ރާއްޖޭގެ ކުޅިވަރު ތާރީޚުގައި ފުރަތަމަ ފަހަރަށް އާންމުކޮށް ހުޅުވާލައިގެން ކުރިޔަށްގެންދާ ޝޫޓިންގެ ގައުމީ މުބާރާތް ކަމަށްވާ ނެޝަނަލް ޝޫޓިން ސްޕޯޓްސް ޗެމްޕިއަންޝިޕު ފޯރީގައި ކުރިޔަށް އެބަދެއެވެ.
މުބާރާތް ހުޅުވުމުގެ ރަސްމިއްޔާތު ބާއްވާފައިވަނީ މިިދިޔަ އަންގާރަ ދުވަހު ސޯޝަލް ސެންޓަރު ސްޓޭޖު ސަރަހައްދުގައެވެ. މުބާރާތް ކުރިޔަށްދާނީ ސޯޝަލް ސެންޓަރުގެ ކުރީގެ ޓީޓީ ހޯލުގައެވެ. މުބާރާތް ފެށުމުގެ ގޮތުން ބޭއްވި ރަސްމިއްޔާތު ޝަރަފުވެރިކޮށްދެއްވީ ޝޫޓިންގ އެސޯސިއޭޝަންގެ ރައީސް މޭޖަރ ޖެނެރަލް ރިޓަޔާޑް ޙާމިދު ޝަފީޤެވެ. މީގެ އިތުރުން ކުޅިވަރާއި ބެހޭ ވުޒާރާގެ އިސްބޭފުޅުން ބައިވެރިވެ ވަޑައިގެންނެވިއެވެ.
މިމަހުގެ 25 ގެ ނިޔަލަށް ކުރިޔަށްދާ މި މުބާރާތަށް އާންމުންގެ ފަރާތުން ބޮޑު ތަރުހީބެއް ވަނީ ލިބިފައެވެ. އެގޮތުން 270 އަށް ވުރެ ގިނަ މީހުން މިފަހަރުގެ ގައުމީ މުބާރާތުގައި ވަނީ ބައިވެރިވެފައެވެ. ބައިވެރިވި މީހުންގެ ތެރޭގައި އެކި އުމުރުފުރާތަކުގެ އުއްމީދީ އެތުލީޓުންތަކެއް ހިމެނެއެވެ. މުބާރާތަށް އާންމުން ތައްޔާރުކުރުމުގެ ގޮތުން ޝޫޓިން އެސޯސިއޭޝަނުން ވަނީ އެކި ކޯޗުންގެ އެހީއާއެކު ތަމްރީނު ޕްރޮގްރާމުތަކެއް ކުރިޔަށްގެންގޮސްފައެވެ. ގައުމީ މުބާރާތުގައި ގިނައިން ހިމެނިފައިވަނީ އާންމުންގެ ތެރެއިން ތަމްރީނު ލިބުނު އެތުލީޓުންނެވެ.
މުބާރާތް ކުރިޔަށްދާނީ ތިން ކެޓަގަރީއަކަށް ބަހާލެވިގެންނެވެ. އެއީއޯޕަން ކެޓަގަރީ، ޖޫނިއަރ ކެޓަގަރީ، އަދި ޔޫތު ކެޓަގަރީއެވެ. އިންޑިވިޖުއަލް އަދި ޓީމު އިވެންޓުވެސް މި މުބާރާތުގައި ހިމެނެއެވެ.