އިޤްތިޞާދު ހަމަ މަގަށް އެޅުވުމަށް ކުރާ މަސައްކަތްތަކުގެ ހެޔޮ ބަދަލުތައް މިހާރު ދަނީ ފެންނަމުން: ވަޒީރު ސަޢީދު

އިޤްތިޞާދު ހަމަ މަގަށް އެޅުވުމަށް ސަރުކާރުން ކުރަމުންދާ މަސައްކަތްތުގެ ހެޔޮ ބަދަލުތައް މިހާރު ފެންނަން ފަށާފައިވާކަމަށް އިޤްތިޞާދީ ތަރައްޤީއާއި ވިޔަފާރިއާ ބެހޭ ވަޒީރު މުޙައްމަދު ސަޢީދު ވިދާޅުވެއްޖެއެވެ.

ވަޒީރު ސައީދު މިހެން ވިދާޅުވީ މުޅި ރާއްޖެއަށް ބީއެމްއެލް އޭޓީއެމް ޚިދުމަތް ފޯރުކޮށްދިނުމުގެ މަސައްކަތް އިފްތިތާހުކުރުމަށް ބޭއްވި ރަސްމިއްޔާތުގައި ދެއްކެވިވާހަކަފުޅުގައެވެ.

މި ރަސްމިއްޔާތުގައި އިޤްތިޞާދީ ތަރައްޤީއާއި ވިޔަފާރިއާ ބެހޭ ވަޒީރު މުޙައްމަދު ސަޢީދު ވިދާޅުވީ ނިމުނު ސަރުކާރުން ރާއްޖޭގެ އާމްދަނީއަށް އިތުރުވާނެ އޮށްޓަރުހުރި އެއްވެސް އެސެޓެއް ޤާއިމްކޮށްފައި ނުވާއިރު، ބޮޑު ދަރަންޏަކާއި ފެއިލްވެފައި އޮތް މާލީ ނިޒާމަކާއި މޮނިޓަރީ ނިޒާމެއް މި ސަރުކާރަށް ވާރުތަވިކަމަށެވެ.

މި ސަރުކާރަށް މިވީ މުއްދަތުގައި ބޮޑެތި އުސް އިމާރަތްތަކެއް އަދި ލޮލަށް ފެންނަން ނެތް ނަމަވެސް އިޤްތިޞާދު ހަމަމަގަށް އެޅުވުމަށް ގިނަ މަސައްކަތްތަކެއް ކުރެވިފައިވާކަން ވަޒީރު ފާހަގަކުރެއްވިއެވެ. އެގޮތުން 5 އަހަރެއްގައި ކެބިނެޓު ޖަލްސާތައް ނުބާއްވާ އަދަދަކަށް މި ފާއިތުވީ 52 ހަފްތާގެ ތެރޭގައި ޖަލްސާތައް ބާއްވާފައިވާ ކަމަށް ވަޒީރު ވިދާޅުވިއެވެ.

"ގާތްގަނޑަކަށް 100އަށްވުރެ ގިނަ އިކޮނޮމިކް ކައުންސިލްގެ ބައްދަލުވުންތައް، ރައީސްގެ ލަފާފުޅާ އިރުޝާދާއެކު ކުރިއަށްގެންދިޔަކަން އެއީ އެއް ހެކި، ސީޝަލް ކައުންސިލްގެ ބައްދަލުވުންތައް، އަދި ވަޒީރުންގެ މަސައްކަތްތައް ރައީސްގެ އިރުޝާދާއެކު ކުރިއަށްގެންދިޔަކަން،" ވަޒީރު ވިދާޅުވިއެވެ.

ވަޒީރު ވިދާޅުވީ މި މަސައްކަތްތަކާއެކު މާލީ ދާއިރާއިން ކުރިއެރުންތައް އަންނަމުންދާ މަންޒަރު މިހާރު ފެންނަމުންދާ ކަމަށެވެ.

"މިކަމަށް ހުރި ގޮންޖެހުންތައް، ވާރުތަވެފައި ހުރި ގޮންޖެހުންތައް، މިކަންތައް ހަމަ މަގަށް އަޅުވާ، ބޭންކު އޮފް މޯލްޑިވްސްގެ މަސައްކަތް މިދަނީ ދިވެހި ބޭންކެއްގެ ގޮތުގައި ކުރިއަރައިގެންދާ މަންޒަރު،" ވަޒީރު ވިދާޅުވިއެވެ.

ވަޒީރު ވިދާޅުވީ ވިޔަފާރިތަކަށް ހުރި ހުރަސްތައް ނައްތާލުމަށް ސަރުކާރުން ގިނަ މަސައްކަތްތަކެއް ކުރަމުންދާކަމަށެވެ. އެގޮތުން އަންނަ އަހަރުތެރޭ ޕޭޕަލްފަދަ ޚިދުމަތްތައް އަންނާނެ ކަމަށް ވަޒީރު ސަޢީދު ވިދާޅުވިއެވެ.

"ކުޑަ މާރކެޓަކަށް ވީމާ ނުގެނެވިފައި ހުރި ވަސީލަތްތައް، މިސާލަކަށް ޕޭޕަލް، އެތައް އީ ވޮލެޓްސްތަކެއް ގެނެވޭނެ، މަސައްކަތްތައްވެސް ގިނަ، ދިވެހި ސަރުކާރުން ކުރަން ޖެހޭ މަސައްކަތް މިދަނީ ކުރަނީ،" ވަޒީރު ވިދާޅުވިއެވެ.

އިޤްތިޞާދީ ތަރައްޤީއާއި ވިޔަފާރިއާ ބެހޭ ވަޒީރު މުޙައްމަދު ސަޢީދު ވިދާޅުވީ އަންނަ އަހަރުވެގެންދާނީ ބޯހިޔާވަހިކަމުގެ ރަން ޒަމާނަކަށް ކަމަށެވެ. އަދި ގިނަ މަޝްރޫޢުތަކެއް ފެށި ރާއްޖޭގައި ވިޔަފާރީގެ ދާއިރާއިން ގިނަ ކުރިއެރުންތަކެއް އަންނަ އަހަރުތެރޭ އަންނާނެ ކަމަށް ވަޒީރު ސަޢީދު ވިދާޅުވިއެވެ.