އާސަންދަ ނިޒާމަށް ރައްޔިތުން ކަންބޮޑުވާން ޖެހޭ ބަދަލެއް ނާންނާނެ: ސިއްޙީ ވަޒީރު

އާސަންދަ ނިޒާމަށް ގެންނަ ބަދަލުތަކުން ދިވެހި ރައްޔިތުން ކަންބޮޑުވާން ނުޖެހޭނެކަމަށް ޞިއްޙީ ވަޒީރު ޢަބްދުﷲ ނާޒިމް އިބްރާހީމް ވިދާޅުވެއްޖެއެވެ. ވަޒީރު މިހެން ވިދާޅުވީ ހެލްތު އެކްސްޕޯ 2024 ހުޅުވުމުގެ ރަސްމިއްޔާތުގައި ދެއްކެވި ވާހަކަފުޅުގައެވެ.

ޞިއްޙީ ވަޒީރު ޢަބްދުﷲ ނާޒިމް އިބްރާހީމް ވިދާޅުވީ ޤައުމެއްގެ އެންމެ ބޮޑު ރައުސުލްމާލަކީ ދުޅަހެޔޮ އާބާދީއެއް އޮތުން ކަމަށެވެ. އެހެންކަމުން އަބަދު ބަލިމަޑުކަމެއްގެ ފަހަތުން ދުވެވެން ނެތް ސިއްޙީ ނިޒާމެއް ޤާއިމްކުރުމަށް ސަރުކާރުން މަސައްކަތްކުރަމުންދާކަމަށް ވަޒީރު ވިދާޅުވިއެވެ.

"އެގޮތަށް ދުވާކަމަށްވަންޔާ އަޅުގަނޑުމެންގެ ސިއްޙީ ނިޒާމު ވާނީ ވަރުބަލި. އެ ބަލި މަޑުކަމާއި އެއްވަރަށް ފައިހަމަ ނުކުރެވޭނެ ނިޒާމަކަށް. ނަތީޖާއެއްގެގޮތުގައި އަދުގެ ސަރުކާރުން ވަނީ ދުޅަހެޔޮ ސިއްހަތެއްގައި ތިބުމަށް އަޅަން ޖެހޭ އުދަނގޫ ފިޔަވަޅުތައް އަޅަމުން." ޢަބްދުﷲ ނާޒިމް އިބްރާހީމް ވިދާޅުވިއެވެ.

ނާޒިމް ވިދާޅުވީ އާސަންދަ ނިޒާމަ ހަރުދަނާ ބަދަލުތައް ގެނެސްގެން މެނުވީ ރާއްޖޭގެ ސިއްޙީ ނިޒާމުގެ ތެރެއިން ރައްޔިތުންނަށް ފޯރުކޮށްދޭ ޚިދުމަތްތައް އެންމެ ރަނގަޅުގޮތުގައި ފޯރުކޮށް ނުދެވޭނެކަމަށެވެ.

އާސަންދަ ނިޒާމް އިޞްލާޙުކުރުމުގެ މަސައްކަތް ކުރެވެމުންދަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ބެއްލެވުމާއި އިރުޝާދުގެ ދަށުން ކަމަށާއި، މި ނިޒާމު ވެގެންދާނީ ރައްޔިތުންނަށް އުއްމީދު ގެނެސްދޭ ނިޒާމަކަށް ކަމުގެ ޔަޤީންކަން ވަޒީރު ދެއްވިއެވެ.

"ރައްޔިތުންނަށް ބަރުހެލިކަމެއް ނެތި ދެމެހެއްޓެނި ގޮތެއްގައި ސިއްހީ ނިޒާމު ކުރިއަށްގެންދިޔުމަށް މަގުފަހިކޮށްދޭ ނިޒާމަކަށް، އަޅަގަނޑު މިރޭ ޔަޤީންކޮށްދޭން ބޭނުންވަނީ މި ސްކީމަށް ގެންނަ ބަދަލަކުން ރައްޔިތުން ކަންބޮޑުވާން ޖެހޭ އެއްވެސް ކަމެއް ނާންނާނެ." ވަޒީރު ނާޒިމް ވިދާޅުވިއެވެ.

ވަޒީރު ވިދާޅުވީ މި ނިޒާމުގައި ހުރި މައްސަލަތައް ހައްލުކުރަން ޖެހޭކަމަށާއި މި ނިޒާމު ހަރުދަނާ ކުރުމަށް ފަންނީ މާހިރުންގެ ލަފާވެސް ހޯދާފައިވާ ކަމަށެވެ. އަދި މިކަމަށް މިހާރު ފިޔަވަޅު ނާޅައިފި ނަމަ ފަހުން އުފުލަންޖެހޭ ބުރަ މާ ބޮޑުވާނެ ކަމަށްވެސް ސިއްޙީ ވަޒީރު ޢަބްދުﷲ ނާޒިމް އިބްރާހީމް ވިދާޅުވިއެވެ.

އާސަންދަ ނިޒާމް ހަރުދާނަކުރުމަށް ގެންނަންޖެހޭ ބަދަލުތައް ގެނައުމުގެ މަސައްކަތް ސަރުކާރުން ދަނީކުރަމުންނެވެ. އެގޮތުން ގެންނަ އެންމެ ބޮޑު އިޞްލާޙަކީ އާސަންދަ ނިޒާމަކީ އެންމެ ބޭނުންޖެހިފައިވާ މީހުންނަށް އަމާޒުކުރެވިފައިވާ ޚިދުމަތަކަށް ހެދުމެވެ. މިގޮތުން ސަރުކާރުން މިހާރު ގެނެސްފައިވާ ބައެއް ބަދަލުތަކުގެ ތެރޭގައި ޞިއްޙީ ޚިދުމަތް ހޯދުމަށް އަންނަ ފަރާތަކީ އަމިއްލަ އިންޝުއަރެންސެއް އޮތް ފަރާތެއްނަމަ، އަދި އަމިއްލަ އިންޝުއަރެންސުން ކަވަރކުރާ ޚިދުމަތެއްނަމަ ޚިދުމަތްދިނުމުގައި އަމިއްލަ އިންޝިިއުރަންސްއަށް އިސްކަން ދިނުން ހިމެނެއެވެ. އަދި އަމިއްލަ އިންޝުއަރެންސްގެ ދަށުން ނުލިބޭ ޚިދުމަތްތައް އާސަންދައިން ލިބޭނަމަ، އެ ޚިދުމަތެއް އާސަންދައިގެ ދަށުން ފޯރުކޮށްދިނުންވެސް ގެނެސްފައިވާ އިޞްލާހުގައިވެއެވެ.

އަމިއްލަ އިންޝުއަރެންސް ނުލިބޭ ހުރިހާ ހާލަތެއްގައި އާސަންދަ މެދުނުކެނޑި ލިބޭނެކަމަށްވެސް ސަރުކާރުން ވިދާޅުވެއެވެ.