ޗައިނާ ސަރުކާރުން ރާއްޖެއަށް 80 ކޮންޕިޔުޓަރާއި 20 ލެޕްޓޮޕް ހަދިޔާކޮށްފި

ޗައިނާ ސަރުކާރުން ދިވެހިރާއްޖެއަށް 80 ކޮންޕިޔުޓަރާއި 20 ލެޕްޓޮޕް ހަދިޔާކޮށްފިއެވެ.

ޗައިނާ ސަރުކާރުން ހަދިޔާކުރި އާލާތްތަކާ ހަވާލުވުމަށް ދިވެހި ޚާރިޖިއްޔާއާއި ރާއްޖޭގައި ހުންނަ ޗައިނާގެ އެމްބަސީއާ ދެމެދު އެއްބަސްވުމެއްގައި ވަނީ ސޮއިކޮށްފައެވެ.

މި އެއްބަސްވުމުގައި ޚާރިޖީ ވުޒާރާގެ ފަރާތުން ސޮއިކުރެއްވީ ވަޒީރު ޑރ. ޢަބްދުﷲ ޚަލީލެވެ. އަދި އެމްބަސީގެ ފަރާތުން ސޮއިކުރެއްވީ ޗައިނާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ވަންގް ލިޒިންއެވެ.

މި ރަސްމިއްޔާތުގައި ވާހަކަފުޅުދައްކަވަމުން ޚާރިޖީ ވަޒީރު ޑރ. ޢަބްދުﷲ ޚަލީލް ވިދާޅުވީ ޗައިނާއިން ހަދިޔާކުރި އާލާތްތަކުގެ ސަބަބުން ރާއްޖޭގެ ޓެކްނިކަލް ދާއިރާ ކުރިއެރުވުމަށް މަގު ފަހިވާނެ ކަމަށެވެ. އަދި ރައްޔިތުންނަށް ފޯރުކޮށްދޭ ޑިޖިޓަލް ޚިދުމަތްތައް ތަރައްޤީކުރުމަށް ޗައިނާއިން ވެދެއްވި އެހީތެރިކަން މުހިންމު ދައުރެއް އަދާކުރާނެކަމަށް ވަޒީރު ވިދާޅުވިއެވެ.

"މި އެހީއަކީ ދެ ޤައުމުގެ ދެމެދުގައި އުފެދިފައިވާ ގާތްގުޅުމުގެ ރަމްޒެއް. ޗައިނާއިން ދަނީ އަބަދުވެސް ރާއްޖެއަށް އެކި ދާއިރާތަކުން އެހީތައް ފޯރުކޮށްދެމުން. މިފަދަ އެހީތައް ރާއްޖެއަށް ފޯރުކޮށްދިނުމުގައި ޗައިނާގެ ސަފީރުކުރައްވާ މަސައްކަތަށް ޝުކުރު އަދާކުރަން." ވަޒީރު ވިދާޅުވިއެވެ.

މި ރަސްމިއްޔާތުގައި ވާހަކަދައްކަވަމުން ޗައިނާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ވަންގް ލިޒިން ވިދާޅުވީ ރާއްޖެއާއި ޗައިނާއާ ދެމެދު ގުޅުން އުފެދިފައިވަނީ އިޙްތިރާމުގެ މައްޗަށް ކަމަށެވެ. އަދި މި ގުޅުމުގެ ދަށުން ރާއްޖެއަށް ގިނަ އެހީތަކެއް މިހާރުވެފައިވާކަން ސަފިރު ފާހަގަކުރެއްވިއެވެ. އަދި ކުރިއަށްއޮތް ތަނުގައި ޗައިނާ ސަރުކާރުން ރާއްޖެއަށް ފޯރުކޮށްދޭން ނިންމާފައިވާ ބައެއް އެހީތައް ސަފީރު ފާހަގަކުރެއްވިއެވެ.

"1000 ސިވިލް ސަރވަންޓުން ޗައިނާއަށް ގެންގޮސް ތަމްރީންކުރަން ހަމަޖެހިފައިވޭ. އަދި އެކި ދާއިރާތަކުން މީހުން ޗައިނާއަށް ގެންގޮސް ތަމްރީންކުރަން ވަނީ ހަމަޖެހިފައި. އަދި ރާއްޖޭގައި އެތުލީޓުން ތަމްރީންކުރުމަށްވެސް ހަމަޖެހިފައިވޭ." ސަފީރު ވިދާޅުވިއެވެ.

ޗައިނާ ސަރުކާރުން ދިވެހި ސަރުކާރަށް 80 ކޮންޕިޔުޓަރާއި 20 ލެޕްޓޮމް ހަދިޔާކޮށްފައިވެއެވެ. މިއީ ލެނޮވޯ ބްރޭންޑްގެ އާލާތްތަކެކެވެ.