެދެވޭގޮތަށް އުސޫލު ވަނީ އެކުލަވާލާފައެވެ.

އަރބަން ސެންޓަރު ނުވަތަ ސަހަރުގެ ގޮތުގައި 26 ރަށެއް ސަރުކާރުން ވަނީ ކަނޑައަޅުއްވާފައެވެ. އެ ރަށްތަކުގެ ތަފްސީލް ގެޒެޓުގައި މި އިޢުލާނާއެކު ވަނީ ހިމަނާފައެވެ.

މި ފެސިލިޓީތަކަށް އެޕްލިކޭޝަން ހުޅުވާލާފައިވަނީ ހިޔާވެހި ޕޯޓަލް (www.hiyaavehi.housing.gov.mv) މެދުވެރިކޮށެވެ. މި ސްކީމަށް ހުށައެޅުމަށް 6 މަސް ދުވަހުގެ މުއްދަތެއް ދިނުމަށް ސަރުކާރުން ވަނީ ހުޅުވާލާފައެވެ. މި ސްކީމަށް އެދުމުގެ ފުރުސަތު 08 އޭޕްރީލް 2025 ވާ އަންގާރަ ދުވަހުގެ ރޭ 23:59 އާއި ހަމައަށް ވަނީ ފުރުޞަތު ހުޅުވާލާފައެވެ.

ހިޔާވެހި ފައިނޭންސިންގ ޕްރޮގްރާމް - އާންމު ރައްޔިތުންނަށް ދިމާވެފައިވާ ބޯހިޔާވަހިކަމުގެ ދަތިކަން ހައްލުކުރުމަށް އިސްލާމީ އުސޫލުގެ ތެރެއިން ދޫކުރެވޭ ފެސިލިޓީ. pic.twitter.com/heFGK362TU

— Ministry of Housing, Land and Urban Development (@MHLUDmv) November 7, 2024

ހިޔާވެހި ފައިނޭންސިން ސްކީމްގެ ދަށުން މާލީ އެހީ ފޯރުކޮށްދޭން އަންނަ އަހަރުގެ ބަޖެޓުގައި 1 ބިލިއަން ރުފިޔާ ވަނީ ކަނޑައަޅާފައެވެ. 1 ބިލިޔަން ރުފިޔާ ސަރުކާރުން ބޭންކުތަކަށް މި ސްކީމަށް އިންވެސްޓްކުރިނަމަވެސް، ބޭންކުތަކުން ލޯނު ދޫކުރާއިރު ޖުމްލަ 2 ބިލިޔަން ރުފިޔާއާ ހަމައަށް ފައިނޭންސް ދޭނެކަމަށް ރައީސުލްޖުމްހޫރިއްޔާ ވަނީ ވިދާޅުވެފައެވެ.

މި ފައިނޭންސް ހަމަޖައްސައިދޭނީ 25 އަހަރުން އަނބުރާ ދައްކާގޮތަށެވެ.

މި ޕްރޮގުރާމާއި ގުޅިގެން އިތުރު މަޢުލޫމާތު ހޯދުމަށް ހިޔާވެހި ޕޯޓަލް މެދުވެރިކޮށް ސުވާލު ހުށަހަޅައިގެން މަޢުލޫމާތު ސާފުކުރެވޭނެއެވެ.

ސަރުކާރުގެ މެނިފެސްޓޯއާއި އެއްގޮތަށް، 2028 ވަނަ އަހަރު ނިމޭއިރު، ބޯހިޔާވަހިކަމުގެ މަޝްރޫޢުއަކުން ފުރުޞަތު ނުލިބޭނެ އެއްވެސް ރައްޔިތަކު ނުހުންނާނެކަމުގެ ޔަޤީންކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްވައެވެ. ހިޔާވެހި ސްކީމަކީ މުޅި ރާއްޖެއަށް ހުޅުވާލައިގެން މިހާތަނަށް ކުރިއަށްގެންދާ އެންމެ އަގުހެޔޮ، އަދި އެންމެ ބޮޑު ފައިނޭންސް ސްކީމެވެ.